Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

СВЯТОЙ АПОСТОЛ ПАВЕЛЫН ЕВРЕЙ-ВЛАКЛАН КОЛТЫМО СЕРЫШЫЖЕ

Глава 10

19-39 Сӧрвалымаш да шижтарымаш.

1Законышто шушаш суапын ӱмылжӧ гына уло, а тудын чын сынже огыл. Сандене закон Юмын ончыко толшо-влакым ий еда кондымо икгаяк надыр дене нигунам тичмашлыкыш шуктен огеш керт.2Уке гын тудым кондымым чарнат ыле, вет служитлыше-влак ик гана эрналтыныт гын, языкыштын нелытшым ынде огыт шиж ыле.3Но надыр ий еда язык нерген шарныкта.4Вет ӱшкыжын да каза таган вӱрышт языкым пытарен огыт керт.

5Сандене Христос тӱняш толмыж годым ойлен:
«Надыр ден пӧлекым Тый ынет нал улмаш,
но капым Мыланем ямдыленат.
6Йӱлалтыме кумалтыш вольык
да язык верч пуымо надыр
Тыланет келшен огытыл.
7Тунам Мый ойленам: теве, Юмо,
книгаште Мыйын нерген возымо семын
Тыйын эрыкетым шукташ мием».
8Ондак ойлен: «Надырым, пӧлекым, йӱлалтыме кумалтыш вольыкым, язык верч пуымо надырым Тый ынет нал улмаш, да нуно Тыланет келшен огытыл». А нуным закон почеш кондыман.9Вара каласен: «Теве, Юмо, Тыйын эрыкетым шукташ мием». Кокымшыжым ышташ манын, икымшыжым укешке луктеш.10Юмын тиде эрыкше почеш ме Иисус Христосын капшым ик гана жертвылан пуымо дене святитлыме улына.

11Кеч-могай иерей кече еда служитлен шога да шуко гана икгай надырым пуа, а тыгай надыр нигунам языкым кораҥден огеш керт.12А Христос язык верч ик жертвым пуэн да Юмын пурла могырышкыжо эрелан шинчын.13Тиде жап гыч тушманже-влакым йол йымакыже пыштымым вуча.14Вет Тудо святитлыме-влакым ик жертве дене эрелан тичмашлыкыш шуктен.

15Тидын нерген мыланна Святой Шӱлыш таныкла, вет ондакше тыге каласыме:16
«Теве сугынь, могайым нине кече-влак деч вара
нунылан пуэм, каласа Господь:
Шкемын законем нунын шӱмышкышт пыштем
да тудым ушешышт возем,
17языкыштым да закондымылыкыштым ынде ом шарналте».
18А кушто Юмо айдемын языкшым кудалтен, тушто язык верч надырым пуымо ок кӱл.

19-20Иза-шольо-влак, святой дечат святой верыш Иисусын Вӱржылан кӧра пурен кертмылан ме ӱшанена: пӱрдыш гоч, вес семынже шке Капше гоч, Тудо мыланна илыше да у корным почын.21Юмын пӧртым кучышо кугу Иерейна мемнан уло.22Тугеже, вияш шӱм да тичмаш ӱшанымаш дене, титакан совесть деч шыжыктен эрныктыме шӱм да яндар вӱдеш мушмо кап дене Юмо деке мийышаш улына.23Ме почын ойлымо ӱшанен вучымашнам пеҥгыдын кучышаш улына, вет сӧрымашым Пуышо – ӱшанле.24Йӧратымаш да поро пашалан икте-весынам кузе кумылаҥдаш манын, икте-весына верч тыршышаш улына.25Южыштын семын шкенан черке погынымашкына коштмым чарнышаш огынал, а икте-весым кумылаҥдышаш, жап эртыме семын тидым эшеат утларак ыштышаш улына, вет тиде кече лишеммым те ужыда.

26Чыным пален налмекат, ме языкым лӱмын ыштылына гын, тугеже языкна верч надыр ынде ок код,27судым лӱдын вучымаш да ваштареш шогышо-влакым нелаш ямде орышо тул веле кодеш.28Моисейын законжо деч кораҥше еҥым кок-кум еҥын таныклымыже почеш колымашлан чаманыде судитлат.29Юмын Эргым шотлыдымо, шкенжымат святитлыше сугынь Вӱрым святойлан шотлыдымо да порылык Шӱлышым мыскылыше еҥ кунар нелынрак мут кучышашым шога манын шоналтыза!30
«Мый ӱчым шуктем, Мый пӧртылтем, ойла Господь».
Тидым Кӧ каласен, ме Тудым палена. Тыгак каласыме:
«Господь шке калыкшым судитлаш тӱҥалеш».
31Илыше Юмын кидышкыже логалаш шучко.

32Ончычсо кечыда-влакым шарналтыза, тунам те, волгыдыш лукталтмеке, кугу орланымаш ден неле кучедалмашым чытен лектында.33Южгунам тендам чылан ончылно мыскыленыт, орландареныт, южгунам тыгайым чытыше воктеке шогалында.34Те петырымаште лиймем годым мый денем пырля орланенда да, пылпомышто сайрак да пытыдыме погыда улмым пален, погыдам агымым куанен чытенда.35Тыгеже шкендан лӱддымылыкдам ида кудалте, тудо тыланда кугу суапым конда.36Сӧрымым Юмын эрыкшым шуктымо дене налаш манын, тыланда чытымаш кӱлеш.37Вет каласыме:
«Эше изиш, моткоч изиш лиймеке,
Толшашлык толеш да ок юватыл.
38Чын ыштыше айдеме
ӱшанымашыж дене илаш тӱҥалеш,
а чакна гын,
поро шонымашем тудын велне ок лий».
39Ме пытымашке чакнен кайыше огынал, а утарымашке ӱшанен каена.


*а 10:7 Эрык – воля, желание.

*б 10:9 Эрык – воля, желание.

*в 10:5-9 Пс 39:7-9.

*г 10:10 Эрык – воля, желание.

*д 10:16-17 Иер 31:33-34.

*е 10:30 Втор 32:35-36.

*ж 10:36 Эрык – воля, желание.

*з 10:37-38 Авв 2:3-4.

предыдущая глава Глава 10 следующая глава