Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ПАВЕЛОНЬ ВАСЕНЦЕ СЁРМАЦ ТИМОФЕЕНДИ

Глава 2

Озондомась и прянь вятемась кемаень пуромксса

1Сянкса эняльдян, васендакиге тиендеда тяфта: катк озондоманте, вешфксонте, эняльдеманте, сюконяманте улихть сембе ломаттнень инкса,2оцязорхнень и сембе оцюнятнень инкса. Тя максы тейнек сетьме эряф и ладяма, и карматама эряма Шкаень мялень ванозь и пара лувксса.3Тя пара и пяк мялезонза Шкайти, минь Идиеньконди,4кона ёрай идемс сембонь и пачфтемс синь видешить шарьхкодеманцты.5Вдь Шкайсь фкя, тяфта жа Шкайть и ломаттнень ёткса аньцек фкя тевонь якафты – ломанць Христос Иисуссь,6кона максозе Эсь прянц сембе ломаттнень идемаснон-рамамаснон инкса. Тя ульсь виде пингста, и няфнесы Шкайть арьсефонц.7Тянкса Шкайсь путомань Кулянь кандыкс и апостолкс. Мон аф васькафнян, корхтаса видеть Христосса – путфан лия ломаньтналхненди кемамати и видешити тонафтыкс.

Алять и авать вастсна кемаень пуромксса

8Монь мялезе тяфтама, катк эрь вастова алятне, иняру кядень кепсезь, озондыхть кяжфтома и сялондомафтома.9Тяфта жа аватневок катк щакшнихть сельмос аф каяй щамса-карямса, мазопнесазь эсь пряснон виздемашиса и шумбра-ару мяльса. Катк мазопнесазь пряснон аф мазыста шяярень понамаса, аф зрняса-жемчугса, аф питни щамса-карямса,10а пара тевса, кода ладяй аватненди, конат максозь эсь пряснон Шкайти и тиендихть Сонь мяленц коряс.11Катк авась тонафни апак каштортт, сембоса сятявста кулхцондозь.12Мон аф мярьган авати тонафтомс и улемс алять лангса азоркс. Катк авась аф кашторды.13Вдь васенцекс тифоль Адам, сяда меле Ева.14И аф Адам ульсь васькафтф, а авась. Тя сон ульсь васькафтф и прась пежес.15Но авась, конац лисьф рьвакс и шачфни шабат, ули идеф, кда сон иляды кемамаса, кельгомаса и инярушиса.


*а 2:9 Ся пинкнень ульсть тяфтама аф кулхцонды ават, конат мольсть ся пингонь койхнень каршек и пяк лама вий путнесть эсь прянь мазылгофтомати щамса и пряшяярень понамаса.


предыдущая глава Глава 2 следующая глава