Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ПАВЕЛОНЬ ОМБОЦЕ СЁРМАЦ КОРИНФ ОШЕНЬ КЕМАЙХНЕНДИ

Глава 8

Лезкс Иерусалимонь кемайхненди

1Кемай ялгат, минь мяленьке: содалесть тинь, кодама пароказне Шкайсь макссь Македониянь кемаень пуромксненди.2Хуш синь улендсть варчсефт лама стакашиса, сембе сяка синь седисна пяшкотьфтольхть кенярдемада, и прокс ашушиса эрязь, синь ульсть анокт козяста лездомс лиятненди.3Мон няине и азса тейнть: синь макссть тейнек эсь вийснон коряс и мянь сяда лама. Эсь пара мяльснон коряс4синь синць пшкядсть тейнек и пяк эняльдезь корхтасть: синьге ули мяльсна лездомс лия кемайхнень мархта Иерусалимонь кемайхненди.5Но синь тисть сяда лама сянь коряс, мезе минь учендоме; мянь максозь эсь пряснон, васенда Азорти, а сямольде тейнек, Шкайть мяленц коряс.6Сяс минь эняльдеме Титонди педа-пес аделамс тя лездомань пара тевть, конань сон ушедозе тинь ширесонт.7Тинь сембоса вельф козятада: кемамаса и корхтамаса, и содамошиса, и эрь кодама седиень путомаса, и тейнек кельгомаса. Сяс тя лездомань пара тевсонга уледа вельф козяста максыкс.

8Мон тянди аф кошардан, но азондомок кода лиятне путозь тянь инкса эсь седиснон, мон ёран содамс, афкуксонь тинь кельгоманте али аф.9Тинь вдь содасасть, конашкава оцю Иисус Христос Азороньконь пароказнец: Сон улемок козя, тинь инксонт арась ашукс, сяс мес мялецоль Эсь ашушинц вельде козякофтомс тинь.

10Мон азса тейнть эсь мялезень тя лездомань тевть кувалма: тейнть сяда пара улель тяни шумордамс тя тевть, конань тинь ушедость нинге ётай кизоть. Вдь тинь сонь аф аньцек васенцекс ушедость тиемонза, тинь сонь васенцекс и арьсесть.11А тяни шумордасть тя тевть сяка аноксшиса, кона ульсь сонь арьсемстонза, и стане лац, кода саты тинь виенте.12Кда ули аноксши максомс, эста Шкайсь пара мяльса сявсы максф казнеть. Вдь Шкайсь учи сянь, мезе ули, а аф сянь, мезе аш.13Корхтамась моли аф сянь колга, бта мон ёран тёждялгофтомс лиятнень эряфснон, путомок сталмоть тинь лангозонт. Аф! Монь мялезе: эряледе сембе фкя лаца цебярьста.14Тяни тейнть ули кода вельф уликсонтень эзда пяшкодемс синь афсатыксснон. А мзярда синь кармай улема вельф уликссна, синь пяшкодьсазь тинь афсатыксонтень. Тянь вельде сембе кармайхть эряма фкя лаца цебярьста.15Кода корхтави Сёрматфксса:
«Кие кочкась лама, сянь ашель вельфоц,
и кржа кочкайсь ашезь сода афсатыкс».

Павел азонды Титонь и тейнза лездыхнень колга

16Сюконяма Шкайти, кона крьвястезе Титонь седиса тинь инксонт сяка лездомань мяльть, кона палы миньге седисонк.17Сонь седиец палы тинь инксонт, и сяс сон моли тинь ширезонт эсь мяленц коряс, а аф аньцек минь эняльдеманьконь коряс.18Сонь мархтонза минь кучсаськ кемай ялганьконь, кона сембе кемаень пуромксова шнави Пара кулянь кандоманкса.19Тяда башка, кемаень пуромксне кочказь сонь молемс минь мархтонк и лездомс тейнек тя пара тевса, конаса минь покоттяма Азороньконь лемонц кеподеманкса и тинь лездомань мялентень няфтеманкса.20Минь аш мяленьке макссемс ломаттненди туфталхт апрякамс минь сянкса: кода и мезе тиенттяма тяфтама оцю казьф ярмакнень мархта.21Вдь минь ваттама сянь мельге: сембось улель кода эряви аф аньцек Азорть сельминголенза, но ломаттнень сельминголестка.

22Ня кафттнень мархта минь кучсаськ тейнть нинге фкя кемай ялгать. Минь лама тевса аф весть варжаськ сонь и няеськ сонь седиень путоманц. А тяни сон нинге сядонга пяк седиень путозь ащи, сяс мес кемоста надияй лангозонт.23Кда корхтамс Титонь колга, азса, сон монь фкя тевонь ялгазе и покоди мархтон сембоса, мезсь сотф тинь мархтонт. Лия кафта кемай ялгатне – тя кемаень пуромкснень эзда кучфне, синь кандыхть Христости шнама.24Сяс тяни тевса няфтесть тейст эсь кельгомантень. Катк сембе кемаень пуромксне содасазь: минь аф стак шнафттама пря мархтонт.


*а 8:15 2 Моисея 16:18<


предыдущая глава Глава 8 следующая глава