Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ПАВЕЛОНЬ СЁРМАЦ ЕФЕС ОШЕНЬ КЕМАЙХНЕНДИ

4 Глава

Кемаень пуромксть марстоньшиц

1Тяфта мон, Азорть инкса пякстафсь, эняльдян тейнть: эряда тердемать питненц коряс, конаса тинь тердедязь Шкайсь.2Уледа фалу сятявкс, лямбе седикс, улеза куватьс кирдемшканте. Кельгозь кирдеда фкя-фкянь.3Сембе вийса, ладямань сотксть вельде, варжасть ванфтомс Ваймопожфть марстоньшинц.4Ули аньцек фкя ронга и фкя Ваймопожф, кода ули и фкя-тяка надияма, конанди тердедязь Шкайсь;5ули фкя Азор, фкя кемама, фкя кстиндама,6фкя Шкай и сембонь Алясна, кона ули семботь вельхксса, семботь вельде и семботь эса.

7Но эрти минь эздонк максфоль пароказнесь Христость казненц ункстаманц коряс.8Сяс Сёрматфксса корхтави:
«Сон кеподсь вяри
и вятезень Эсь мархтонза пленц повфнень,
и макссь ломаттненди казнет».

9А мезе стамсь «кеподсь»? Тя корхтай сянь колга: Сон тяда инголе валгсь ни модань сембодонга алдонь васттненди.10Ся, кона валгсь, тяфта жа и кеподсь сембе менельда вяри и сяс Сон маштоль пяшкодемс Эсь мархтонза семботь.11Сон макссь улемс кинди апостолкс, кинди прорококс, кинди Пара кулянь кандыкс, кинди кемаень пуромксть мельге ваныкс и тонафтыкс.12Тянь вельде Сон анокласыне иняруфнень лездомс ломаттненди Христость ронгонц касфтоманц-кемокстаманц инкса,13мзярс минь сембе аф пачкоттяма фкя-сяка кемамати и Шкаень Цёрать крхкаста шарьхкодеманцты, и мзярс аф аратама Христость лаца кенерьф и афсатыксфтома ломанькс.14Эста минь ни аф ульхтяма пиже иднякс, конатнень кодама-повсь тонафтомась ведькомболкс и варма лаца усксыне эсь мельганза, и конатнень ёжу ломаттне васькафнесазь-эрьготьфнесазь.15Меколанкт, тейнек эряви кельгозь азонкшнемс видешить. Эста сембоса карматама кеподема-касома Тейнза, Христости, кона ащи прякс.16Сонь вельденза сембе ронгсь сотови и кирдеви марса эрь кодама соткс вельде. Мзярда эрь пялькссь тиендьсы эсь тевонц, эста сембе ронгсь касы и виензави кельгомать вельде.

Ташта и од ломань

17Сяс, мон корхтан и Азорть лемсонза кардан: оду тяда эря стане, кода лия ломаньтналхне эряйхть эсь шава мяльснон коряс.18Синь шарьхкодемасна шобдалгодсь, синь аертфт Шкаень эряфть эзда эсь аф содамошиснон и казяма седиснон инкса.19Синь мезьсонга аф содайхть визькс, сяс прасть ронгонь туткотксшис сяшкава, мянь аф топафневозь тиендьсазь эсь аф ару тевснон.20Но тейнть максфоль прокс аф тяфтама тонафтома Христость колга.21Тинь афкукс куледе Сонь колганза и Сонь эздонза тонадоде, вдь видешись Иисусть эса.22Тинь тонафтодязь кадомс ингольдень эряфть ташта ломанть коряс, кона наксаткшни васькафни мяльхнень вельде.23Тейнть эряви одкстоптомс ваймопожфонтень и ёнентень24и щамс эсь лангозонт од ломань, кона тиф Шкайть коряс, афкуксонь видексшиса и инярушиса.

25Сяс лоткада васькафнемда и эрсь корхнеза видеть эсь маластоненцты, вдь сембе минь – фкя ронгть пяльксонза.26Кяжиямста тяда пра пежес. Мирендада шить валгомда инголе27и тяда макссе васта идемэвозти.28Кие салсесь, оду тяза салсе, а катк цебярьста покоди эсь кядензон мархта, и улеза сонь мезьста максомс сянди, кие эряй ашушиса.29Тяза лисе кургстонт кодамовок наксада вал, а аньцек цебярь валхт, конат лездыхть кемамать касоманцты и кандыхть пара кулхцондыти.30И тясть пичефте Шкайть Иняру Ваймопожфонц, конаса тинь тяштькстафтада Шкаень ломанькс идемань шить самс.31Кадость эрь кодама кяжень кирдемать и пяляскодомать, кяжть и пешкодомать, ломанень сялдомать эрь кодама кяж мархта.32Уледа фкя-фкянди ляпе седикс, лиянь сярятьфонь маряйкс, нолнесть фкя-фкянди пежентень, кода и Шкайсь Христосса нолдазень тинь пежентень.


*а 4:8 Псалтирь 67:19


предыдущая глава Глава 4 следующая глава