Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ПАВЕЛОНЬ ВАСЕНЦЕ СЁРМАЦ КОРИНФ ОШЕНЬ КЕМАЙХНЕНДИ

Глава 13

Кельгомать шнамац-кеподемац

1Корхтандярян мон ломанень и ангелонь кяльса, а кельгома эсон аш, эста мон кода пайгонь шава гайняман али кальдердемань цингордоман.2Кда монь ули пророчендамань казнезе, и мон содасайне сембе салавашитнень, и монь кядьсон сембе содамошись и сембе кемамась, конаса тейне полафневихть панттнень вастсна, а кельгома эсон аш, – эста мон мезевок ашан.3Явондяряса марнек уликс-парозень, мянь максондяряса плхтамас ронгозень, а кельгома эсон аш, – эста аш тейне тянь эзда кодамонга асу.

4Кельгомась куватьс кирди, сон седи ваксста паронь тии. Кельгомась сельме аф каяй, кельгомась прянц аф шнасы, аф няйсы,5аф вятьсы прянц казямста, аф вешендьсы сонценнеть, аф сафнесыне кяжензон, аф мяляфты кяж.6Сон аф кеняртькшни кальдявти, а кеняртькшни видешити.7Сон кирдьсы-ётасы семботь, сембоса ляткшни кемайкс, эрь тевса надияй Шкайть лангс и кандсыне-кирдьсыне сембе сталмотнень.

8Кельгомась мзярдонга аф юмай. Лоткайхть пророчестватне, лия кяльхневок лоткайхть корхтамда, содамошиське юмай.9Вдь минь содамошиньке афсатыкс мархтот и пророчестваньке афсатыкс мархтот.10Мзярда сай афсатыксфтомось, эста сембе афсатыкс мархтось юмай.

11Мзярда мон улень иднякс, эста корхтань кода идня, арьсень кода идня и шарьхкодень кода идня. Но мзярда касонь алякс, эста сембе иденнеть кадыне фталу.12Тяни минь няйхтяма аф лац, кода олаф ваномань пачк, но эста минь карматама няема шамада шамас. Тяни монь содамошизе афсатыкс мархта, а эста мон карман содамонза семботь педа-пес, кода монь содасамань Шкайсь.

13Эрь вов, фалу улихть ня колмотне: кемамась, надиямась, кельгомась, но кельгомась эздост инь оцюсь.


предыдущая глава Глава 13 следующая глава