Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ИОАННОНДИ ПАНЧФ НЯЙФКС

Глава 9

Ветеце торамать торамац

1Ветеце ангелсь торазевсь – и мон няень тяште, кона прафоль менельста модать лангс. Тейнза максфоль потмаксфтома томбать эзда панжема.2Мзярда сон панжезе потмаксфтома томбать, тя томбаста, кода кабаконашка пянакудста, кеподсь тяфтама качам, нльне шобдалгодсь тя качамть эзда шись и кожфсь.3А качамть потмоста лиссь модать лангс ламодонга лама саранча. Тейст максфоль сяка вийсь, кона ули масторлангонь скорпиоттнень.4Тейст азфоль, афольхть тие кальдяв аф модалангонь тишети, аф кодамовок сянгяряти, аф кодамовок шуфтти, но аньцек ся ломаттненди, конатнень конясост аш Шкайть тяштьфксоц.5И сятненьге ашезь мярьгондев шавондомс, а аньцек маятафтомс вете кофт. Маятамась синь эздост стамоль, кода скорпиононь пупамать эзда, мзярда сон пупасы ломанть.6Маятамань ня шитнень ломаттне синць кармайхть вешема кулома – но аф муйхть; ёрайхть куломс, но куломась ворьгоди эздост.

7Саранчатне, ланга ванозь, шаркстсть алашатнень лангс, конат аноклафт тюреманди. Прясост ульсть бта зрнянь каштаст, а шамасна шаркстсть ломаненнети.8Саранчатнень шяярьсна лятфнезь аваннетнень, а пейсна ульсть, кода лефоннет.9И лангсост ульсть ваксарщапт, кода кшнинь панархт, а пацянь либорьфсна ульсь, кода дуборф лама алашас кильтьф крандаснень эзда, конат шанчк ардыхть тюремань паксяв.10Синь ульсть пулосна и эсост ульсть пупамат, кода скорпиоттнень. Тейст максфоль азорксши тиендемс ломаттненди зиян вете кофт.11Синь лангсост оцязоркс ульсь потмаксфтома томбать ангелоц. Евреень кяльса сонь лемоц Аваддон, грекокс тя лемсь – Аполлион.

12Ётась васенце кальдявсь, но вов, мельганза молихть лия кафттне.

Котоце торамать торамац

13Котоце ангелсь торазевсь – и мон кулень вайгяль, кона мольсь Шкайть инголе ащи зрнянь алтарть ниле сюронзон эзда.14Тя вайгяльсь мярьгсь котоце ангелти, конань ульсь торамац: «Нолдайть ниле ангелхнень, конат сотнефт Ефрат оцюдонга оцю ляйть видеса».15И нолдазь ся ниле ангелхнень, конат аноклафтольхть тя частти, шити, ковти и кизоти: тейст эрявсь шавомс ломаттнень колмоце пяльксснон.16Ластя ушманда ульсь кафта сятт миллион. Мон кулине ластятнень лувксснон.17Вага кодамкс мон няине няйфксса алашатнень и лангсост ластятнень: синь кшнинь панарсна ульсть толкс якстерьхть, качам лаца шобда-сенепт и палыкандоркс тюжя тюсоннет. Алашатнень прясна ульсть, кода лефоннет, а кургстост општыесь тол, качам и палыкандор.18И шавфоль ломаттнень колмоце пялькссна ня колма машфтоматнень эзда: толть, качамть и палыкандорть, конат лиссть алашатнень кургстост.19Алашатнень вийсна ульсь аф аньцек кургсост, а пулосостка. Синь пулосна ульсть пря мархтот, куй лацот, и ня прятнень мархта синь пупсезь ломаттнень.

20А лядыкс ломаттне, конат ашесть кула ня машфтоматнень эзда, сяка ашесть шарфта эсь кядьсост тиф шкайдост. Синь ашесть лотка сюконякшнемда кяжи ваймопожфненди и зрняста, сияста, сереста, кевста и шуфтста тиф шкайснонды, конат аф няихть, аф кулихть, аф якайхть.21И синь ашесть каенда аф шавондомаснон инкса, аф колдавамаснон, аф усксевомаснон, аф саламаснон инкса.


*а 9.11 Ня лепнень смузьсна: Аваддон – юмамаши, Аполлион – машфты-кулофты.


предыдущая глава Глава 9 следующая глава