Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ПАВЕЛОНЬ ВАСЕНЦЕ СЁРМАЦ ФЕССАЛОНИКА ОШЕНЬ КЕМАЙХНЕНДИ

Глава 4

Шкайть мяленц коряс эрямась

1И нинге, кемай ялгат, тинь тонадоде минь эздонк, кода эрямс и улемс Шкаень мялень ваныкс, и тинь тяфта эрятада. Христос Иисусонь лемса эняльттяма тейнть и терттяма эсонт: касода тянь эса сяда товга.2Вдь тинь содасасть, кодама кошардомат минь максоме тейнть Иисус Азорть эзда.3Шкайть мялец тяфтама: эряледе тинь инярушиса и ванфтолесть прянтень усксевомада.4Катк эрсь азорондай эсь ронгонц лангса, ванфтсы сонь инярушиса и пара лувксса,5и аф моли эсь визьксонь мялензон-арьсеманзон мельге, кода тиендихть Шкаень аф содай лия ломаньтналхне.6Тя тевса кивок тяза тиенде пеже эсь кемай ялганц каршес и тяза путне сельме сянь лангс, мезсь аф сонне, а кемай ялгать. Семботь тянь инкса Шкайсь кармай пандома кяжса. Минь ни корхнеме тейнть тянь колга и кемоста кардаме тяфта тиендемда.7Шкайсь тердемазь минь эрямс инярушиса, а аф рдазса.8Тяфта, кие шарфты тя тонафтомать эзда, ся аф ломанть эзда шарфты, а Шкайть, кона максозе тейнек Эсь Иняру Ваймопожфонц.

9Кемай ялгань кельгомать колга тейнть аф эряви сёрмадомс, сяс мес Сонць Шкайсь тинь тонафтодязь фкя-фкянь кельгома.10Тинь тяфта и тиенттяда сембе кемай ялганьконь мархта марнек Македонияса. Но минь эняльттяма тейнть, кемай ялгат: нинге сядонга пяк кельгода фкя-фкянь.11Тяряфтода эрямс сетьмошиса сембе ломаттнень мархта. Катк эрсь тиендьсы эсь тевонц и эсь кятть трясы прянц, кода минь тинь кошярядязь.12Эста аф кемайхневок кармайхть лувомонт тинь видеста эряйкс и тинь мезьсовок аф карматада содама афсатыкс.

Азорть самац

13Кемай ялгат, монь мялезе азондомс тейнть сянь, мезе ули кулофнень мархта: афоледе ризна сятнень лаца, конатнень аш надиямасна.14Вдь кда минь кематама тянди: Иисус кулось и вельмась кулофнень эзда, эста минь кематама тяндинге: сятнень, кит кулость Иисусти кемазь, Шкайсь мрдафтсыне эряфти Иисусонь мархта.15Минь корхтатама тейнть Азорть валса: минь, Азорть самс шиса лятфне, аф ингольдасаськ кулофнень.16Вдь мзярда кайгозеви кошардомань валсь и архангелть вайгялец, и мзярда торазеви Шкаень торамась, и Сонць Азорсь валги менельста, эста васенда вельмайхть сят, кит кулость Христости кемазь,17а сяльде минь, эряйхне, мархтост марса сявофтама ковол лангса кожфса Азорть васьфтемонза, и тяфта минь ульхтяма Азорть мархта фалу.18Сяс, ваймафнеда-кемокстакшнеда фкя-фкянь ня валхнень вельде.


предыдущая глава Глава 4 следующая глава