Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

СВЯТОЙ АПОСТОЛ ПАВЕЛЫН ЕВРЕЙ-ВЛАКЛАН КОЛТЫМО СЕРЫШЫЖЕ

Глава 11

1-40 Ӱшанымаш.

1А ӱшанымаш – вучымынан шукталтмыже, ужын керташ лийдымылан ӱшанымаш.2Тиде ӱшанымаштак Юмо ожнысо еҥ-влак нерген сай таныклымашым пуэн.

3Ӱшанымаш дене ме курым-влакын Юмын шомак дене ышталтмыштым умылена: койдымо гыч койшо шочын.

4Авель ӱшанымаш дене Юмылан Каинын деч сайрак надырым пуэн, ӱшанымаш денак чын ыштыше улмыж нерген таныклымашым налын: Юмо тудын пӧлекше-влак нерген сай таныклымашым пуэн. Ӱшанымаш дене тудо колымекыжат ойла.5Ӱшанымыжлан кӧрак Енохым, колымашым уждеак, тиде тӱня гыч налме. Тудым муаш лийын огыл, вет Юмо тудым тиде тӱня гыч кусарен. Пылпомышыш налме деч ончыч тудо Юмылан йӧрышӧ лиймыж нерген таныклымашым налын.6А ӱшанымаш деч посна Юмылан йӧрышӧ от лий. Юмо уло да Тудым кычалше-влаклан суапым пуа манын, Юмо деке толшо ӱшанышаш.7Мо але койшо лийын огыл, тудын нерген Ной ӱшанымаш дене палдарымашым налын да, Юмым чот пагален, шке ешыжым утараш ковчегым ыштен. Ӱшанымыж дене тудо тӱням титаканыш луктын, да ӱшанымылан кӧра тудо чыныш лукмашын наследникше лийын.

8Наследствылан налшаш кундемыш каяш ӱжмым Авраам ӱшанымылан кӧрак колыштын да кушко кайымыжым палыдеак тарванен.9Ӱшанымаш дене тудо ӧрдыж еҥ семын сӧрымӧ мландыште илаш тӱҥалын да Исаак ден Иаков дене пырля вынер омашыште илен, нунышт тиде сӧрымынак наследникше-влак лийыныт.10Авраам пеҥгыдын негызлыме олам вучен, тудын архитекторжо да чоҥышыжо – Юмо.11Йочам ыштен кертдыме Сарра ӱшанымаш дене тукымым шуяш вийым налын да, шоҥго гынат, азам ыштен, вет сӧрымашым Пуышо ӱшанле манын пален.12Санденак ик айдемын, моткоч шоҥгемшын, кавасе шӱдыр виса, теҥыз серысе шотлен пытарыдыме ошма пырче наре шочшыжо лийын.

13Чылан нуно ӱшанымаште коленыт, сӧрымым налын огытыл, тора гыч веле тудым ужыныт да куаненыт, мланде ӱмбалне йот да ӧрдыж еҥ улына манын почын ойленыт.14Кӧмыт тыге ойлат, нуно шке элыштым кычалмыштым ончыктат.15А коден кайыме элышт нерген шонат ыле гын, нуно пӧртыл кертыт ыле.16Но нуно сайрак элыш, вес семынже, пылпомышсыш, шуаш тыршеныт, сандене Юмо нунын Юмышт улам маналташ ок вожыл, вет Тудо нунылан олам ямдылен.

17Ӱшанымылан кӧра Авраам, тудым тергыме годым, Исаакым надырлан конден. Сӧрымашым налмеке, ик шкет эргыжым пуаш ямде лийын.18Юмо тудлан каласен улмаш: «Тыйын тукымет Исаак гоч шуйна».19Юмо колымаш гычат ылыжтен кертеш, шонен тудо, санденак эргыжым мӧҥгеш налын, тидыже ылыжтымаш нерген ончылгоч палдарымаш лийын.20Ӱшанымаш дене Исаак, ончыкылык нерген шонен, Иаков ден Исавым благословитлен.21Ӱшанымаш дене Иаков колымыж годым Иосифын эргыж-влакым благословитлен да, шке тояж ӱмбаке эҥертен, Юмылан вуйым савен.22Ӱшанымаш дене Иосиф илыш гыч кайымыж годым Израиль эрге-влакын Египет гыч лекмышт нерген ойлен да шке лулегыж дене мом ыштышашым кӱштен коден.

23Ӱшанымаш дене Моисейын ача-аваже тудым шочмо деч вара кум тылзе шылтен ашненыт, вет аза мотор улмым нуно ужыныт да кугыжан кӱштымыж деч лӱдын огытыл.24Ӱшанымыжлан кӧра Моисей, кушкын шумекыже, фараон ӱдырын эргыже манын лӱмдалташ тореш лийын,25язык дене кӱчык жап ракатланыме деч сайраклан Юмын калыкше дене пырля орланымым шотлен.26Христос семын мыскылалтмым Моисей Египетын поянлыкше деч шергаканлан шотлен, вет тудо ончыкылык суапышке ончен.27Ӱшанымыже дене тудо, кугыжан шыдыж деч лӱдде, Египетым коден каен, Ужаш лийдымым пуйто ужмыла пеҥгыде лийын.28Пытарыше суксо Израиль калыкын кугергыж-влакым ынже тӱкӧ манын, Моисей ӱшанымаш дене Кугечым да вӱр шыжыктымашым ыштен.29Ӱшанымаш дене Израиль калык Йошкар теҥызым кукшо вер дене вончымо семын вончен, а кунам египтян-влак тидымак ышташ тӧченыт, вӱд йымалан кодыныт.30Израиль калык шым кече Иерихон пырдыж йыр коштмеке, ӱшанымыштлан кӧра пырдыж шаланен.31Ӱшанымыжлан кӧра Раав, яжар ӱдырамаш, шекланаш толшо-влакым порын вашлийын [да вес корно дене ужатенат], Юмым колыштдымо-влак дене пырля колен огыл.

32Мом эше каласем? Гедеон, Варак, Самсон ден Иеффай, Давид, Самуил да [моло] пророк-влак нерген каласкалаш мыйын жапем ок сите.33Ӱшанымаш дене нуно кугыжаныш-влакым сеҥеныт, чыным ыштеныт, Юмын сӧрымыжым налыныт, лев-влакын умшаштым петыреныт,34тулын вийжым сеҥеныт, керде деч утленыт; вийдымылыкышт вийыш савырнен; сарыште виян лийыныт, йот сарзе полк-влакым поктен колтеныт.35Ӱдырамаш-влак шкеныштын колышо-влакыштым ылыжшым мӧҥгеш налыныт. А южышт, сайрак ылыжмашыш шуаш манын, шкеныштым эрыкыш лукмылан тореш лийыныт, да нуным орландарен пуштыныт.36Молышт мыскылымым, кырымым, тыгак шинчырлымым да петырен шындымым чытеныт.37Ӱмбакышт кӱм кышкеныт, пила дене кокыте пӱчкыныт, чот орландарен тергеныт, керде дене руал пуштыныт; нунылан шорык ден каза коваштым чиен кошташ логалын, ситыдымашым, шыгыремдылмашым, орландарымым чытеныт.38Нуным уло тӱняжат шоген огыл, нуно ир мландыште, курыклаште коштыныт, курык рожлаште, мланде вынемлаште иленыт.

39Нуно чыланат ӱшанымаш гоч сай таныклымашым Юмо деч налыныт гынат, сӧрымым налын огытыл.40Нуно мемнан деч посна тичмашлыкыш ынышт шу манын, Юмо, мемнан нерген шонен, ала-мом сайракым ямдылен.


*а 11:5 Енох – иудей калыкын тӱҥалтыш годсо ик кугезыже. Илыш мучашыштыже колыдеак Юмо деке налме лийын. Быт 5:21-24.

*б 11:18 Быт 21:12

*в 11:21 Быт 47:31.

предыдущая глава Глава 11 следующая глава