Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

СВЯТОЙ АПОСТОЛ ПАВЕЛЫН ЕВРЕЙ-ВЛАКЛАН КОЛТЫМО СЕРЫШЫЖЕ

Глава 7

1-14 Мелхиседек иерей. 15-28 Мелхиседек гай у иерей.

1Тиде Мелхиседек, Салимын кугыжаже, Кӱшнысӧ Юмын иерейже улмаш. Кугыжа-влакым сеҥыме деч вара Авраамын пӧртылмыж годым тудым Мелхиседек вашлийын да благословитлен.2Авраам тудлан мо улыж гыч луымшо ужашым пуэн. Мелхиседек эн ончыч, шке лӱмжӧ мом ончыктымо дене келшышын, «чын ыштыше кугыжа», а вара Салимынат кугыжаже, тидыже «тыныслыкын кугыжаже» манмым ончыкта.3Тудын ачажат, аважат, тукымвожшат уке, тудын илыш кечыже тӱҥалтышдыме да мучашдыме. Тудо – Юмын Эрге гай, эре иерей лиеш.

4Шоналтыза, могай тудо кугу: Авраам тӱҥ кугезат сеҥен налмыж гыч эн сай луымшо ужашым тудлан пуэн.5Тыгак Левий тукым гыч иерейлан шогалтыме-влакын калык деч, вес семынже шке иза-шольо-влак деч – кеч нунат Авраам тукым улыт – закон почеш луымшо ужашым налаш кӱштымашышт уло.6Но Мелхиседек нунын тукым гыч лийын огыл, туге гынат Авраам деч луымшо ужашым налын да сӧрымашым налшым благословитлен.7Изиракым кугурак благословитла, тиде ӱчашыдеак раш.8Ик радам годым луымшо ужашым колышаш еҥ-влак налыт, а вес радам годым – ила манын таныклыме айдеме налеш.9Да каласаш лиеш: луымшо ужашым налше Левий шкежат Авраам гоч луымшо ужашым пуэн,10вет Мелхиседекын Авраамым вашлиймыж годым Левий эше ачажын кӧргыштыжӧ лийын.

11Левий тукымын иерейлан ыштымыже тичмашлыкыш шуктен гын – нунын сомылышт Израиль калыклан законын негызше улеш, – тугеже Аарон семын огыл, а Мелхиседекын иерей радамже дене лекше вес иерейже эше молан кӱлеш ыле?12Вет иерей радам вашталтеш гын, законат вашталтшаш.13Кӧн нерген тиде ойлалтеш, Тудо вес тукым гыч лектын, тиде тукым деч лекше кокла гыч иктыжат жертвенник воктене ыштен огыл.14Пале вет: мемнан Господьна Иуда тукым гыч волгалт лектын, а тиде тукым шотышто Моисей иерей-влак нерген нимом каласен огыл.

15Мелхиседек гай вес иерей шогалеш гын, чыла тидыже эшеат рашрак коеш.16Тудо айдеме нерген ойлышо законысо кӱштымаш почеш огыл, а пытыдыме илышын куатше почеш иерей лийын.17Возымаш таныкла:
«Мелхиседекын иерей радамже дене
Тый курымашлык иерей улат».

18Тыгеракын, ончычсо кӱштымашын вийже да пайдаже лийын огыл, садлан кӧра тудо пытаралтеш,19вет закон нимом тичмашлыкыш шуктен огыл, а кызыт мыланна Юмо деке лишемаш йӧным ыштыше сайрак ӱшанен вучымаш пуалтеш.

20Тидыже товатлыме деч посна лийын огыл.21Молышт товатлыде иерей лийыныт, а Тудо – товатлыме мут дене, Тудлан Ойлышын тиде шомакше дене:
«Господь товатлен
да тидлан ок ӧкынӧ:
Мелхиседекын иерей радамже дене
Тый курымашлык иерей улат».
22Сандене Иисус сайрак сугынь верч шогышо лийын.23Моло иерей шуко лийын, вет пашаште эрелан кодаш колымаш нунылан чаракым ыштен.24А Иисус курым-курым дене ила, иерей улмыжо мучашдыме,25да Тудын гоч Юмо деке толшо-влакым тӱрыс утарен кертеш, вет Тудо нунын верч кумалаш эре ила.

26Мыланна тыгаяк Архиерей кӱлеш: святой, титакдыме, яндар, языкан-влак деч ойырымо да кава деч кӱшкӧ шындыме.27Тудын моло архиерей семын ондак Шкенжын языкшылан верч, вара калыкын языкшылан верч кече еда надырым пуаш кӱлешыже уке, вет Тудо Шкенжым Шке жертвылан пуымыж дене чылажымат икана эрелан шуктен.28Вет закон вийдыме еҥ-влакым архиерейлан шогалта, а закон деч вара лекше товатлыме шомак курым-курымешлан тичмашлыкыш шушо Эргым шогалтен.


*а 7:1-2 Быт 14:17-20.

*б 7:17 Пс 109:4.

*в 7:21 Пс 109:4.

предыдущая глава Глава 7 следующая глава