Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ПАВЕЛОНЬ ВАСЕНЦЕ СЁРМАЦ ФЕССАЛОНИКА ОШЕНЬ КЕМАЙХНЕНДИ

Глава 5

Уледа анокт Азорть саманцты

1Кемай ялгат, аш мезенди сёрмадомс тейнть ня пинкнень и ладяф шитнень колга.2Вдь тинь тинць пяк лац содасасть, Азорть шиц сай апак учсек, кода салайсь веть.3Мзярда ломаттне кармайхть корхтама: «Сембе вастова сетьмоши и аш мезьда пелемс!» – эста синь апак учентт сатсыне юмамась, кода шачфтомась сатнесы авать, и кивок аф ворьгодеви.4Но тинь, кемай ялгат, аф шобдашисотада, и ся шись аф саттядязь тинь апак учент, салай лаца.5Вдь сембе тинь – валдть и шить иденза. Минь аф веннетяма и аф шобданнетяма,6сяс, эрьда аф карматама удома, кода лиятне! Ульхтяма сргозьфт и анокт!7Вдь удыхне удыхть веть, и симилатне симондихть веть.8А минь, шивалдонь иттне, ульхтяма кятафт: щасаськ эсь лангозонк ваксарщам лаца кемамать и кельгомать, и прязонк такия лаца путсаськ надиямать идеманьконь лангс!9Сяс мес Шкайсь ладямазь минь аф кяжень пандоманди, а идеманди, кона максови тейнек Иисус Христос Азороньконь вельде.10Христос кулось минь инксонк, сяс мес Сонь мялец, аф ваномок сянь лангс шисотама минь али куломе, эрялеме Сонь мархтонза.11Сяс кемокстада фкя-фкянь и касфтода-кеподеда фкя-фкянь, мезе тинь и тиенттяда.

Тонафтомат кемаень пуромксти

12Эняльттяма тейнть, кемай ялгат: кирдесть пара лувксса сятнень, кит седиге покодихть тинь ётксонт, кит вятихть эсонт Азорть лемса, и путыхть эсонт виде кис.13Кельгость и лувость синь пяк питникс ся тевть инкса, конань синь тисазь. Ладяда фкя-фкянь мархта.

14Кемай ялгат, минь эняльттяма тейнть: нолатнень путнесть ёньц, пелихнень кемокстасть, лафчненди уледа нежекс, сембонь мархта сатфтость кирдемшкантень.15Ванода, кивок тинь ёткстонт афоль панда кяж кяженкса, меколанкт, фалу эряскодода тиемс пара – кода фкя-фкянди, стане сембе лядыхнендивок.

16Фалу кеняртькшнеда,17апак лотксек озондода,18сембонкса сюконяда, сяс мес тяфтама Шкайть мялец тейнть, Иисус Христости кемайхненди.19Шкаень Ваймопожфть толонц тясть матне,20пророчестватнень тясть лув шавокс,21но семботь лацкас ваность-варжасть; и мезсь цебярь, сянь ванфтость.22Кирдеда пря эрь кодама кяжда.

Мекольце валхне

23Катк Сонць Шкайсь, сетьмошинь лихтибрясь, иняруяфттядязь тинь марнек. И катк сембось тинь эсонт: ваймопожфське, ваймоське, ронгське – ванфтовихть аруста Иисус Христос Азороньконь мрдаманцты.24Кирдьсы валонц Ся, кие эсонт терди, и Сон тисы тянь!

25Кемай ялгат, озондода минь инксонк!26Шумбракснеда сембе кемай ялгатнень мархта иняру паламаса.27Азорть лемса тейнть мярьган, лувость тя сёрмать сембе иняру кемай ялганьконди.

28Иисус Христос Азороньконь пароказнец улеза тинь мархтонт! Аминь.


предыдущая глава Глава 5 следующая глава