Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ПАВЕЛОНЬ СЁРМАЦ ФИЛИППА ОШЕНЬ КЕМАЙХНЕНДИ

Глава 3

Сембода питнись – тя Христость содамац

1Нинге, кемай ялгане, кеняртькшнеда Азорса! Тейне аф стака тяконь колга тага весть тяштемс, а тинь тянь вельде ульхтяда аралафт лама зиянда.

2Ванфтода пря пинеда, ся васькафни тонафтыда, конат тиендихть кальдяв тефт и киськопень керфтомать вельде керсесазь-гаснесазь алятнень ронгснон!3Вдь афкуксонь керфне – тя минь, сяс мес минь сюконятама-покоттяма Шкайти Иняру Ваймопожфса, шнафттама пря Христос Иисусса и аф надиятама ломанень обуцятнень лангс.4А вага мон маштолень надиямс ломанень обуцятненьге лангс. Кда кие арьси, бта сонь улихть туфталонза надиямс ломанень обуцятнень лангс, азса, монь тяфтама туфталдон сяда лама.5Мон керфан кафксоце шиня, шачемас коре Израилень ломанян, Вениаминонь юромста, верс коря – ару евреян. Мон улемок фарисейкс, эрянь аньцяйняньбес койть тонафтоманц коряс,6мон оцю мяльса ёрань покодемс Шкайти и сяс улень кемаень пуромксонь панцикс, койть видексшинц коряс улень афсатыксфтомокс.7Мон семботь тянь лувондыне пяк питникс, но тяни Христость инкса лувса прокс шавокс, и мянь зиянкс.8Мон афкукс семботь лувса шавокс, сяс мес Христос Иисус Азорозень содаманц мон лувса сембодонга питникс. Сонь инксонза мон юмафтыне семботь – и тянь семботь мон лувса прокс аф эрявиксокс, сяс мес мялезе сатомс Христость.9Монь мялезе улемс марнек Христость эса и аф эсь видексшизень мархта, кона койть эзда, аф, а ся видексшить мархта, кона максови тейнек Христости кемамать вельде и конань Шкайсь макссы сятненди, кит кемайхть Тейнза.10Монь мялезе содамс Христость и ся вийть, кона вельмафтозе Сонь кулофнень эзда; и мялезе явомс мархтонза маятаманзон и арамс лацонза Сонь куломасонза.11Эста кармай улема надиямазе: кода-бди монга сатса кулофнень эзда вельмамать.

Пефтома эряфонь сатомась

12Тяфта корхтан аф сяс, бта мон ни сатыне тянь семботь али арань афсатыксфтомокс. Но мон сембе вийсон ласькан, ёран сатомс сянь, мезенкса Христос Иисусовок сатомань монь.13Кемай ялгат, мон аф арьсян стане, бта мон ни сатыне семботь, мезе аноклась тейне Христоссь. Мон, юкснемок сянь, мезе илядсь фталу, эряскодан сянди, мезе инголе.14Мон сембе вийсон ласькан ся вастти, коса аделави монь ласькомазе и коса тейне максови казне. Тя казнесь – менелень эряф, конанди тердемазь Шкайсь Христос Иисусть вельде.15Сяс тейнек, кемамаса кенерьф ломаттненди, эряви тянь лаца арьсемс. А кда мезьса лиякс арьсетяда, сяньге панчсы тейнть Шкайсь.16Сяс мезенди минь пачкодеме кемамасонк, сянь коряс сяда товга карматама эряма.

17Кемай ялгат, тиендеда сембе монь лацон и ванода сятнень лангс, кит тиендихть кепотькс коре, кона ули минь эсонк.18Вдь ламотне, конатнень колга мон сидеста корхнень тейнть, а тяни нльне сельмоведь мархта корхтан, эряйхть-ащихть Христость крёзонц каршек.19Синь песна – адса, синь шкайсна – пексна, синь прянь шнамасна – визьксшиса и синь арьсихть аньцек тя масторлангонь тефнень колга.20А минь эряма вастоньке – менельса, тоста минь учсаськ Идить, Иисус Христос Азорть.21Сон Эсь вийсонза полафтсыне минь кулы и лафча ронгоньконь, и синь арайхть Сонь иневалдонь ронгонц лаца. Тя вийть вельде Сон машты путомс семботь Эсь кядялонза.


*а 3:2 Тяса корхтави ся васькафни тонафтыхнень колга, конат кошярясазь кемамати саф алятнень евреень койть коряс керсемс алянь ронгть киськопенц и корхтайхть, кле тянь вельде максови афкуксонь видексшись.


предыдущая глава Глава 3 следующая глава