Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

АПОСТОЛХНЕНЬ ТЕВСНА

Глава 14

Павел и Варнава Икониясот

1Иконияса Павел и Варнава тяфта жа сувасть евреень синагогав и сяшкава кемафтозь корхтасть, нльне кармась кемама ламодонга лама еврейда и лия тналонь ломаньда.2Но еврейхне, конат ашесть кема, каршек латцезь лия тналонь ломаттнень и срхкафтсть эсост кяж кемайхнень каршес.3Павел и Варнава сяка ламос ляткшнесть тоса. Синь апак пельхть азондсть Азорть колга, и Азорсь кемокснезе Эсь пароказненц колга валть тяштьксса и дивань тевса, конат тиендевсть апостолхнень кядьснон вельде.

4Ошэряйхнень мяльсна явожсть: финцне ульсть еврейхнень инкса, омбонцне – апостолхнень.5-7Еврейхне и лия тналонь ломаттне корхтазь ошень оцюнятнень. Синь састь фкя мяльс, марса врьгятемс лангозост и шавомс синь кевса. Мзярда апостолхне содазь тянь, синь ворьгодсть Ликаонияв и тоса азондозь Пара кулять Листраса и Дервияса, и ня ошнень аймаковаст.

Павел и Варнава Листрасот

8Листраса эрясь аля, конань пильгонза лафчтольхть шачемстокиге, и сон мзярдонга ашезь якав.9Тя алясь кулхцондозе Павелонь корхтаманц. Павел варжакстсь лангозонза и няезе: тя ломанть стама кемамац, конань вельде сон пчкафтови.10Павел кайги вайгяльхть ювадсь: «Корхтан тейть Иисус Христос Азорть лемса: стяк пильге лангс!» И сон эстокиге комотсь и ушедсь якама.

11Ломаттне няезь, мезе тись Павел, и кармасть пешкоткшнема ликаониянь кяльса: «Тейнек валгсть шкайхне ломанень калопса!»12Варнавань синь лемнезь Зевсокс, а Павелонь Ермиекс, сяс мес сон вятезе корхтамать.13Ошень ортатнень фтала ащесь Зевс шкайти озондома кудсь. Тя шкаень кудть озксвятиец вятсь ортатненди букат и кандсь панчфонь каштаст, сяс мес сон ёрась ломаттнень мархта марса кандомс озксказне апостолхненди.

14Но апостолхне Варнава и Павел, кодак кулезь тянь, сязезь мяштьстост щамснон, ёрдасть пря ломаттнень ёткс и кайгиста ювадсть:15«Ломатть, тинь месенттяда? Минь тинь лацонт ломаттяма! Минь саме тейнть Пара кулянь азондома, кадозалесть тинь аф афкуксонь шкайхненди сюконякшнемантень и шарфтозаледе эряй Шкайти, кона тиезе менельть, масторть, оцюведть и семботь, мезе эсост.16Ётай пинкнень Сон нолязе эрь ломаньтналти молемс эсь киганза.17Но эстонга Сон няфнезе Эсь прянц цебярь тевса: кучсесь тейнек менельста пизем и иможень кенерема пинкт, макссесь ярхцамбяль и пяшкотькшнезе седиеньконь кенярдемада».18Тянь азондомок, синь кода аф кода кирдезь ломаттнень озксказнень тиемада и мярьгсть эрти тумс куду.

Павел и Варнава ляткшнесть Листраса и тонафнезь ломаттнень. Ся пингста,19мзярда апостолхне мезьдонга аф пелезь азондсть Шкаень вал, Антиохияста и Иконияста састь еврейхть и кемафтозь ломаттнень аердомс эздост, корхтасть: «Синь корхтамасост аш мезевок виде, а сембось васькафнема». И ладязь ломаттнень каршезост. Синь пикссезь Павелонь кевса и ускозь сонь пакся ушу, арьсесть куломс шавозь.20Но мзярда перьфканза пуромсть тонафнихне, Павел стясь и тусь ошу. Омбоце шиня сон Варнавань мархта тусь Дервияв.

Павел и Варнава мрдайхть Сириянь Антиохияв

21Тя ошса синь азондозь Пара кулять, ламонцнень шарфтозь Азорти тонафникс, сямольде мрдасть Листрав, а тоста Иконияв и Антиохияв.22Сембе вастова синь кемокснезь тонафнихнень ваймопожфснон, тонафтозь ванфтомс кемамаснон, корхтасть: «Лама маятама вельде тейнек сувама Шкаень Оцязорксшити».23Апостолхне кочксесть тейст оцюнят эрь кемаень пуромксса, путнезь лангозост кядьснон и, озондомада и постта меле, макссезь Азорти ванфтомс синь, Азорти, конанди сят кармасть кемама.

24Меле апостолхне ётасть Писидиять пачк и састь Памфилияв.25Пергияса Азорть валонц азондомда меле тусть Атталияв,26а тоста ведьге мрдасть Антиохияв, коста эсь пингстонза синь ульсть максфт Шкаень пароказнети тиемс ся тевть, конань тяни ни пяшкодезь.27Антиохияв самста синь кочказь кемаень пуромксонь сембе ломаттнень и азондозь тейст, мезе Шкайсь тись синь вельдест и кода Сон панжезе лия тналонь ломаттненди кемамань кенкшть.28Синь нинге ламос лядондсть тоса тонафнихнень мархта.


предыдущая глава Глава 14 следующая глава