Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ПЁТОРОНЬ ВАСЕНЦЕ СЁРМАЦ

Глава 1

Шумбракстомась

1Пётр, Иисус Христосонь апостолоц, кучи пара вал Шкаень кочкафненди, конат сратфт Понтонь, Галатиянь, Каппадокиянь, Асиянь и Вифиниянь аймакнень эзга и конат эряйхть тя масторлангса кода ширде саф ломатть.2Шкай Аляньке Эсь содаманц-няеманц коряс инголькиге ни кочкадязь тинь и тиедязь Эсь Ваймопожфонц вельде Эстейнза иняру ломанькс. Тяфта тинь тиефтяда кулхцондыкс Иисус Христости и ульхтяда штафт Сонь версонза. Сяда лама пароказнеда и сетьмошида максовоза тейнть!

Надиямась пефтома пингонь эряфть лангс

3Улеза шнаф Шкайсь, Иисус Христос Азороньконь Аляц! Сон вельмафтозе кулофста Иисус Христосонь и тянь вельде, Эсь оцю кельгозь ужяльдеманц коряс, шачфтомазь минь од эряфонди и макссь тейнек кеме надияма.4Шкайть эзда минь учсаськ ся инголькиге аноклаф паршить, кона аф юмай, аф гастяви и аф пужи, и кона тяни кирдеви-ванфтови тейнть менельса.5А тинь, кемамантень вельде, ванфнетядязь Шкаень вийсь, кона вяттядязь идемас. Тя идемась анок ни и панжеви пингть мекольдень шистонза.6Сяс кеняртькшнеда тянди, аф ваномок ся ризфнень и ся стакашитнень лангс, конатнень тейнть сави аф ламос няемс-кирдемс.7Мянь зрняське варчсеви-серепневи толса, тянь вельде няфтеви сонь афкуксшиц. Тяконь лаца тинь кемамантевок, кона сяда питни юмай зрнять коряс, варжави-сяряптеви ня стакашитнень вельде: улеза тинь кемаманте шнама вастокс, иневалдокс и пара лувксокс Иисус Христосонь сама шистонза.8Тинь кельгсасть Сонь, хуш и ашесть няенде. Сон тянивок аф няеви тейнть, но сембе сяка тинь кематада Тейнза и кеняртькшнетяда оцю и валда кенярдемаса,9сяс мес тинь пачкотькшнетяда сянди, мезе вешсь тинь кемаманте – ваймонь идемати.

10Тя идемать колга лама арьсесть и крхкаста тонафнесть пророкне, конат аноконди азонкшнесть тейнть максови пароказнеть колга.11Синь ёрасть шарьхкодемс, кодама пинге и тев лангс няфнесь синь эсост эряй Христость Ваймопожфоц, кона аноконди азондсь Христость маятаманзон колга и мельгаст моли иневалдть колга.12Тейст панчфоль: мзярда синь корхтасть ня тефнень колга, синь покодсть аф эстейст, а тейнть. Тяни ня тефнень колга тейнть пачфтсть сят, конат менельста кучф Иняру Ваймопожфть вийса кандсть тейнть Пара куля. Ня тефнень лангс, пчкясь, ангелхневок ванольхть оцю мяльса!

Уледа инярукс!

13Сяс, аноклада тиендемс Шкаень тев. Тинь, кода ёню ломатть, сембоса надияда Шкаень пароказнеть лангс, кона максови тейнть Иисус Христосонь самстонза.14Уледа кода кулхцонды итть и тяда вятнев визьксонь мялентень-арьсемантень мельге. Тяфта тинь тиендеде, мзярда эряде Шкайть аф содазь.15Иняру Ся, кие тинь тердедязь, сяс тиньге уледа иняруфт сембоса, мезе афоледе тие.16Вдь Сёрматфксса тяфта корхтави: «Мон иняруван, сяс тиньге уледа иняруфт».17Ся, конань тинь лемнесать Алякс, судендасы эрь ломанть тевонзон коряс, аф ваномок сянь лангс, кие сон. Сяс, улемок тя масторлангса ширде саф ломанькс, фалу эряда Шкайда пелезь и Сонь мяленц ванозь.18Содасть: тона шава эряфть эзда, конань тейнть кадондозь кунардонь пингонь алянте, тинь рамадязь аф кодамовок юмай-арай сияса али зрняса,19а Христосонь, афсатыксфтома и ару Верозть, питнидонга питни версонза.20Сон ладяфоль тянди нинге менельхнень-масторхнень тиемдост инголе, а тяни, мекольдень пинкнень, Сонь эвондазь тинь инксонт.21Христость вельде тинь кармаде кемама Шкайти, кона вельмафтозе Сонь кулофнень эзда и макссь Тейнза оцюши. Сяс тяни тиньге кематада и надиятада Шкайть лангс.

22Тяни тинь араде кулхцондыкс видешити, и тянь вельде Ваймопожфсь аруяфтозень тинь ваймонтень и макссь тейнть вий кельгомс эсь кемай ялгантень. Тяфта тиендеда сяда товга: фалу кельгода фкя-фкянь ару седиса.23Вдь тинь шачеде одукс аф наксада видьмоста, а Шкайть аф юмай-арай валстонза, кона эряй и кармай эряма пефтома пингс.24Сёрматфксса корхтави:
«Сембе ломаттне – кода тишесь,
а сембе синь оцюшисна – кода паксянь панчфсь.
Тишесь коськи, панчфське пужи и прай,
25а Азорть валоц фалу эряй».

Тя валсь – Пара куля, кона тейнть пачфтьфоль.


*а 1:16 3 Моисея 19:2

*б 1:24-25 Исаия 40:6-8


предыдущая глава Глава 1 следующая глава