Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

СВЯТОЙ АПОСТОЛ ПАВЕЛЫН ЕВРЕЙ-ВЛАКЛАН КОЛТЫМО СЕРЫШЫЖЕ

Глава 9

1-22 Мланде ӱмбалсе да пылпомышсо храмыште служитлымаш. 23– 10:18 Христосын жертвыже дене языкым кораҥдымаш.

1Тыгеракын, икымше сугынь годым калыкын Юмылан служитлымым палемдыше радамже да тиде тӱнясе святой верже лийыныт.2Икымше скинийым шогалтыме, тушто светильник, ӱстел, надыр кинде уло, да тиде скинийым «святой» маныт.3А кокымшо пӱрдыш вес велне «святой дечат святой» манме скиний верлана.4Тушто тӱтыраш шӧртньӧ дене ыштыме ӱстел да чыла могырым шӧртньӧ дене леведме сугынь ковчег уло. Ковчегыште манным аралыме шӧртньӧ ате, Ааронын пеледше пондыжо да сугыньым возыман кок кӱ оҥа кият.5Ковчег ӱмбалне Юмын чапше дене йолгалтше херувим-влак серлагыме верым леведыт. Тидын нерген ынде тичмашын каласкалыме ок кӱл.

6Тыгай радам годым икымше скинийыш иерей-влак служитлыме пашаштым шукташ эре пурен коштыт.7А кокымшо скинийышкыже ийлан ик гана архиерей гына пура, тунамжат пеленже вӱрым налшаш, тудым шке верчше да калыкын палыде ыштыме языкше верч надырлан конда.8Икымше скиний шогымо годым эн святой верыш корным эше почмо огыл манын, Святой Шӱлыш ончыкта.9Чыла тиде – кызытсе жапым туштен ончыктымаш: пӧлекым да надырым кондат, но нунышт Юмылан тыге служитлыше еҥын совестьшым тӱрыснек эрныктарен огыт керт.10Кочкыш, йӱыш да тӱрлӧ мушкылтмо йӱла-влак семынак надырым кондымашат – кап дене кылдалтше кӱштымаш веле, чыла тидыже уэмдымаш жап марте гына лиеш.

11Но Христос, мемнам вучышо суапын Архиерейже, кугурак да сайрак скиний дене ынде толын. Тиде скинийже кид дене ыштыме огыл, Юмын ыштыме тиде тӱня гыч огыл.12Каза таган да ӱшкыжын вӱржӧ дене огыл, а Шкенжын Вӱржӧ дене Христос икана эн святой верыш пурен да курымашлык сулен налмашым мыланна ыштен.13Вет каза тага ден ӱшкыж вӱрым да тунан ломыжшым шыжыктымаш шакшемше-влакын кап ден чоныштым эрыкта да святитла гын,14тугеже Христосын Вӱржӧ мыняре шукырак ышта! Тудо Святой Шӱлыш дене Шкенжым Юмылан титакдыме жертве семын пуэн. Христосын Вӱржӧ мемнан шӱмнам колымашке наҥгайыше паша деч эрыкта, да ме илыше да чын Юмылан служитлен кертына.

15Ӱжмӧ-влак сӧрымӧ курымашлык наследствым налышт манын, Христос, икымше сугынь годымсо титакым сулен налаш колымеке, у сугыньын ходатайже лийын.16Кушто завещаний уло, тушто завещанийым возышын колымыжым пеҥгыдемден ончыкташ кӱлеш,17завещаний колымо деч вара веле вийыш пура. Возышын илымыж годым тудын нигунамат вийже уке.18Садланак икымше сугынят вӱр деч посна пеҥгыдемдалтын огыл.19Вет Моисей, законысо чыла кӱштымым уло калыклан ойлымеке, ӱшкыжын да каза таган вӱрыштым, тыгак вӱдым, йошкар межым да иссоп укшым налын, закон книга ӱмбакат, калык ӱмбакат шыжыктен.20Тудо ойлен: «Тиде сугынь вӱр, сугыньжым Юмо тыланда шукташ кӱштен».21Тыгак скинийымат, Юмылан служитлыме годым кучылтмо чыла ӱзгарымат вӱр дене шыжыктен.22Закон почеш чылам гаяк вӱр дене эрныкташ кӱлеш, да вӱрым йоктарыме деч посна титакым касарымаш огеш лий.

23Тыгеже пылпомышсо дене келшен толшо-влакым тыге эрныкташ кӱлеш, а чыла пылпомышсым шкенжым – тидын дечат сайрак надыр дене.24Вет Христос кид дене ыштыме святой верыш огыл пурен – тидыже чын святой верын тӱсшӧ веле – а ынде мемнан верч Юмын ончылан шогалаш манын, пылпомышкак пурен.25Святой дечат святой верыш ий еда шкенжын вӱржӧ дене огыл пурышо тыглай архиерей семын Христос Шкенжым шуко гана жертвылан пуаш тушко пурен огыл,26уке гын тӱня тӱҥалтыш гычак Тудлан шуко гана орланен колаш логалеш ыле. Ынде, саман мучаште, Шкенжын жертвыже дене языкым пытараш, Тудо ик гана гына тӱняшке толын.27Айдеме ик гана колышаш, а вара суд лиеш,28Христос денат тыгак: шукыштын языкыштым Шке ӱмбакыже налаш манын, Тудо Шкенжым ик гана жертвылан пуэн, а кокымшо гана языклан кӧра огыл, а Тудым вучышо-влакым утараш толеш.


*а 9:16 Ик грек мутак «завещанийым» да «сугыньым» але «ойпидышым» ончыкта.

*б 9:20 Исх 24:8.

предыдущая глава Глава 9 следующая глава