Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ПАВЕЛОНЬ СЁРМАЦ РИМ ОШЕНЬ КЕМАЙХНЕНДИ

Глава 16

Пара валонь кучемась Римонь кемайхненди

1Монь мялезе содафтомс тинь Фива сазороньконь мархта, сон Кенхреянь кемаень пуромксть лездыец.2Васьфтесть сонь Азорть лемса, кода ладяй Шкаень ломаттненди, и лездода сембоса, мезе тейнза эряви, сяс мес сон ламонди лезнесь, тянь лувксса тейненьге.

3Азода пара вал Прискилланди и Акиланди, мархтон марса Иисус Христости покодихненди,4конат аноктольхть максомс монь инксон эряфснон. Мон аф ськамон азан тейст сюконяма, а лия ломаньтналонь сембе кемаень пуромксневок. Азода пара вал кемаень пуромксти, кона пуромкшни синь кудсост.5Азода пара вал кельгома ялгазти Епенетонди, кона Ахаияса васенцекс кармась кемама Христости.6Пара вал Мариамонди, кона тяшкава лама тейнек тись.7Пара вал Андрониконди и Юниянди, монцень масторстон ломаттненди, конат мархтон ульсть пякстамгудса и конат лац содафт апостолхнень ёткса, и конат мондедон инголе кармасть кемама Христости.8Пара вал Амплиенди, Азорти кемамас коре кельгома ялгазти.9Пара вал Урбанонди, мархтонк Христости покодити, и кельгома ялгазти Стахиенди.10Пара вал Апеллесонди, кинь Христосоннекс улемац няфтьф тевса. Пара вал Аристовулонь кудэряензонды.11Пара вал монь масторстон Иродиононди и Наркиссонь кудста кемайхненди.12Азода пара вал Трифена и Трифоса аватненди, конат лама виень путозь покодихть Азорти. Пара вал кельгома сазорти Персиданди, конац пяк лама виень путозь покоди Азорти.13Пара вал Руфонди, Шкаень кочкаф покодити, и сонь тядянцты, кона арась тядякс тейненьге.14Пара вал Асинкритонди, Флегонтонди, Ермонди, Патровонди, Ермиенди и лия кемайхненди, конат синь мархтост.15Пара вал Филологонди и Юлиянди, Ниреенди сазоронц мархта и Олимпанонди, и мархтост сембе иняру ломаттненди.16Шумбракснеда фкя-фкянь мархта иняру паламаса. Христосонь сембе кемаень пуромксне кучихть тейнть пара вал.

17Мон эняльдян, кемай ялгат, ванфтода пря сятнень эзда, конат шорсемок ётконтень, явфнетядязь тинь. Синь ускихть эсонт ся тонафтомать эзда, кона максф тейнть. Аеркшнеда тяфтапнень эзда.18Ня ломаттне покодихть аф Иисус Христос Азороньконди, а эсь пекснонды. Синь ламбама и кяльготнемань кяльсост васькафнесазь сятнень седиснон, кит тёждяста кемайхть мезьс повсь.19Сембонди содаф, тинь уледе кулхцондыкс Пара кулянь валти, и тя монь кеняртьфнесамань. Но монь мялезе тяфтама: маштоледе тинь паронь тиема и афоледе машта кяжень тиема.20А Шкайсь, сетьмошинь лихтибрясь, курок прафтсы Сатанать пильгалонт. Иисус Христос Азороньконь пароказнец улеза тинь мархтонт! Аминь.

21Тейнть кучихть пара вал Тимофей, монь мархтон покодись, Луций, Иасон и Сосипатр, монь мастороннетне.22Монга, Тертий, Павелонь валонзон коряс тя сёрмать тяштиец, кучан тейнть седиваксстонь вал Азорть лемса.23Пара вал кучи тейнть Гаий, монь инжиень кельги азорозе, конань кудса пуромкшни марнек кемаень пуромкссь. Пара вал тейнть Ерастонь, ошень ярмаконь ванфтыть эзда, и Кварт кемай ялганьконь эзда.24Иисус Христос Азороньконь пароказнец улеза тинь сембонь мархтонт! Аминь.


предыдущая глава Глава 16 следующая глава