Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ПАВЕЛОНЬ ВАСЕНЦЕ СЁРМАЦ ТИМОФЕЕНДИ

Глава 3

Кодамкс улема кемаень пуромксонь мельге ваныти

1Виде валсь: кие ёрай улемс пуромксть мельге ваныкс, ся пара тев ёрай.2Сяс пуромксть мельге ваныти эряви улемс аф муворукс: улемс мирдекс аньцек фкя рьванди, кятавкс, шумбра-ару мяльса эряйкс, цебярьста прянь вятикс, виде ваймокс, инжиень кельгикс, машты тонафтыкс,3аф симикс, аф тюрикс, аф изгордыкс, аньцек эстейнза паронь аф вешендикс, но сетьмокс, лиянь мархта ладяйкс, ярмаконь мельге аф панцикс.4Тейнза эряви улемс цебярь кудазоркс, кона пара лувксса касфтсыне-трясыне шабанзон кулхцондыкс.5Кда кие аф машты вятема эсь кудэряензон, кода ся кармай Шкаень пуромксть колга пичедема-канзедема?6Катк сон аф ули сятнень ёткста, конат аньцек аф кунара кармасть кемама Христости, сяс мес тяфтапне маштыхть ушедомс пряснон кепсема и улихть судендафт идемэвозть лаца.7Тейнза аф кемайхнень сельмоса улема пара лувксса, сяс мес кда аф стане, сон машты прамс визьксс и повомс идемэвозть курмозьс.

Кодамкс улема кемаень пуромксонь лездыти

8И пуромксонь лездыхненди тяконь лаца эряви улемс пара лувксса, аф улемс кафта шама мархта, а меколанкт, тейст улема виде ваймокс, винати аф прафтыкс и ярмакнень мельге аф панцикс.9Тейст эряви ванфнемс ару ваймовайгяльса кемамать салавашинц, конань смузенц тяни панжезе Шкайсь.10И тяфтапневок эрявихть инголи варжамс тевса, кда аф муворуфт, эста катк кармайхть улема лездыкс пуромксса.

11Тяфта жа аватненди эряви улемс пара лувксса, аф васькафникс ломанень лангс, кятавкс, сембоса валонь кирдикс.12Пуромксонь лездыти эряви улемс мирдекс фкя рьванди, цебярь алякс эсь шабанзонды и машты кудазоркс.13Кие цебярьста покодсь, ся ули содавикс-лувовикс и сон тиеви аф пеликс кемамаса Иисус Христости.

Кемамать салавашиц

14Тянь колга сёрмадан, надиямок курок самс тейть;15кда курок аф саван, тя сёрмастон тон содалить, кода эряви вятемс эсь пряцень Шкаень кудса, конац эряй Шкайть пуромксоц, и конань Сон тиезе нежекс и видешинь юркс.16И афкукс виде: минь кемаманьконь салавашиц инь оцю:
Шкайсь сась ломанень ронгса,
Иняру Ваймопожфсь няфтезе Сонь видексшинц,
Сонь няезь ангелхне;
Сонь колганза кулясь пачфтьфоль ломаньтналхненди,
Тейнза кемасть масторлангса,
и Сон иневалдса кепотьфоль менельти.


*а 3:11 Тяса корхтави пуромксонь лездыхнень рьваснон колга али ся аватнень колга, конат лездыхть кемаень пуромксса.


предыдущая глава Глава 3 следующая глава