Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ПАВЕЛОНЬ СЁРМАЦ РИМ ОШЕНЬ КЕМАЙХНЕНДИ

Глава 14

Тяк суденда кемай ялгацень

1Ломанть, конань лафча кемамац, сувафтость эсь ёткозонт и тяда срхкафне пялькснемат сонь мялензон-арьсеманзон кувалма.2Сяс мес фкясь кемай: мярьгондеви ярхцамс сембе ярхцамбяльда, а лафчсь ярхцай аньцек касыксонь ярхцамбяльда.3Сембода ярхцайсь, катк аф безярди сянь эзда, кие ярхцай аньцек касыкста. А аньцек касыкста ярхцайсь катк аф судендасы сянь, кие ярхцай сембода. Вдь Шкайсь соньге сявозе Эстейнза.4Кият тон тяфтамсь лиять покодиенц судендамс? Сон эсь Азоронц инголе стяда ащи али прашенды. Но сон сяка кармай ащема, сяс мес Шкайти вийс коре кирдемс сонь пильге лангса.

5Фкясь лувсы кодамонга шить лиятнень коряс сяда оцюкс, а омбоцети сембе шитне фкат. Катк эрсь тии эсь кемаманц-шарьхкодеманц коряс.6Ся, кона башка луви кодамонга ши, Азорть инкса тянь тисы, а кие сембе шитнень фкакс лувсыне, тяка лаца Азорть инкса тянь тисы. Сявок, кие ярхцай, ярхцай Азорть лувомга, сяс мес сюконяй Азорти ярхцамбяленкса. А кие аф ярхцай, ся аф ярхцай Азорть лувомга, и тяка лаца азы сюконяма Шкайти.7Вдь эздонк кивок аф эряй эсь инксонза, и кивок аф кулы эсь инксонза.8Кда минь эрятама, минь эрятама Азорть инкса. Кда кулотама, Азорть инкса кулотама. Шисотама минь али кулотама, минь сяка ляткшнетяма Азороннекс.9Вчёк тянкса Христос кулось и вельмась – кулофнень и шистотнень лангса Азоркс араманкса.

10Мес ина тон судендасак кемай ялгацень? Али тон, мес безярдят ялгацень эзда? Вдь минь сембе карматама ащема Христость судонц инголе.11Вдь Сёрматфксса азф:
«Кода виде тя: Мон эрян, – корхтай Азорсь,
– тяфта виде тявок:
Монь инголен комафтсы плманжанц эрь ломанць,
и эрь кяльсь шнасы Шкайть».

12Тяфта, эрсь минь ёткстонк кармай азондомост эсь тевонзон Шкайти.

Тяк сувафне пежес кемай ялгацень

13Сяс аф карматама фкя-фкянь судендама. Меколанкт, тяряфтода мезевок аф тиендемс стама, мезсь тапарялезе кемай ялгацень али сувафтолезе пежес.14Иисус Азорть мархта сотовомать сюнеда мон кемоста содаса: аш тяфтама ярхцамбяль, кона улель эсьсонза аф ару. Аньцек ся, мезть ломанць лувондсы аф арукс, ся арси тейнза аф арукс.15Кда тонь кемай ялгацень колави мялец сянкса, мезьда тон ярхцат, эста тон аф кельгомас коре тиендят. Тяк вяте юмамас-арамас ярхцамбяльцень мархта сянь, кинь инкса кулось Христос.16Киндинге тяда макссе туфтал кальдявста корхтамс сянь колга, мезть тинь лувсасть цебярькс.17Вдь Шкаень Оцязорксшись – тя аф ярхцамбяль, афи симомбяль, сон – видексши, сетьмоши и кенярдема, конатнень казендьсыне Иняру Ваймопожфсь.18Кие тяфта покоди Христости, ся тушенды Шкайть мяльс и лувови цебярькс ломаттнень ётксовок.

19Тяфта, карматама фалу вешендемонза ся кить, кона вятьсамазь минь ладямати и кемаманьконь марстонь кемокстаманцты.20Ярхцамбяленкса тяк срафне-калафне Шкаень тевть. Сембе ярхцамбяльсь ару, но кальдяв, кда тон сувафнесак ломанть пежес ярхцамбяльса, конада ярхцат.21Сяда пара аф ярхцамс сивольда и аф симомс винада, и аф тиендемс мезевок стама, мезть эзда тонь кемай ялгаце пупордай, сувай пежес али вийда машты.22Ванфтк эсь мяльцень-кемамацень тянь кувалма Шкайть инголе. Павазу ся ломанць, кона аф судендасы эсь прянц сянкса, мезть сон лувсы видекс.23А кда ломанць кафтолды, эряви тяда ярхцамс али аф, но сяка ярхцай, сон ни судендаф, сяс мес тиенди аф кемама коряс. А сембось, мезсь тиендеви аф кемама коряс – пеже.

Шнама Шкайти!

24Шнама Шкайти, конанди вийс коре кемокстамс тинь! Тянь колга корхтай Пара кулясь, конань мон азондса. Тя Иисус Христость эзда кулясь, лиякс мярьгомс, салавашись, кона кяшфоль лама пинге и тяни панчф.25Пефтома эряй Шкайть мярьгоманц коряс тя салавашись тяни панчф пророкнень сёрматфса и азонтф сембе ломаньтналхненди – синь кемамас и кулхцондомас сувафтоманкса.26Улеза Иисус Христость вельде пефтома пингонь шнама фкя-тяка Смузюдонга Смузю Шкайти! Аминь.


*а 14:11 Исаия 45:23


предыдущая глава Глава 14 следующая глава