Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ПАВЕЛОНЬ СЁРМАЦ ГАЛАТИЯНЬ КЕМАЙХНЕНДИ

Глава 3

Койть коряс тефне али кемамась?

1Галатиянь ёньфтома ломатть! Кие тяшкава сельмодедязь, нльне тинь араде аф кулхцондыкс видешити? Вдь тинь эсь сельмосонт няесть крёзти эськотьф Иисус Христость, мзярда кулхцондость монь азксозень Пара кулять колга!2Мон ёран кизефтемс тинь фкянь колга: Шкаень Ваймопожфсь максфоль тейнть сянкса, мес тинь тиендеде койть коряс али сянкса, мес кулхцондость Пара кулять и кемаде?3Кали тинь тяшкава ёньфтомотада, мес ушедость Ваймопожфонь вийса, а тяни аделсесасть эсь вийсонт?4И сембось ся, мезе тинь кирдеде, ётась стакащемда? Аш кода тянди улемс!5Кода арьсетяда, Шкайсь кази тейнть Ваймопожф и тиенди ётксонт дивань тефт сяс, мес тинь тиенттяда койть кошардоманзон коряс? Афоли сяс, мес тинь кулесть Пара кулять и кемаде?6Вага, Авраамонь колга тяштьф Сёрматфксса: «Сон кемась Шкайти, и тянкса Шкайсь лувозе сонь видексшинь ломанькс».7Сяс содасть: Авраамонди идькс лувовихть сят, кит кемайхть.8Сёрматфкссь ни аноконди содазе: Шкайсь лувсыне сембе ломаньтналхнень видексшиса эряйкс синь кемамаснон инкса. Вдь Шкайсь аноконди азозе Авраамонди: «Тонь вельдет улихть бславафт сембе ломаньтналхне».9Лисенди, кемайхне бслававихть Авраамонь мархта, кона ульсь кемайкс.10А сембонь сятнень, кит нежетькшнихть койть коряс тиф тефнень лангс, учсыне сюдома. Вдь Сёрматфксса азф: «Сюдови эрь ломанць, кона аф пяшкодьсы семботь, мезе сёрматф коень книгаса».11Койть вельде Шкайсь киньге аф лувсы видексшинь ломанькс, вдь тянь колга шарьхкодевиста корхтай Сёрматфкссь: «Видексшинь ломанць кармай эряма кемамать вельде».12А койть юрса ащи аф кемамась, вдь эсонза азф: «Ся, кие пяшкодьсыне койть сембе кошардоманзон, кармай эряма синь вельдест».13Христос минь нолдамазь койть сюдоманц эзда. Сон минь вастозонк сявозе тя сюдомать Эсь лангозонза. Тя азф Сёрматфксса: «Сюдоф эрсь, кие повфтаф шуфтти».14Сембось тя ульсь сянкса: Христос Иисусонь вельде пачфтеволь лия ломаньтналхненди ся бславамась, кона надияфтфоль Авраамонди, и Шкайсь минь кемаманьконь вельде максолезе тейнек надияфтф Ваймопожфть.

Койсь аф машты полафтомс Шкайть надияфтоманц

15Кемай ялгат, кепотьксонди мон сяван стакшинь тев. Кда уликс-паронь кадомать колга кошаркссь кемокстаф ломанень кядьса, эста тя кошаркссь киндинге ни аф полафтови и лия мезевок эзонза ни аф путови.16Ина Авраамонди и сонь юромонь поладыенцты Шкайсь макссь надияфтомат. Сёрматфксса азф аф «юромонь поладыензонды», а «поладыенцты», аф ламотненди, а фкяти. А тя фкясь – тя Христос.17Тянь вельде мон ёран азомс: койсь, кона эвондась ниле сятт колмогемонь кизода меле, аф машты полафтомс сотксть, конань Шкайсь инголи кемокстазе Авраамонь мархта, и аф машты нардамс Шкайть эзда максф надияфтомать.18Кда Шкайть эзда аноклаф уликс-парось макссеволь койть коряс, эста сон афоль максов надияфтомать коряс. Ина Авраамонди Шкайсь максозе Эсь уликс-паронц надияфтомать коряс.

Койсь няфтьсы пежеть и вяти Христости

19Эста мезенди эряви койсь? Сон ладяфоль меле коень коламатнень сюнеда, и вийсонза ульсь ся пингс, мзярс ашезь са Авраамонь юромонь поладыец, конань колга максфоль надияфтомась. Койсь максфоль-ладяфоль ангелхнень вельде, а меле Моисей, Шкайть и ломаттнень ёткса тевонь якафтысь, максозе сонь евреень ломаньтналти.20Виде, тевонь якафты аф эряви, мзярда ули аньцек фкя соткссонь тии, а Шкайсь ськамонза!

21Лисенди, койсь ащи каршек Шкаень надияфтоматненди? Прокс аф! Кда максоволь кой, кона казель эряф, эста видексшись афкукс максоволь койть вельде.22Но Сёрматфкссь корхтай: сембе ломаттне пежеть кядялот. Лисенди, надияфтомась максови аньцек кемамать вельде Иисус Христости и аньцек сятненди, кит кемайхть.

23Кемамать самс койсь минь кирдемазь пякстафста и ваномазь ся пингс, мзярс ашезь панжев кемамась.24Койсь ульсь тейнек касфтыкс-тонафтыкс Христость самс: аралеме видексшинь ломанькс кемамать вельде.25Но тяни кемамась ни сась и минь лисеме касфтыть-тонафтыть азорксшинц алда.

Шкаень итть

26Тяфта, сембе тинь араде Шкаень идькс Христос Иисусонди кемамать вельде.27Сембе тинь, Христосса кстиндафне, Христосса щаде, лиякс, араде Христость лаца.28И аш тяни аф еврей, аф лия тналонь ломань; аф уре, аф воляшистонь; аф аля, аф ава, сяс мес сембе тинь сотоводе фкя-фкянь мархта и тиеводе кода фкя ломань Христос Иисусонь эса.29А кда тинь Христосоннетяда, лисенди, тинь Авраамонь полатксонза и тейнть максови ся, мезть Шкайсь надияфтозе Авраамонди.


*а 3:15 уликс-паронь кадомать колга кошаркс – завещание

*б 3:19 тевонь якафты – ходатай


предыдущая глава Глава 3 следующая глава