Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ПАВЕЛОНЬ СЁРМАЦ КОЛОССЫ ОШЕНЬ КЕМАЙХНЕНДИ

Глава 1

Шумбракстомась

1Павел, Шкайть мяленц коряс Иисус Христосонь апостолоц, и Тимофей, кемай ялганьке,2кучихть пара вал Колоссынь иняру ломаттненди, минь кемай ялганьконди, конат ванфнесазь эсь кемамаснон Иисус Христости.3Улеза тейнть пароказне и сетьмоши Шкайть, минь Аляньконь эзда и Иисус Христос Азорть эзда!

Павел сюконяй Шкайти

Минь эсь озондомасонк фалу сюконякшнетяма инксонт Шкайти, Иисус Христос Азороньконь Алянцты,4сяс мес кулеськ тинь кемамантень колга Христос Иисусти и кельгомантень колга сембе иняру ломаттненди.5Тинь эсонт ули тя кемамась и кельгомась, сяс мес тинь надиятада сянь лангс, мезе аноклаф тейнть менельса. Тя надиямать колга тинь ни куледе, мзярда тейнть азондозь видешинь валть, лиякс Пара кулять,6кона тяни пачкодсь тейнть. Тя кулясь келеми и канды цебярь имошт сембе масторга. Сон тинь ётксонтка касы и канды имошт ушедомок ся шиста, мзярда тинь кулесть сонь и шарьхкодесть Шкаень пароказнеть тяфтамкс, кодама сон афкукс ули.7Тя кулять тинь марясть кельгома Епафрас ялганьконь эзда, кона валонь кирдезь покоди Христости фкя сяка тевса монь мархтон: тейнть паронь кандомаса.8Сон азондсь тейнек тинь кельгомантень колга, конань тейнть казезе Иняру Ваймопожфсь.

9Вага мес миньге, ушедомок ся шиста, мзярда кулеськ тянь, аф лотксетяма озонкшнемс тинь инксонт. Минь эняльттяма Шкайти пяшкодемс тинь ваймопожфонь шарьхкодемаса и смузьшиса, конатнень вельде тинь крхкаста кармаледе содамонза Шкайть мяленц,10эняльттяма: улель тинь эряфонте Шкаень лемть шнаманкса, сембоса тиенделеде Сонь мяленц коряс, и эрь кодама пара тевонте кандоль цебярь имож и касоледе Шкайть содамаса.11Катк Сонь иневалдонь виец и сембомаштомац кемокстатядязь тинь, максы тейнть куватьс кирдемшка и вийхть ётамс сембе стакашитнень.12Кеняртькс потмоса сюконяда Шкай Аляти, кона макссь тейнек сявомс аноклаф казнеть: улеза миньге пяльксоньке Сонь иняру ломанензон ёткса валдонь Оцязорксшиса.

Христос и Сонь покодемац

13Шкайсь идемазь минь шобдать азорксшинц алда и сувафтомазь кельгома Цёранц Оцязорксшизонза.14Цёрать веронц вельде минь нолдамазь воляшис, лиякс мярьгомс, минь пеженьке нолдафт.15Христос Эсь эсьсонза няфнесы аф няеви Шкайть. Сон васень Цёрась, кона ащи Шкайть сембе тифонц лангса.16Сонь вельденза тиф сембось, мезе менельса и мода лангса, мезе няеви и мезе аф няеви, лиякс мярьгомс, сембе аф няеви ваймопожфонь оцязорхнень и оцязоронь озама васттнень, оцюнятнень и вийхнень – сембось Сонь вельденза и Тейнза тиф.17Сон ни ульсь сембода инголе, и сембось кирди марса Сонь вельденза.18Сон – ронгти пря, лиякс мярьгомс, кемаень пуромксти. Сон ушеткссь и васенцесь, кие вельмась кулофнень эзда, и сяс Сон сембоса васенцесь.

19Вдь Шкайть мялецоль: эряль-ащель Шкаень сембе пяшксешись Цёрать эса.20Тяфта жа Шкайть мялецоль Цёрать вельде мирендафтомс Эсь мархтонза семботь, и Сонь крёз лангса валф версонза кандомс сетьмоши семботи, мезе мода лангса и менельса.

21Тиньге инголи эсь кальдяв тевонтень инкса уледе ичкозденнекс Шкайти и моледе каршек Тейнза.22Но тяни Сон мирендафтодязь тинь Эсь мархтонза Цёрать модалангонь ронгонц куломанц вельде, сяс мес мялец путомс тинь Эсь инголенза инярукс, афсатыксфтомокс и аф муворукс.23Аньцек тейнть сяда товга эряви кемоста ащемс кемамаса и аф тушендомс Пара кулянь надиямать эзда, конань тинь кулесть. Тя Пара кулясь ульсь пачфтьф масторлангонь сембе ломаттненди. И тя Куляти мон, Павел, арань покодикс.

Павелонь покодемац

24Тяни мон кеняртькшнян сянди, мес тинь инксонт кирдян маятамат. Мон эсь ронгозень вельде пяшкотькшнеса сянь, мезе нинге аф сатни Христость маятамасонза. Тянь мон тиса Сонь ронгонц инкса, лиякс мярьгомс, кемаень пуромксть инкса.25Мон арань кемаень пуромксонь покодикс Шкайть ся арьсефонц коряс, конань Сон максозе тейне тиемс. Сон кошардомань монь пачфтемс тейнть педа-пес Шкаень валть,26салавашить, кона кунардонь пингста кяшфоль ломаттнень эзда, но конань тяни Сон панжезе Эсь иняру ломанензонды.27Шкайть мялецоль панжемс тейст, конашкава оцю и козя салавашить иневалдоц лия ломаньтналхненди. Тя салавашись вага мезьса: Христоссь тинь эсонт и Сон – тинь надияманте сай пингонь иневалдти.28Минь пачфнесаськ Христость колга Кулять, путнетяма ёньц и тонафттама эрь ломанть эса. Минь нолясаськ тевс сембе смузьшить, сяс мес надиятама тиемс эрть афсатыксфтомокс Христос Иисусса.29Тянкса мон пильголангста прамс покодян и вятян тюрема Христость вийсонза, кона пяк вииста покоди монь эсон.


предыдущая глава Глава 1 следующая глава