Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

АПОСТОЛХНЕНЬ ТЕВСНА

Глава 27

Павелонь ильхтьсазь Риму

1Мзярда ладяфоль, тейнек уема Италияв, Павелонь и лия пякстафнень максозь кесарть полкста Юлий лемса сядонь оцюняти.2Минь озаме Адрамитонь оцю венчти, конанди эрявсь лотксемс Асиянь трваста лотксема васттненди, и лисеме оцюведти. Мархтонк ульсь нинге Фессалоника ошста Македониянь ломанць Аристарх.3Омбоце шиня минь лоткаме Сидону. Юлий тись Павелонь мархта ломанькс и нолдазе сонь ялганзонды, конат максольхть тейнза ки лангонди инь эрявиксть.

4Сидонть кадомда меле минь уеме Кипрать аф уфави трваванза, сяс мес ульсь каршек варма.5Сяльде минь оцю венченьке ётазе панжада оцюведть, уеме Киликиять и Памфилиять вакска и лоткаме Ликия аймаконь Миры ошть трвас.6Тоса сядонь оцюнясь мусь Александриянь оцю венч, кона уйсь Италияв, и озафтомазь эзонза.7Мзярошка ши минь валомне уеме и, меколи, стакаста маладоме Книд ошти. Вармась ашемазь нолда уемс сяка шири, сяс минь уеме Критть аф уфави ширьганза Салмонть вакска.8Кирдеме пря трвать маласа, и кода-аф кода пачкодеме Ласея ошть маласа ащи вастти, конанди мярьгихть «Цебярь Лотксема Вастт».

9Пингта ётась аф кржа, тяка лангс постонь шиське ни ётась, и поладомс тяфтама пингоня уемать ульсь пяк пелькс, сяс Павел мярьгсь сембонди, кит ульсть оцю венчса:10«Алят! Мон няйса, уеманьконь учендсы пелькс палас повома, зиян ули аф аньцек ускови паршити и оцю венчти, но и минь эряфоньконди».11Сядонь оцюнясь сяда пяк кемась аф Павелонди, а сянди, мезе корхтасть оцю венчень вятись и азорсь.12А сяс мес лоткама вастсь ашезь кондясте тялонь ащеманди, ламонцне аноктольхть уемс сяда тов, тяряфтомс пачкодемс Финику и ётафтомс тялоть тоса. Финиксь ульсь Критса оцю венчень лотксема вастокс, кона уфсевсь и лямбе-шивалгома ширде и кельме-шивалгома ширде.

Давол

13И вов, мзярда уфазевсь лямбе ширдень тёждя варманя, синь арьсесть-тисть, кле, тевоньке лиси, кеподезь лоткамань кячказснон и тусть уезь Критть вакска, трвать малава.14Но аф лама пингта меле усиять фталда эрьхтсь кельме давол, кона лемневи «Эвроклидон»,15и сон салазе оцю венчть, ся нльне ашезь шарфтов вармать каршес. Минь нолдаськ кяденьконь и даволсь кармась ёрямонк ведькомболкснень ланга.16Мзярда минь ётаме Клавда усиять аф уфави ширеванза, тейнек, хуш и стакаста, удалась ванфтомс идемань венчкясь.17Сонь кеподезь палубав, покодихне пиксса ашкодозь и сотнезь оцю венчть. Сяльде пелемок озамс Сиртать ваксса маця вастс, нолдазь вармань котфснон, и тяфта минь каннемазь вармась.18Омбоце шиня даволсь сядонга вишкомсь, и покодихне кармасть ёрямост канкснень ведти,19а нинге шида меле минь эсь кятть ёряськ ведти оцю венчень паршихнень-меснень.20Сяс мес менельса лама ши ашезь няев аф шись, аф тяшттне, и даволсь ашезь сетьмосе, минь юмафтоськ надияманьконь идемати.

21Оцю венчса кунара ни кивок мезьдонга ашезь ярхца. Эста Павел арась ломаттнень ёткс и мярьгсь: «Ялгат, тейнть эряволь кулхцондомс монь и аф кадондомс Критть, эста вакска ёталемазь ня зияттне и юмафксне.22Но тяни мон эняльдян тейнть, тясть ноля прянтень, сяс мес кивок ёткстонт аф юмай, минь юмафтсаськ аньцек оцю венчть.23Сяс мес тя веня тейне эвондакшнесь ангел. Сон сась Шкайть эзда, конаннян мон и конанди покодян,24и мярьгсь: "Тят пеле, Павел. Тейть сави стямс кесарть инголе, и вага, Шкайсь тонь инксот кази эряф мархтот сембе уихненди".25Сяс тясть ноля прянтень, ялгат! Мон кеман Шкайти! Сембось ули стане, кода Сон мярьгсь тейне.26Минь сяка ёрдасамазь кодама-кодама усияс».

Оцю венчть срадомац и ломаттнень идевомасна

27Мзярда сась кемнилиеце весь, кода ведькомболксне каннемазь минь Адриянь оцюведьге, веньгучка пяли покодихне шарьхкодезь – аф ичкозе мода.28Синь ункстазь крхкалмоть и няезь: потмаксти комозьшка сель. Мзяра пингонь ётазь, тага ункстазь, арась кеветиешка сель.29Аноконди пелезь, тязаст эрьхте кевс, ёрдасть венчть фталда ниле якорьхть, и учсезь шобдавать саманц.30Покодихне арьсесть ворьгодемс оцю венчста, нолдазь ведти идемань венчкять, бта срхкасть кемокстамс нярть видеса якорть.31Павел мярьгсь сядонь оцюняти и ушматтненди: «Тинь аф идефтяда, кда синь аф улихть оцю венчса».32Ушматтне эстокиге керозь венчкянь кирди пикснень и ся прась ведть лангс.

33Валдашкодомада инголе Павел кармась корхнемост сембонь ярхцамс. «Тячи моли кемнилиеце шись, кода тинь ащетяда учезь и мезьдонга апак ярхцак, – мярьгсь сон.34– Эняльдян, сускода мезьдевок, тя эряви эсь прянтень идеманкса. Эздонт киньге пряста шяярьнявок аф прай».35Тяда меле сон сявсь кядезонза кши, сембонь ингольде азсь сюконяма Шкайти, синдезе и ушедсь ярхцама.36Эста сембе эрекласть и кармасть ярхцама.37Сембоц оцю венчса ульсь кафта сятт сизьгемонь котува ломань.38Мзярда сембе топодемс ярхцасть, синь кармасть ёрямост оцюведти тозер мархта кяскафнень, тяфта тёждялгофтозь оцю венчть.

39Мзярда валдашкодсь, венчень покодихне ашезь сода модать, кона ульсь аф ичкозе, но няйсть эсонза шуваронь трва мархта ведьула. Синь арьсесть озафтомс тов оцю венчть, кда озафтови.40Синь керозь якорьхнень и кадозь тозк ведти. Сяка пингть юкссезь пикснень, конатнень вельде сотфтольхть вятема рулень милетне, вармать коряс келептезь котфть, кона ульсь ингольдень мачтаса, и вятезь оцю венчть трвати.41Но оцю венчсь повсь маця вастс и озась потмаксти; нярец пезсь шуварти – сонць ашезь шерьхков, а ведькомболксне эрьхнезь-срафнезь фталонц.42Ушматтне срхкасть машфтомс пякстафнень, сяс мес пельсть, сят уихть трвати и ворьгодихть.43Но сядонь оцюнясь ёразе идемс Павелонь и лоткафтозень синь. Сон кошардозень васенда сятнень, кит маштыхть уема, комотемс ведти и уемс трвати.44А лядыхненди уемс седяф али оцю венчста лия кодамонга пялькс лангса. Тяфта сембе идевсть, лиссть трвати.


*а 27:9 постонь шись – ётафневсь Тишри ковть 10 шиста (сентябрть – октябрть кучкаста). Тя пингть уемась арсесь пельксокс сёксень даволхнень сюнеда, и прокс лотксесть уендемда ноябрть кучкаста мартть кучкас.

*б 27:28 сель – келептьф кядень кувалма (кафтошка метра)

*в 27:39 ведьула – залив


предыдущая глава Глава 27 следующая глава