Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ИОАННОНДИ ПАНЧФ НЯЙФКС

Глава 7

144 000 тяштькстафне

1Сямольде мон няень ниле ангелхт. Синь ащесть модать ниле ужеванза и кирнезь модань ниле варматнень, тязаст уфа аф модать лангс, аф оцюведть, аф кодамонга шуфтть лангс.2Мон няень нинге лия ангел, кона кеподсь шинь стяма ширде и конань кядьса ульсь эряй Шкайть тяштьксонь путомац. Ангелсь кайги вайгяльса ювадсь ся ниле ангелхненди, конатненди максфоль тиендемс кальдяв модати и оцюведти:3«Тяда тиенде кальдяв аф модати, аф оцюведти, аф шуфттненди, мзярс аф путтама тяштькс Шкаеньконь эрь покодиенц коняс».

4Мон кулине, мзяра ульсь тяштькстафта. Тяштькстафта ульсь сяда нильгемонь нилие тёжянь ломань Израилень цёратнень сембе юромстост:5Иудань юромста тяштькстафоль кемгафтува тёжянь, Рувимонь юромста кемгафтува тёжянь, Гадонь юромста кемгафтува тёжянь,6Асиронь юромста кемгафтува тёжянь, Неффалимонь юромста кемгафтува тёжянь, Манассиянь юромста кемгафтува тёжянь,7Симеононь юромста кемгафтува тёжянь, Левиень юромста кемгафтува тёжянь, Иссахаронь юромста кемгафтува тёжянь,8Завулононь юромста кемгафтува тёжянь, Иосифонь юромста кемгафтува тёжянь и Вениаминонь юромста кемгафтува тёжянь.

Акша щамстотне

9Сяльде мон няень ламодонга лама ломань, конат киндинге ашесть лувов, эрь кодама масторста и юромста, сембе ломаньтналхнень и кяльхнень эзда. Синь ащесть акша щамса оцязоронь озама вастть и Верозть инголе, кядьсост кирдсть пальмань тараткат.10Синь ювадсть кайги вайгяльса:
«Идемась сай Шкаеньконь эзда,
кона озаф оцязоронь озама вастса,
и Верозть эзда!»

11Сембе ангелхне ащесть оцязоронь озама вастть перьфке, атятнень и ниле эряй ваймотнень перьфке, и прасть комада оцязоронь вастть инголе и сюконясть Шкайти,12корхтасть:
«Аминь! Бславама и иневалда,
смузьши и сюконяма,
пара лувкс, азорксши и вий
Шкаеньконди пефтома пингс! Аминь».

13Атятнень эзда фкясь кизефтемань: «Кит нят акша щамса ломаттне и коста синь састь?»14Мон мярьгонь тейнза: «Азор, тон тянь содасак». И сон азозе каршезон:
«Нят сят, кит састь оцю маятамаста.
Синь муськозь эсь щамснон
и акшептозь синь Верозть верса.
15Сяс синь ащихть Шкайть оцязоронь озама вастонц инголе
и шинек-венек покодихть Тейнза Сонь кудсонза;
оцязоронь вастса Озадось кяшсыне синь котфонь кошенц алу,
и кармай эряма синь ётксост.
16Синь мзярдонга аф кармайхть содама вачаши
и симомань сама.
Синь аф пидесыне шись
и опана псись синь аф токасыне,
17сяс мес Верозсь, кона ащи оцязоронь озама вастть кучкаса,
кармай ваномост синь и вятьсыне синь лихтибрятненди,
конатнень эзда шуди эряфонь максы ведь.
И Шкайсь нардасы синь сельмостост эрь сельмоведнять».


предыдущая глава Глава 7 следующая глава