Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ПАВЕЛОНЬ СЁРМАЦ РИМ ОШЕНЬ КЕМАЙХНЕНДИ

Глава 7

Тинь мянтьфтядязь Моисеень коенц эзда

1Кемай ялгат, (мон корхтан сятненди, конат содасазь койть), дяряй тинь аф содасасть, койсь азорондай ломанть лангса аньцек мзярда сон шиса?2Кепотьксонди, койсь сотнесы рьвакс туф авать мирденцты, мзярс ся шиса. Но кулондяряй мирдсь, авась мяни воляс койть эзда, кона сотнекшнезе мирденцты.3Тяфта, кда сон мирденц пингста туй лиянди, сон лувови полань полафникс. Но кда кулы мирдец, эста койть вельде авась ни апак сотт кулофти и лиянди рьвакс лисемста аф лувови полань-полафникс.

4Тякось тиньге мархтонт, кемай ялгане: Христость куломста тиньге, кода Сонь ронгонь пяльксонза, кулоде койти. Тяфта тинь Лияти максфтада, Сянди, кие ульсь вельмафтф кулофнень эзда. И тяфта тейнек ули кода покодемс Шкайти.5Мзярда минь эряме колаф обуцяньконь коряс, эста пежу мяльхнень, конатнень крьвяснезень койсь, ульсть вийсна ронгоньконь лангса, и синь покодсть аньцек куломати.6А тяни минь куломе койти, кона тяда инголе кирдемазь эсь кядялонза. Тяфта минь мянеме койть эзда и тяни покоттяма Шкайти одкстоптф Ваймопожфса, а аф кода инголи, мзярда минь эряме сёрматф койть коряс.

Койсь и пежесь

7Мезе тянь лангс астама? Дяряй койста лисенди пежесь? Прокс аф! Но кда аф койсь, мон афи содалине, мезе стамсь пежесь. Кда койсь афолезе аза: «Тят пута сельме маластоцень уликс-паронц лангс», – мон афи содалине, мезе стамсь сельмонь путомась.8Пежесь мусь кошардомвалса эстейнза киня васькафтомс монь и вельденза крьвястсь моньцон эрь мезень лангс сельмонь путома. Пежесь койфтома кулоф.9Ульсь пинге, мзярда мон эрянь койфтома, но кодак эвондась коень кошардомвалсь – пежесь эреклась,10а мон кулонь. Тяфта кошардомвалсь, конанди эряволень вятемс эряфти, шарфтсь тейне куломанди,11сяс мес пежесь мусь кошардомвалса эстейнза киня васькафтомс монь, а сяльде кошардомвалть вельде шавомань.12Сембе сяка, койсь иняру, и сонь кошардомвалоцка иняру, видексшинь и пара.

13Но кали тя парось кандсь тейне кулома? Прокс аф! Пежесь тиезе тянь. Тяфта сон няфтезе эсь афкуксонь шаманц и пароть вельде кандсь тейне кулома. Лисенди, кошардомвалть вельде сядонга шарьхкодевсь, конашкава кальдяв пежесь.

14Вдь минь содасаськ, койсь Ваймопожфонь. А мон ломанян ронгонек-пондонек и мифан урексшис пежети.15Мон монць аф шарьхкодьса, мезе тиендян, сяс мес тиендьса аф сянь, мезе мялезе, а сянь, мезть афолине няе.16Но кда мон тиендьса аф сянь, мезе мялезе, эста мон лувса койть цебярькс.17Сяс лисенди, тиись аф мон, а потмосон эряй пежесь.18Мон содаса: монь эсон, лиякс мярьгомс, колаф обуцясон, аш мезевок цебярь. Монь мялезе тиемс пара, но сон тейне аф тиеви.19Ся пароть, конань мялезе тиемс, аф тиендьса; а кальдявть, конань аш мялезе тиемс, тиендьса.20Но кда мон тиендьса сянь, мезе аш мялезе, лисенди, тянь тиендьса аф мон, а пежесь, кона эряй потмосон.

21Тяфта, мон панжень эсьсон кой: мзярда ёран тиемс кодамовок цебярь, монь эздон лиси кальдяв.22Эсь потмован мон кеняртькшнян Шкаень койти,23но ронгсон мон няян лия кой, кона тюри монь потмонь ёнезень мархта. Сон тиендьсамань монь урекс пежеть коенцты, кона покоди монь ронгсон.24Мон павазфтома ломанян! Кие мянтьфтсамань монь тя куломань канды ронгть кядялда?25Сюконян Шкаезти – Сон мянтьфтемань монь Иисус Христос Азороньконь вельде! Лисенди тяфта, эсь потмован мон покодян Шкайть коенцты, а эсь колаф обуцязень коряс – пежень койти.


предыдущая глава Глава 7 следующая глава