Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ЕВРЕЙХНЕНДИ СЁРМАСЬ

Глава 4

1Сяс мес надияфтомась Шкайть ваймама вастонцты сувамать колга нинге иляткшни вийса, тейнек эряви пелемс вага мезьда: афоль иляда кие ёткстонт пяле ки лангс.2Вдь Пара кулясь ульсь азф тейнек стане жа, кода тейстка. Аньцек кульф валсь ашезь канда тейст лезкс, сяс мес синь ашезь сота сонь кемамаснон мархта.3А минь, кит араме кемайкс, суватама Сонь ваймама вастозонза, сяс мес Шкайсь мярьгсь:
«Кяженьбачк Мон варань:
"Мзярдонга аф сувайхть Монь ваймама вастозон"».

Сон азозе тянь, хуш менельхнень-масторхнень тиемста сявомок Сонь тевонза ульсть шумордафт.4Сяс мес Сёрматфксса корхтави сисемце шить колга тяфта: «И ваймясь Шкайсь сисемце шиня сембе тевонзон эзда».5А сяда вяре корхтави: «Мзярдонга аф сувайхть Монь ваймама вастозон».6Сят, конат васенцекс кулезь Пара кулять, ашесть пов тоза аф кулхцондоманкса. Сембе сяка, кие-бди нинге сувави Сонь ваймама вастозонза,7сяс Шкайсь путсь лия ши, конань лемдьсы «тячи». Лама пингонь ётазь Шкайсь корхтась Давидонь вельде, кода инголе ни азфоль:
«Тячи, кда тинь кульхтяда Шкаень вайгяль,
тясть калготкстофта седиентень».

8Кда Иисус Навин вятелезень синь ваймама вастти, Шкайсь тяда меле афоль корхта кодама-бди лия шинь колга.9Тяфта лисенди, сисемце шинь ваймамань илась нинге учсы Шкаень ломаньтналть.10Кие сувай Сонь ваймама вастозонза, ся ваймоси эсь тевонзон эзда стане жа, кода Шкайське эсь тевонзон эзда.11Сяс сембе вийсонк варжасаськ сувамс ся ваймама вастти: афоль иляда кие пяле ки лангс, молезь сяка аф кулхцондомать мельге.

12Сяс мес Шкаень валсь эряй и вии, и кафцьке пяльде шоваф торда сяда оржа. Сон крхкаста сувай ломанень потмоти и пачкоди мянь тоза, коса ваймось и пожфсь, эзнетне и пакарь уйхне, и машты панжемс седиень мяльхнень и арьсематнень.13Шкайть эзда мезевок аф кяшеви. Сонь сельмонзон инголе сембось штада и панжада, Сон – Судьяньке и Сонь инголенза тейнек сави корхтамс сембе тевоньконь колга.

Иисус – инь оцю Озксвятиень оцюнясь

14Сяс мес минь ули инь оцю Озксвятиень оцюняньке – Иисус, Шкаень Цёрась, кона ётась менельхнень пачк, эрьда карматама кемоста кирдема ся кемамати, конань азонкшнесаськ ломаттнень ингольде.15Вдь минь Озксвятиень оцюняньке аф стама, конанди афоль шарьхкодев минь лафчашиньке, меколанкт, Сон минь лацонк ульсь варжаф сембоса, аньцек Сон ашезь тие кодамовок пеже.16Эрьда апак пельхть сатама пароказнень максы Шкайть озама вастонц инголи. Тоса минь мутама кельгозь ужяльдема и пароказне, конат лездыхть тейнек эрявикс пингста.


*а 4:3 Псалтирь 94:11

*б 4:7 Псалтирь 94:7-8

*в 4:14 Иисус кеподсь менели и тяни Сон Шкайть ширеса.


предыдущая глава Глава 4 следующая глава