Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ПАВЕЛОНЬ ВАСЕНЦЕ СЁРМАЦ КОРИНФ ОШЕНЬ КЕМАЙХНЕНДИ

Глава 16

Ярмаконь кочкамась Иерусалимонь кемайхненди

1Тяни сёрмадан тейнть ярмаконь лезксть колга, кона кочксеви Иерусалимонь кемайхненди: тиньге тиендеда тяфта, кода мон мярьгонь тиендемс Галатиянь кемаень пуромксова.2Недялять васенце шистонза катк эрсь тинь эздонт путни ярмак башка, мзяра путови, и ванфтсы самозон. Эста монь самстон, аф эряви ни кочксемс ярмакт.3А мзярда саян, мон кучсайне Иерусалиму лезксонтень кандома ся ломаттнень, конатнень тинь кочкасасть, и максан кядезост содафтомань-кемокстамань сёрмат.4Кда эрявксты тейненге тоза молемс, эста минь мольхтяма марса.

Ичкоздень якамать колга арьсематне

5Мон саян тейнть, мзярда ётаса Македониять, сяс мес мон ёран самс Македониянь пачк.6Тинь ширесонт, пади, мзярошкас ащан, шять тялотьке ётафтса мархтонт. А сяльде тинь кочкасамасть монь сяда товолдонь кис.7Вдь монь аш мялезе тяни няемс тинь ётамбачк, а надиян, кда мярьги Азорсь, улемс мархтонт сяда ламоняс.8А тяса, Ефесса, мон лядан Ведьгемонце шинь илать самс,9сяс мес тяса монь инголен келеста панжевсь кенкшсь оцюдонга оцю и иможень канды покодеманди, хуш каршек молидонга аф кржа.

10Сандяряй тейнть Тимофей, ванода: тейнза тяза уле мезьда пелемс ширесонт. Вдь сон монь лацон тиендьсы Азорть тевонц.11Катк кивок аф ваны лангозонза безярдезь. А сяльде, паронь арьсезь, кочкасть сонь меки кис, катк мрдай тейне. Вдь мон кемай ялганьконь мархта учан эсонза тяса.

12Аполлос кемай ялганьконди мон пяк энялькшнень молемс тейнть лия кемай ялганьконь мархта, но сонь аш мялец молемс тяни. Сон сай ширезонт, мзярда эвондай ётка пингоц.

Мекольце пряс путоматне и пара валонь пачфтематне

13Тяда уда, кемоста ащеда кемамаса, уледа аф пеликс и виикс!14Катк сембось тиньцонт тиендеви кельгома мархта.

15Кемай ялгат, тинь содасасть, Стефан и сонь кудэряензон васенцекс Ахаияса арасть Христости кемайкс. Синь максозь эсь пряснон покодемс-лездомс Шкаень ломаттненди. Сяс эняльдян тейнть:16тиньге уледа кулхцондыкс тяфтама ломаттнеди, и эрти, кие мархтост марса покоди ваймамань аф содазь.17Монь кеняртьфтемазь Стефанонь, Фортунатонь и Ахаиконь тяза самасна. Синь максозь тейне сянь, мезе тейне ашезе сатне тиньфтомонт.18Синь озафтозь монь седизень, кода озафтозь тиннетьке. Пара лувксс путость тяфтама ломаттнень.

19Пара вал тейнть кучихть Асиянь кемаень пуромксне. Кучихть тейнть Азорса седиваксстонь пара валхт Акилань мархта Прискилла и марнек кемаень пуромкссь, кона кочксеви синь пялост.20Кучихть тейнть пара вал сембе тястонь кемай ялганьке. Шумбракснеда фкя-фкянь мархта иняру паламаса.

21А тяни мон, Павел, сёрмадан эсь кядьсон: кучан пара валхт.22Кие аф кельгсы Азорть, улеза сюдоф! Мара́н-афа́! – Минь Азороньке сась!23Иисус Христос Азороньконь пароказнец улеза тинь мархтонт!24И мон кельктядязь тинь сембонь, кит Христос Иисусоннет. Аминь.


*а 16:22 Мара́н-афа́ – арамеень кялень валхт. Смузьсна: «Минь Азороньке сась!» али «Азороньке, сак!»


предыдущая глава Глава 16 следующая глава