Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ПАВЕЛОНЬ ВАСЕНЦЕ СЁРМАЦ КОРИНФ ОШЕНЬ КЕМАЙХНЕНДИ

Глава 7

Рьвяямать колга

1Тяни сянь колга, мезень кувалма тинь сёрмадоде тейне. Тинь корхтатада: «Пара улель аляти прокс аф содамс ава».2Но усксевомас аф праманкса, катк эрь алять ули эсь рьвац, а авать эсь мирдец.3Аляти эряви тиендемс мирдень тевонзон эсь рьванцты, а рьвати тяка лаца – мирденцты.4Рвясь аф азор эсь ронгонц лангса – сон мирденц, тяка лаца мирдське аф азор эсь ронгонц лангса – сон рьванц.5Тяда шарфне фкя-фкянь эзда, кда аньцек аф лама пингонди, фкя-фкянь мархта корхтафтомда меле, постс и озондомас прянь максомга, а сяльде тага уледа марса. Афоледязь сувафта пежес Сатанась, кда тейнть аф кирдеви эсь прянте.6Мон тянди аф кошардан, но кда ули мяленте: тиендеда тяфта.7Вдь монь мялезе, сембе ломаттне улельхть монь лацон, но эрь ломанть сонцень казнец Шкайть эзда, фкять тяфтама казнец, омбоцеть лия.

8Аф рьвяяфненди и удаватненди мон мярьголень сяда товга лядомс монь лацон, ськамост.9Но кда синь аш кирдемшкасна, катк рьвяйсихть. Сяда пара рьвяямс салава мялень толса паломать коряс.

10А сятнень, кит рьвяяфт, мон кошярясайне, – афи мон, а Азорсь: рьвати аф кадома мирдец,11а кда кадсы, катк эряй ськамонза али меки ладяй мархтонза. Мирдське тяза ява рьванц мархта.

12Лиятненди корхтан мон, аф Азорсь: кда кона-кона кемай ялгать рьвац аф кемай, но сонь мялец эрямс мирденц мархта, мирдсь катк аф яви мархтонза.13И кда кемай авать мирдец аф кемай и алять мялец эрямс мархтонза, катк авась аф яви мархтонза.14Сяс мес аф кемай мирдсь иняруяфтови рьванц вельде, и аф кемай рьваське иняруяфтови эсь кемай мирденц вельде. Афток тинь иденте улельхть аф аруфт, а тяни синь иняруфт.15Кда аф кемайсь ёрай явомс кемайть эзда, катк яви. Кемай алясь али авась тяса апак сотт аф кемай поланцты. Азорсь тердемазь минь эрямс сетьмошиса.16Коста тон содасак, рьвя, пади тон идесак мирдцень? Али тон, мирде, коста содасак, пади тон идесак рьвацень?

Лядода стамкс – кодамкс тердедязь Шкайсь

17Аньцек эрсь катк эряй стане, кода ладязе тейнза Шкайсь, и ляды стамкс, кодамкс тердезе Шкайсь. Тянди кошярясайне сембе кемаень пуромкснень.18Кинь Шкайсь тердезе киськопень керфста, ся катк аф кяшендсы эсь кероманц; кинь Шкайсь тердезе апак керфста, ся катк аф тии керома.19Керомась тя мезевок аш, аф керомаське мезевок аш. Но инь эрявикссь – тя Шкаень кошардомвалхнень ванфтомасна.

20Катк эрсь ляды стамкс, кодамкс тертьфоль.21Тон улеть урекс, мзярда тердензе Шкайсь? Катк тя аф пичефттянза тонь. Кда мяневат воляшис, шарфтк тянь пара тевонди.22Вдь уреть, конань тердезе Азорсь, Азорсь тиезе воляшистоннекс, стане тертьф воляшистоннеське – Христость урец.23Тинь рамафтада оцю питнеса, сяс тяда арсе урекс ломаттненди!24Кемай ялгат, кие кодамкс тертьф, ся катк тяфтамкс и ляды Шкайть инголе!

Аф рьвяяфнень и удаватнень колга

25Сятненди, кит апак рьвяякт и рьвакс апак тукт, монь аш кошардомане Азорть эзда. Тянь колга азса эсь мялезень, кода ся, кинь Шкайсь кельгозь ужяльдезе и тиезе ломанькс, конань лангс ули кода надиямс.26Мон арьсян, тяниень стака пингть сяда пара ломанти ляткшнемс стамкс, кодамкс ульсь.27Кда тон рьвяяфат, тят вешенде явома. Кда лядоть рьвафтома, тят вешенде эстейть рьвя.28Рьвяяндярят – пежес аф суват, и лисендяряй стирсь рьвакс – пежес аф сувай. Но сятнень, кит рьвяяйхть, учсесы лама сталма тя эряфса. А мон ёран ванфтомс тинь тянь эзда.

29Кемай ялгат, мон корхтан тейнть вага мезе: пингта лядсь аф лама. Сяс катк сят, кинь улихть рьвасна, сяда тов эряйхть, кода рьвафтомотне;30сят, конат авардихть, кода аф авардихне; кеняртькшнихне, кода аф кеняртькшнихне; рамсихне, кода сятне, кинь кядьса аф кирдеви рамафсна.31И сятненди, конат масторлангонь тевботмосот, аф эряви юмсемс ня тефнень потмоса, сяс мес масторлангсь, кодама сон тяни, моли эсь пенцты.

32Монь мялезе: афоледе лажна-пичеде стакащемда. Аф рьвяяфсь лажнай Азоронь тефнень колга, кода ваномс Азорть мяленц,33а рьвяяфсь лажнай масторлангоннеть колга, кода ваномс рьванц мялец. Рьвакс туфть и стирть ёткса ули аф фкаксши:34рьвакс апак тук стирсь лажнай Азоронь тефнень колга – сянь колга, кода улемс инярукс ваймонек-ронгонек. Ина рьвакс туфсь лажнай масторлангонь тефнень колга, кода ваномс мирденц мялец.35Тяфта корхтазь, монь аш мялезе путомс инголент кодама-бди перяфкст, меколанкт, мон ёран лездомс тейнть: фалу видеста и марнек прянь максозь покоделеде Азорти.

36Кда кивок арьси: сон тии аф видеста эсь кельгома стиренц мархта, кадомок сонь сире стирькс, ся катк тии кода сонцень мялец: пеже тянь эса аш, тяфтапне катк рьвяяйхть.37Но кие седиса кемоста арьсезе аф рьвяямс, и кивок сонь вийхца аф кошярясы, и тейнза кирдевихть сембе потмонь мяленза, и сон сась мяльс ванфтомс эсь кельгома стиренц стирьксшинц, – эста лац тии.38Сяс, кие рьвяяй кельгома стиренц лангс, тии лац, а кие аф рьвяяй, тии нинге сяда лац.

39Рьвясь койть коряс сотф эсь мирденц мархта снярс, мзярс мирдсь шиса. Кда сон кулы, авати мярьгови тумс рьвакс кинди мялец, аньцек улеза тя алясь Азорти кемайкс.40Но сон ули сяда павазу, кда ляды ськамонза. Тяфтама монь мялезе, а мон арьсян, моньге эсон ули Шкаень Ваймопожф.


предыдущая глава Глава 7 следующая глава