Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

АПОСТОЛХНЕНЬ ТЕВСНА

Глава 24

Павелонь муворгофтомац

1Вете шида меле Кесарияв сась Анания озксвятиень оцюнясь, мархтонза мзярошка ломаньтналонь оцюня и Римонь коень содай фкя аля – Тертулл. Синь азондозь Феликс оцюняти Павелонь каршес муворгофтомаснон.2Мзярда вятезь Павелонь, Тертулл ушедсь муворгофнемонза сонь, корхтась:3«Пара лувксонь Феликс! Тонь вельдет миндейнек максф кувака пингонь сетьме эряф и тонь смузюста тевонь вятемаце полафтозе минь ломаньтналоньконь эряфонц сяда цебяренди. Тянкса минь фалу и эрь вастова сюконякшнетяма тейть.4Мон аф карман сизефнемот и сяс эняльдян – макст тейнек аф лама пинге и кулхцондомасть минь эсь пара мяльцень коряс.5Минь лувондсаськ тя ломанть педи урмада пельксокс: сон кепси сембе масторлангонь еврейхнень ёткса таколдома, и сон Назаретонь сектать вятиец.6Минь кундаськ сонь, мзярда сон срхксесь гастямс Шкаень кудть арушинц. Минь ёраськ судендамс сонь эсь коеньконь коряс,7но Лисий тёжянень оцюнясь сась и вихца нельгозе сонь кядьстонк, кучезе тейть8и кошардомазь минь, муворгофтыензон, самс тейть. Тейть ули кода содамс эздонза семботь, мезьса минь сонь муворгофнесаськ».9Еврейхне кемокстазь ня муворгофты валхнень, кле, сембось тяфталь.

Павелонь эсь прянь араламань корхтамац

10Феликс оцюнясь няфтсь кядьса Павелонди и ся ушедсь корхтама: «Мон содаса, тон лама киза ни тият суд видешис коре тя ломаньтналть лангса, сяс аф пелезь карман аралама эсь прязень.11Тя эстейть содави, мон сань Иерусалиму кемгафтува шида инголе сюконямс Шкайти.12Прокс аф виде ся, бта муворгофтыне сатомазь монь киньге мархта пялькстома али таколфонь кеподема Шкаень кудса, синагогаса али ошень лия вастса.13Тейст аш кода кемокстамс сянь, мезьса муворгофнесамазь.14Но мон виденцян тейть: ся тонафтомать коряс, конань синь лемнесазь сектакс, мон видекс покодян алянень Шкайснонды, кеман семботи сянди, мезе тяштьф Моисеень койса и пророкнень эса.15Мон кемазь учан, кода ня ломаттневок учихть: Шкайсь вельмафтсыне кулофста кода видексшинь ломаттнень, стане аф видексшинь ломаттненьге.16Сяс мон семботь тиса ваймозень аруста ванфтоманкса ломаттнень и Шкайть инголе.

17Мон лама киза ашелень Иерусалимса и тяни сань ломаньтналозти ярмакса лезксонь максома и озксказнень тиема.18Тянь тиемста синь монь няемазь Шкаень кудса, мзярда мон ни ётафтыне аруяфтомань койть. Перьфкан ашельхть ломатть, ашель жалф, мзярс ашезь са Асияста мзярошка еврей –19вов синдейст самаль тейть и няфтемаль, мезьса муворуван, кда ули мезьсновок каршезон.20Али ва нят тяса катк азсазь: кодама зияну тев мусть эсон, мзярда мон ащень Оцю пуромксть инголе,21улема, аньцек сянь, мес ётксост кайгиста серьгядень: "Тячи тинь судендасамасть монь кулофнень вельмамаснон инкса!"»

22Тянь кулхцондомда меле Феликс, кона пяк лац содась Азоронь кить колга, лоткафтозе судса тевонь ваномать, азозе: «Кодак сай Лисий тёжянень оцюнясь, мон ванца тевонтень».23Сон мярьгсь сядонь оцюняти кирдемс Павелонь ваныхнень видеса, но аф пяк казямста, нолямс мала ломанензон мельганза якама али сашендомс тейнза.

Павел пякстамгудса

24Мзярошка шида меле Феликс сась сей Друзилла рьванц мархта, кона ульсь евреень ава. Тертьфтезе Павелонь и кулхцондозе сонь корхтаманц Иисус Христосонди кемамать колга.25Мзярда Павел ушедсь азондома видешиса эрямать, прянь кирдемать и сай пингонь судть колга, Феликсонь сявозе пелема. Сон мярьгсь: «Эрь ина, архт! Мзярда муян пинге, тертте тонь».26Тяка лангс сон надиясь, Павел максы тейнза ярмак воляс нолдаманц инкса, сяс сон сидеста кучфнесь Павелонь мельге и корхнесь мархтонза.27Ётась кафта кизот и Феликсонь вастозонза сась Порций Фест. Еврейхнень мяльснон ваноманкса Феликс кадозе Павелонь пякстафста.


предыдущая глава Глава 24 следующая глава