Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

АПОСТОЛХНЕНЬ ТЕВСНА

Глава 16

Тимофей моли Павелонь и Силань мархта

1Павел пачкодсь Дервияв и Листрав. Тоса эрясь Иисусонь фкя тонафниец, конань лемоц Тимофей. Сонь тядяц ульсь евреень ава, кона кармась кемама Иисусонди, а аляц греколь.2Тимофеень колга пара валса корхнесть кемайхне Листраса и Иконияса.3Павел арьсесь сявомс Тимофеень мархтонза, сяс керозе сонь киськопенц. Сон тянь тиезе тостонь еврейхнень инкса, сяс мес синь сембе содазь – Тимофеень аляц грек.

4Ошста ошс яказь Павел и Тимофей кошярязь кемайхнень ванфнемс ся ладяфкснень, конатнень апостолхне и кемаень пуромксонь оцюнятне ладязь Иерусалимса.5Кемаень пуромксне кемокстакшневсть кемамаса, и шиста шис кассь синь лувкссна.

Павел няи няйфкс Троадаса

6Синь ётазь Фригиянь и Галатиянь масторхнень, но Иняру Ваймопожфсь ашезень нолда синь Асияв Шкаень валть азондома.7Мисия масторти пачкодемста синь арьсесть молемс Вифиния мастору, но Ваймопожфсь ашезень нолда.8Сяс синь ётасть Мисиять пачк и састь Троада ошу.

9Веть Павел няйсь няйфкс: инголенза эвондась Македониянь аля, кона эняльдезь корхтась тейнза: «Сак Македонияв и лезтт тейнек».10Тянь няемда меле минь эстокиге срхкаме Македонияв, мяленьке кемокстафоль – Азорсь терди эсонк азондомс тоса Пара кулять.

Лидия арай Христости кемайкс

11Тяфта Троадаста минь венчса видеста пачкодеме Самофракия усияв, омбоце шиня – Неаполь ошу,12тоста – Филиппав. Тя ульсь Римонь колония и оцю ош Македониять ся пялькссонза. Тя ошса минь ащеме мзярошка ши.

13Ваймамань шиня минь лисеме ошень ортатнень омбокс и туме ляй трвава тов, коса еврейхне фалу пуромкшнесть озондома. Минь озаме и кармаме корхнема тоса пуромф аватнень мархта.14Кулхцондыхнень ёткса ульсь Фиатир ошста Шкайда пели ава, конац мишендсь шобда-якстерь котфт. Сонь лемоцоль Лидия. Шкайсь панжезе сонь седиенц сянди, мезе корхтась Павел.15Авась и кудэряензовок кстиндафтсть пря, а сяльде сон эняльдсь тейнек: «Кда афкукс лувсамасть монь Азорти кемай ломанькс, эста сада и эряда пялон». И сон корхтамазь минь.

Павел и Сила пякстамгудсот

16Весть, озондома вастти молемста, кибрязонк повсь уре стирь. Сон колафоль аф ару ваймопожфса, конань вельде азондозе сай пингть. Эсь содамошинц мархта стирсь каннесь азоронзонды оцю ярмакт.17Сон якась Павелонь и минь мельганк и юватькшнесь: «Ня ломаттне Инь Вярдень Шкайть покодиенза! Синь няфнесазь тейнек кить, кона вяти идемати!»18Тяфта сон тиендсь шиста шис. Павелонь састь кяженза, сон шарфтсь и мярьгсь аф ару ваймопожфти: «Иисус Христосонь лемса кошартте, листь эздонза!» Аф ару ваймопожфсь эзк кадозе стирть.

19Стирть азоронза кодак шарьхкодсть – юмафтозь козяшинь кандыснон, кундазь Павелонь мархта Силань и сявозь мишендема-рамсема вастти, ошень оцюнятнень кядьс.20Вятемок апостолхнень ошень оцюнятненди, пеняцясть лангозост: «Ня ломаттне – еврейхть и синь кепсихть таколдомат ошсонк,21тонафтыхть эсь койснонды-иласнонды, конатнень тейнек, Римонь ломаттненди, сявомс и пяшкотькшнемс аш кода».22Ломаттневок арасть каршек Павелонди и Силанди. Эста ошень оцюнятне мярьгсть сязендемс Павелонь и Силань лангста щапнень и пикссемс байдекса.23Синь пяк пикссезь и ёрдазь пякстамгуду, а ваныть кошардозь лацкас ваномдост.24Тяфтама кошардомада меле ванысь пякстазень синь потмостонь вастс и пинкстазень пильгснон шуфтонь кандс.

25Пялеве малава Павел и Сила озондсть и морса шназь Шкайть, а лядыкс пякстафне кулхцондозь синь.26Апак учт сяшкава вииста шерьхкозевсь модась, нльне тарозевсь пякстамгудть алксоц. Эстокиге панжевсть сембе кенкшне, и сембе пякстафнень пильгста прасть цинзерхне.27Мзярда ванысь сргозсь и няезень пякстамгудонь панжада кенкшнень, сонь прязонза эрьхтсь – сембе пякстафне ворьгодсть. Эста сон фатясь тор и ёразе машфтомс эсь прянц.28Но Павел кайгиста ювадсь: «Мезевок тят тие эсь мархтот! Минь сембе тясотама!»

29Ванысь мярьгсь крьвястемда тол и ёрдась пря пякстамгуду. Сон трнатозь прась Павелонь и Силань пильгс.30Сяльде лихтезень синь тоста и кизефтезень: «Азорхт, мезе мондейне тиемс эсь прянь идеманкса?»31Синь каршезонза: «Кемак Иисус Христос Азорти, эста идеват тонць и сембе кудэряйхневок».32И синь кармасть азондома Шкаень вал тейнза и сембе кудэряензонды.33Пякстамгудонь ванысь вень ся пингоня сявозень синь, штазень ронгстост керсеф-тапсеф васттнень, и эстокиге кстиндафтозе эсь прянц и сембе кудэряензон.34Сон вятезень синь эсь пялонза, озафтозень шра ваксс ярхцама, и кенярдсь марнек кудстонзотнень мархта, мес кармась кемама Шкайти.

35Шобдава ошень оцюнятне кучезь эсь лездыснон пякстамгуду кошардомаснон пачфтема: «Нолдасть ня ломаттнень».36Пякстамгудонь ванысь мярьгсь Павелонди: «Ошень оцюнятне мярьгсть нолдамс тонь и Силань! Арда сетьмоши мархта!»37Но Павел мярьгсь: «Минь, Римонь ломаттнень, судфтома сембонь ингольде пикссемазь, ёрдамазь пякстамгуду, а тяни салава нолдайхть эсонк? Аф, катк сайхть синць и лихтьсамазь тяста».38Ошень лездыхне пачфтезь тянь ошень оцюнятненди, и мзярда сят кулезь – Павел и Сила тя Римонь ломатть, эводсть.39Синь састь и эняльдсть нолдамс шумоснон, лихтезь пякстамгудста и мярьгсть тумс ошста.

40Пякстамгудста лисемда меле Павел и Сила састь Лидиянь пяли. Тоса синь васедсть кемай ломаттнень мархта и кеподезь синь мяльснон. Сяльде синь тусть сяда тов.


*а 16:11 усия – остров


предыдущая глава Глава 16 следующая глава