Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ПАВЕЛОНЬ ОМБОЦЕ СЁРМАЦ ФЕССАЛОНИКА ОШЕНЬ КЕМАЙХНЕНДИ

Глава 3

Озондода инксонк!

1И мекольцесь, кемай ялгат, озондода инксонк! Катк Азорть валоц курокста келеми и ули шнаф сембе вастова, кода и тинь ётксонтка.2Озондода сянксонга, катк Шкайсь мяньфтсамазь минь аф пчкяй и кальдяв ломаньда, вдь аф сембе кемайхть.3Но Азорть лангс ули кода надиямс: Сон кемокстатядязь и ванфттядязь тинь Кальдявть эзда.4Минь Азорть эса кемоста надиятама лангозонт: тинь тиендьсасть и сяда товга карматада тиендемонза сянь, мезенди минь эсонт кошарттама.5Катк ина Азорсь ладясыне тинь седиентень Шкаень кельгомати и Христость кирдемшканцты.

Кардамат нолашинь эряфть колга

6Кемай ялгат, Иисус Христос Азороньконь лемса мярьктяма тейнть: кирдевода ширеса эрь кемай ялгать эзда, кона тевфтома ётафнесы пингонц и аф тиенди ся тонафтомать коряс, конань тинь сявость минь эздонк.7Тинь тинць содасасть, тейнть эряви тиендемс минь лацонк. Минь ашеме ащекшне ширесонт тевфтома8и стак киньге кшидонза ашеме ярхца. Минь пелеме арамс тейнть сталмокс, сяс шинек-венек стакаста покодезь апак лотксек тиеме тев.9И сембось тя ёфси аф сяс, мес ашель тянди азорксшиньке, аф, минь тяфта ёраме няфтемс тейнть, кодамкс эряви улемс.10И нинге ширесонт улемста минь кошардодязь: кинь аш мялец покодемс, ся катк аф ярхцай!11А тяни минь кульсаськ: ётксонт улихть нола ломатть, конат покодемска аф покодихть, но эцекшнесазь нярьснон лиятнень тевс.12Тяфтама ломаттнень минь кошардсаськ и кемокстасаськ Иисус Христос Азороньконь лемса сетьмоста покодемс и эстейст трямс пряснон.13А тинь, кемай ялгат, стаки тиесть эсь пара тевонтень, тяда макссе пря сиземати.

14Кда кие-бди аф кулхцондсы сянь, мезе минь сёрмадоме тя сёрмасонк, ся ломанть сявость мяльс и тяда корхта мархтонза, катк сргози визьксоц.15Но тясть лува тя ломанть душманкс, а кода кемай ялганди лездода арамс видексшинь ки лангс.

Мекольце валхне

16Катк Сонць Азорсь, сетьмошинь лихтибрясь, максы тейнть сетьмоши фалу и сембоса! Улеза Азорсь сембонь тинь мархтонт!17Пара вал монь эздон – тянь сёрмадса эсь кядьсон, тяфта мон тяштькснеса эрь сёрмазень – Павел.

18Иисус Христос Азороньконь пароказнец улеза сембонь тинь мархтонт! Аминь.


предыдущая глава Глава 3 следующая глава