Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ПАВЕЛОНЬ ВАСЕНЦЕ СЁРМАЦ ТИМОФЕЕНДИ

Глава 1

Шумбракстомась

1Павел, Иисус Христосонь апостолоц, конань тя тевти путозе Шкайсь, минь Идиеньке и Иисус Христос Азорсь, минь надияманьке,2кучи пара вал Тимофеенди, кемамать коряс афкуксонь цёрати. Улеза тейть пароказне, кельгозь ужяльдема и сетьмоши минь Шкай Аляньконь и Христос Иисус Азорть эзда!

Кардамат аф виде тонафтоматнень колга

3Македонияв тумстон мон мярьгонь тейть илядомс Ефесса и тоса кардамс кой-кона ломаттнень: катк аф пачфнихть лия тонафтомат,4и аф шарфнихть мяль ёфксненди и пефтома шачема юромонь лепненди. Синь вятнихть валса пялькстомас, и аф лездыхть тиендемс Шкайть мяленц коряс. Шкаень арьсефсь панжеви кемамать вельде.5Тя кошарксть вешфксоц – кельгомась, кона лиси ару седиста, цебярь-пара ваймовайгяльста и афкуксонь кемамаста.6Кой-конат шарфтсть семботь тянь эзда и ушедсть шавоста корхнема.7Синь ёрайхть улемс койти тонафтыкс, аньцек синць аф шарьхкодьсазь сянь, мезень колга корхтайхть, и сянь, мезе вииста кемокстайхть валсост.

8Минь содасаськ: койсь цебярь, кда сонь видеста нолясазь тевс.9И шарьхкодьсаськ: койсь апак макст видексшиса эряй ломанти, а максф коень колсихненди и койть каршек молихненди, Шкаень мяль аф ваныхненди и пежуфненди, тяфта жа сятненди, конатненди аш мезевок иняру, и сятненди, конат арьсихть аньцек тя эряфть колга, тядянь-алянь шавихненди, ломанень шавондыхненди,10усксевихненди, аля мархта утци алятненди, ломанень мишендихненди, васькафнихненди, максф валонь аф кирдихненди, и семботи, мезсь моли каршек цебярь-шумбра тонафтомати.11Тя тонафтомась кирдеви бславаф и иневалда Шкайть Пара кулясонза. Тя кулять пачфтеманц Шкайсь максозе тейне.

Сюконяма Шкайти кельгозь ужяльдеманкса

12Сюконян Христос Иисус Азороньконди, конац макссь тейне вий. Сюконян Тейнза, сяс мес Сон лувомань валонь кирдикс и путомань тевсонза покодикс,13монь, кона инголи сялтсезе Сонь лемонц, панцекшнезень и обжсезень Сонь ломанензон. Но монь кельгозь ужяльдемазь, сяс мес мон тиендине сянь, мезень колга ашень сода, улемок ся пингть кемамафтома.14Минь Азороньке козяста валозе лангозон Эсь пароказненц кемама и кельгома мархта Христос Иисусть вельде.15Ня валхне видет и синь эрявихть путомс седис: Иисус Христоссь сась масторлангти идемс пежуфнень, конатнень ёткста мон сембодонга пежусь.16Но монь, сембодонга пежуть, Шкайсь кельгозь ужяльдемань, сяс мес Сон ёрась няфтемс Эсь куватьс кирдемшканц. И тиемань монь кепотьксокс сятненди, кит кармайхть кемама Тейнза и сувайхть пефтома пингонь эряфти.17Пефтома пингонь Оцязорти, аф кулыти, аф няевити, фкя тяка смузю Шкайти – шнама и иневалда пефтома пингс! Аминь.

Вал Тимофеенди

18Тимофей цёрай, тя кошардомать мон максса тейть ся пророчестватнень коряс, конат инголи тонь колгат азфтольхть, и сяс, ваномок синь лангозост, вятть цебярь тюрема,19ванфнемок кемамацень и ару ваймовайгяльцень. Кой-конат сонь юмафтозь и кемамасна лазовсь, кода лазови венчсь, мзярда цяподи оцю кевти.20Синь ётксост Именей Александронь мархта, конатнень мон максыне Сатанати, пади лоткайхть Шкайть лемонц сялдома.


предыдущая глава Глава 1 следующая глава