Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ПАВЕЛОНЬ СЁРМАЦ РИМ ОШЕНЬ КЕМАЙХНЕНДИ

Глава 15

Тиендесть сянь, мезсь канды пара кемай ялгати

1Тейнек, кемамаса виихненди, кирдемат кемамаса лафчнень афсатыкссна, а аф аньцек эсь пряньконди пара вешендема.2Эрти эздонк эряви ванондомс кемай ялгать мялец, арьсемок сянь колга, мезсь канды тейнза пара и виензафтсы кемаманц.3Вдь Христосовок аф Эсь мяленц ванондозе, но кода азф Сёрматфксса: «Тонь сялдыхнень сялдомасна прасть Монь лангозон».4Сембось, мезе тяштьф Сёрматфксса, тяштьфоль минь тонафтоманьконь инкса. Сон максы тейнек вийхть кирдемс сталмот и лястясы седиеньконь надиямать ванфтоманкса.5Катк Шкайсь, кона максси вийхть кирдемс сталмот и лястясы седить, лезды тейнть эрямс фкя мяльса-ёньца эсь ётковант Христос Иисусть тонафтоманц коряс.6Эста тинь фкя седиса и фкя кургса карматада шнамонза Шкайть, Иисус Христос Азороньконь Алянц.

Пара кулясь максф еврейхненди и лия ломаньтналхненди

7Сяс, Шкаень лемть шнаманкса, сявода фкя-фкянь эсь седизонт, кода Христоска сяводязь тинь Эсь седизонза.8Мон ва мезень колга корхтан: Иисус Христос арась еврейхненди покодикс Шкайть видешинц инкса. Сон сась пяшкодема надияфтоматнень, конатнень Шкайсь максозень кунардонь пингста атянь-атяснонды.9А лия ломаньтналхненди арась покодикс кельгозь ужяльдеманц инкса, лия ломаньтналхневок шналезь Шкайть, кода корхтави тянь колга Сёрматфксса:
«Сяс карман шнамот Тонь лия ломаньтналхнень ёткса
и карман морама Тейть шнамань мор».

10И нинге корхтави Сёрматфксса:
«Кеняртькшнеда, лия ломаньтналхт, Шкайть ломаньтналонц мархта!»

11И нинге:
«Шнасть Шкайть, сембе лия ломаньтналхне!
Сембе ломаньтналхне кеподесть Сонь лемонц!»

12Исаиявок корхтай:
«Иессеень юрста касы лисьфкя,
Сон кеподи ломаньтналхненди вятикс,
Сонь лангозонза путсазь надиямаснон лия ломаньтналхне».

13Катк Шкайсь, надиямань лихтибрясь, пяшкоттядязь тинь кемамантень вельде оцю кенярдемаса и максы тейнть сетьмоши. Эста тинь надияманте апак лотксек касы-оцюлгоды Шкаень Ваймопожфть виенц вельде.

Павел азонды эсь покодеманц колга

14Кемай ялгат, мон лац содаса: тинь пяшкодеде парошида, кочкаде эрь кодама содамоши и машттада фкя-фкянь путома ёньц.15И сяка мон сёрмадан тейнть, васток-васток вельф отькорьста, сяс мес ёран лятфтамс тейнть кона-кона тефнень. Шкайсь Эсь пароказненц коряс макссь тейне16улемс Иисус Христосонь покодикс лия ломаньтналхнень ёткса. Мон покодян озксвятиень лаца: пачфнеса Пара кулять, и тянь вельде тисайне лия ломаньтналхнень Шкайть мяльс туф озксказнекс, кона иняруяфтф Иняру Ваймопожфса.

17Сяс Иисус Христость лемонц шнаманкса мон азондса сянь, мезе тиень Шкайти покодемаса.18Мон пелян корхтамс мезеньге лиянь колга, а корхтан аньцек сянь колга, мезе тись монь вельден Христос лия ломаньтналхнень Шкаень кулхцондомати вятеманкса. Сон тиезе тянь валса и тевса,19тяштькснень и дивань тефнень вийса, и Шкаень Ваймопожфть вийса. Иерусалимста сявомок Иллирикти молемс мон азондыне Христость колга Пара кулять.20Мон фалу тяряфтонь кандомс Шкаень валть тоза, коса нинге ашезь куленде Христость лемонц. Тя сяс, мес монь ашель мялезе путомс ся кудъюрт лангс, конань путозь лиятне.21Монь мялезель пяшкодемс Сёрматфксонь валхнень:
«Сят, конатненди Сонь колганза апак астоль, няйсазь,
и сят, конат мзярдонга ашезь куле, шарьхкодьсазь».

Павелонь киц вяти Риму

22Вов тянкса мон тяшкава ламос ашень сав тейнть, хуш аф весть срхксень.23Но тяни шумордайне тевнень ня васттнень эса и арьсян пяшкоди монь лама кизонь надиямазе – самс тинь варжамонт.24Кодак аньцек срхкан Испанияв, эста ётамбачк суван ширезонт, хуш васедемстонк аф ламонди петьса седиезень мархтонт корхнемаса. А сяльде, надиян, тинь макстада тейне лезкс, сянь, мезе эряви тейне кизень поладомс.25Тяни мон молян Иерусалиму кандомонза лезксть Шкаень иняру ломаттненди.26Тевсь ва мезьса: Македониянь и Ахаиянь кемаень пуромксне кочкасть лезкс Иерусалимонь ашушиса эряй кемай ялганьконди.27Синь синць арьсесть тяфта тиемс, и лац тисть – вдь синь шумуфт инголест. Евреень кемайхне явозь синь мархтост ваймопожфонь козяшиснон, сяс тяни синьге, лия тналонь кемайхне, катк явсазь мархтост модалангонь козяшиснон.28Мзярда мон пяшкодьса тянь и педа-пес пачфтьса тейст кочкафть, туян Испанияв и ётамбачк суван варжамонт.29Мон содаса, мзярда саян тейнть, кандса эсь мархтон пяшксеняста Христость Пара кулянц бславаманц.

30Кемай ялгат, Иисус Христость лемса и Иняру Ваймопожфонь казьф кельгомаса мон эняльдян тейнть лездомс монь тюремасон. Озондода инксон Шкайти:31Иудеянь аф кемайхне афольхть тие тейне зиян, и Шкаень ломаттне пара мяльса сяволезь лезксть, конань кандса Иерусалиму.32И тяда меле, улендяряй тянди Шкайть мялец, мон кеняртькс потмоса саян ширезонт и седиге вайман мархтонт.33Улеза Шкайсь, сетьмошинь лихтибрясь, сембонь тинь мархтонт! Аминь.


*а 15:9 Псалтирь 17:50

*б 15:10 5 Моисея 32:43

*в 15:11 Псалтирь 116:1

*г 15:12 Исаия 11:10

*д 15:21 Исаия 52:15


предыдущая глава Глава 15 следующая глава