Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ИОАННОНДИ ПАНЧФ НЯЙФКС

Глава 8

Сисемце тяштькссь и зрнянь качакофтомань алтарсь

1Мзярда Верозсь валхтозе сисемце тяштьксть, менельса сембось сетьмось. Пялешка част ульсь сетьме.2Мон няень сисем ангелхт, конат ащесть Шкайть инголе. Тейст максфтольхть сисем торамат.3Сась нинге фкя ангел и арась алтарть инголе. Кядьсонза сон кирдсь зрнянь качакофтомань кядьге. И тейнза максфоль лама фимиамда, кона эряволь путомс сембе иняруфнень озондомаснон ваксс зрнянь алтарть лангс, кона оцязоронь озама вастть инголе.4Ангелть кядьста фимиамонь качамсь марса иняруфнень озондомаснон мархта кеподсь Шкайти.5Ангелсь сявозе качакофтомань кядьготь, пяшкодезе сонь алтарьста толда и ёрдазе модать лангс: и кайгозевсть вайгяльхне и атямонь торамась, кфчядсть ёндолхт и тиевсь модашерьхкома.

Ниле васенце тораматнень торамасна

6Сисем ангелхне, конатнень ульсть сисем торамасна, срхкасть торама.

7Васенце ангелсь торазевсь – и вер мархта шовор цярахман и тол ёрдасть модать лангс. Палсь модать колмоце пяльксоц, и палсть шуфттнень колмоце пялькссна, и эрь кодама сянгяря тишесь палсь.

8Омбоце ангелсь торазевсь – и бта кабаконашка панда, кона палы толса, ёрдась пря оцюведти. Оцюведть колмоце пяльксоц арась веркс,9кулось эсонза сембе эряйть колмоце пяльксоц, и маштфоль оцю венчнень колмоце пялькссна.

10Колмоце ангелсь торазевсь – и менельста прась оцю тяште, кона палсь толонь валдоптома лаца. Сон прась ляйхнень и лихтибрятнень колмоце пяльксозост.11Тяштть лемоцоль Нярьхкамаз. И веттнень колмоце пялькссна арась кода нярьхкамаз, и ламоц ломаттне кулость ня веттнень эзда, сяс мес синь тиевсть сяпикс.

12Нилеце ангелсь торазевсь – и колафоль шить колмоце пяльксоц, ковть колмоце пяльксоц и тяшттнень колмоце пялькссна. Синь колмоце пялькссна шобдалгодсь, шить и веть колмоце пялькссна тиевсть шобдакс.13И мон няень и кулень нинге фкя ангел, кона лийсь вярдень менельге, и кайгиста ювадсь: «Кальдяв, кальдяв, кальдяв модалангонь эряйхненди мекольце колма ангелхнень торамаснон вайгяльснон эзда, конат вов-вов торазевихть!»


*а 8:11 нярьхкамаз – сяпе тише; полынь


предыдущая глава Глава 8 следующая глава