Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ПЁТОРОНЬ ОМБОЦЕ СЁРМАЦ

Глава 3

Азорсь видекс сай

1Кельгома ялгане, мон сёрмадса тейнть ни омбоце сёрмать. Мон ёран ня сёрматнень эса лятфтаматнень вельде сргозьфтемс прясонт ару мяльхть-арьсемат:2афолесть юкста валхнень, конат инголькиге азфтольхть иняру пророкнень вельде, и Азорть и Идить кошардомвалонц, кона тейнть максф апостолонтень вельде.3Васендакиге содасть: мекольдень шитнень эвондайхть кяжиста пеедихть-рахсихть, конат кармайхть пряснон вятема эсь визькс-нулготькс мяльснон коряс.4Синь кармайхть корхтама: «Коса надияфтомась Сонь саманц колга? Атянь-атяньковок кулость, но мезевок изь полафта. Сембось моли стане, кода ульсь менельть-масторть тиеманц ушетксста».

5Тяфта арьсихне содазь юкснесазь тянь: ушетксса менельсь и масторсь Шкаень валса тифтольхть ведьста и ведть вельде,6тяконь лаца ведть и Валть вельде кунардонь масторлангсь ваяфтфоль шада ведьса.7А тяниень менельсь и масторсь ванфтови сяка Валть коряс толса плхтамати. Тя ули судонь шиста, мзярда юмафтовихть-арафтовихть Шкайти аф кулхцондыхне.

Од менельсь и од масторсь

8Кельгома ялгат, аньцек тясть юксне ва тянь: Шкайти фкя шись кода тёжянь киза, а тёжянь кизотне – кода фкя ши.9Азорсь аф тарксесы надияфтомать пяшкодема пингонц, кода арьсихть кой-кит. Меколанкт, тянь эса Сон няфнесы тейнек эсь куватьс кирдемшканц, сяс мес Сонь аш мялец киньге юмафтомс-арафтомс. Сон ёрай: сембе шарфтольхть пежеснон эзда.10Но Азорть шиц сай кода салайсь веть. И эста зярнязь-увназь юмайхть менельхне, крьвяземок, юмайхть менельса валдоптыхневок, палы марнек масторлангсь и сембось, мезе лангсонза.

11Кда тя сембось тяфта срафтови, эста арьседа, кодамкс тейнть эряви улемс иняру эряфса и Шкаень пелемаса,12мзярс тинь учендсасть и маласькофнесасть Шкаень шить саманц. Ся шиня каладыхть и палыхть пси толса менельхне, и солайхть менелень валдоптыхневок.13А минь Шкайть надияфтоманц коряс учтама од менель и од мастор, конатнень лангса кармай азорондама видешись.

Касода-кемокстада пароказнеса

14Сяс, кельгома ялгат, тянь учемста, тиесть семботь: ся пингоня Сон муледязь тинь арушиса и афсатыксфтомокс, Сонь мархтонза ладяйкс.15И лувость Сонь куватьс кирдемшканц эстейнть идемакс. Тянь колга сёрмадсь тейнть минь кельгома ялганьке Павел, ся смузьшиса, кона максфоль тейнза вярде.16Тянь колга сон сёрмады сембе сёрманзон эса, коса сон азонды ня тефнень колга. Ня сёрматнень эса улихть стама васттка, конатнень стака шарьхкодемс и конатнень кржа содайхне и аф кеме вайме ломаттне колсесазь-тапсесазь. Синь колсесазь и лия Сёрматфксненьге и тяфта таргайхть эсь лангозост юмама-арама.

17Кельгома ялгане, тейнть инголькиге содаф тя. Сяс ванфтода пря: афоледязь уска эсь мельгаст шкайфтомотнень васькафты-эрьготьфти валсна и афоледе пра кеме юронтень лангста.18Но, меколанкт, касода-кемокстада, сяда крхкаста содасть Азороньконь и Идиеньконь Иисус Христость и Сонь пароказненц. Улеза Тейнза шнама кода тяни, стане и пефтома пингс! Аминь.


*а 3:10 Тяса корхтави менелень тяшттнень, ковть и шить колга.


предыдущая глава Глава 3 следующая глава