Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ПАВЕЛОНЬ СЁРМАЦ РИМ ОШЕНЬ КЕМАЙХНЕНДИ

Глава 6

Христосонь ломанць пежети аф уре

1Мезе ина тяда меле минь астама? Тага карматама ингольцеть лаца тиендема пежет Шкаень пароказнеть касфтоманкса? Прокс аф!2Вдь минь куломе пежети – кода ина тейнек тага эрямс пежеса?3Кали аф содасасть: сембе минь, кит кстиндафтозь пряснон Иисус Христость мархта сотовоманкса, тянь вельде куломе мархтонза.4Тяфта, кстиндамста минь куломе Сонь мархтонза и улеме калмафт мархтонза ва мес: кода Христос вельмафтфоль кулофста Алянц инь оцюшинц вийса, тяка лаца миньге карматама эряма од эряфса.5Кда минь фкя-тяка куломаса сотовоме Сонь мархтонза, эста и вельматама Сонь лацонза,6вдь минь содасаськ: ташта ломаненьке эськотьф Христость мархта крёз лангс минь пежу обуцяньконь виенц юмафтоманкса, афолеме уле пежети урекс.7Кулофсь воляшиса пежеть эзда.8Минь кематама, кда минь куломе Христость мархта, эста эрямска карматама Сонь мархтонза.9Минь содасаськ: Христоссь, кулофнень эзда вельмафсь, мзярдонга ни аф кулы, куломать аш азорксшиц ни Сонь лангсонза.10Мзярда Иисус кулось, Сон весть и сембе пинкненди кулось пежети. А мес тяни эряй, тяни эряй Шкайти.11Тяконь лаца тиньге, конат сотфт Иисус Христос Азороньконь мархта, лувость прянтень кулофокс пежети, но шистоннекс Шкайти.

12Сяс катк пежесь аф азорондай куломанди максф ронгонтень лангса, и тясть кулхцонда сонь визькс мялензон.13Тясть макссе пежети ронгонь кодамонга пяльксонтень кярьмодемакс кальдявонь тиеманди. Тянь вастс максость прянтень Шкайти, кода ломатть, конат ётасть куломаста эряфти. Эсь ронгонь пяльксонтеньге максость Шкайти кярьмодемакс пара тевонь тиеманди.14Катк оду аф азорондай лангсонт пежесь, сяс мес тинь Шкаень пароказнеть алотада, а аф койть.

Христосонь ломанць уре Шкайти

15Тяфта ина мезе? Карматама тиендема пежет, сяс мес минь лангсонк тяни аф койсь, а Шкаень пароказнесь? Прокс аф!16Кали аф содасасть: кда тинь макссасть эсь прянтень киньге кядялу урексшис, эста тинь афкукс кармаде улема сянди урекс, кинь кулхцондсасть? Тинь али пежети уретяда, мезсь вяти куломас, али Шкаень кулхцонды уретяда, мезсь вяти Шкайть мархта ладямати.17Мзярда-бди тинь уледе пежети урекс, но тяни, сюконян Шкайти, марнек седиса кармаде кулхцондомонза ся тонафтомать, конанди тинь максость эсь прянтень.18Тинь нолдаводе пежеть урексшинц алда и араде урекс, конат тиендихть видексшить коряс.19Мон тянь корхтаса стама кяльса, кона сяда шарьхкодеви тейнть. И кода тинь мзярда-бди максость прянтень урексшис аф арушити и койфтомошити – тиендемс койфтома тефт, тяфта тяни максость ронгонтень урексшис видешити – тиендемс иняру тефт.

20Мзярда тинь уледе пежети урекс, тейнть ашезь эряв пяшкотькшнемс Шкайть мяленц.21Кодама лезкс тянь эзда тинь сяводе? Сяводе сянь, мезьда тяни визттяда, сяс мес сонь пец – тя куломась.22Но тяни, мзярда тинь нолдафтада воляшис пежеть эзда и араде Шкайти урекс, тинь сяводе аруши, конань песта тейнть максови пефтома пингонь эряфсь.23Питнесь, кона пантфтови пежень тиеманкса, – кулома, а Шкаень казнесь – пефтома эряма Иисус Христос Азороньконь мархта.


предыдущая глава Глава 6 следующая глава