Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

СВЯТОЙ АПОСТОЛ ПАВЕЛЫН КОРИНФЯН-ВЛАКЛАН КОЛТЫМО ИКЫМШЕ СЕРЫШЫЖЕ

Глава 3

1-23 Юмын служитлышыже-влак.

1Иза-шольо-влак, мый Шӱлыш почеш илыше-влаклан ойлымо семын тыланда ойлен кертын омыл, а кап ден чон йодмо почеш илыше еҥ-влаклан, Христосым палыме шотышто аза гай еҥ-влаклан ойлымо семын каласкаленам.2Мый тыланда пешкыде кочкышым огыл, а шӧрым пукшенам, вет те але пешкыде кочкышым кочкын кертын огыдал, эше кызытат огыда керт,3те алят кап ден чон йодмо почеш илыше улыда. Тендан коклаште кӧранымаш, ӱчашымаш да келшыдымаш гын, кап ден чон йодмо почеш огыда иле мо, тӱнясе чыла айдеме семын огыл мо те ыштеда?4Вет кунам икте «Мый Павелын тунемшыже улам», а весе «Мый – Аполлосын» манын ойла, те кап ден чон йодмо почеш огыда иле мо?5Тугеже, кӧ тугай Аполлос, кӧ тугай Павел? Нуно служитлыше улыт, нунын полшымышт дене те Христослан ӱшанаш тӱҥалында. Ме кажныже Господьын мыланна ӱшанен пуымо пашажым шуктена.6Мый шынденам, Аполлос вӱдым оптен, а Юмо куштен,7сандене шындышат, вӱдым оптышат нимо огытыл, куштышо Юмо чыла улеш.8Шындыше ден вӱдым оптышо коклаште ойыртем уке, но кажныже шке пашадаржым шуктымо пашаж почеш налеш.9Ме Юмылан пырля пашам ыштена, а те Юмын пасужо, Юмын оралтыже улыда.

10Юмын порылыкшо дене мыланем пуымо моштымаш почеш мый ушан чоҥышо семын негызым пыштенам, а тудын ӱмбалан весе чоҥа. Кузе чоҥымыжым тек кажне онча.11Пыштыме негыз деч моло негызым нигӧ пыштен ок керт, тидыже – Иисус Христос.12Тиде негызеш шӧртньӧ, ший, шергакан кӱ, пушеҥге, шудо але олым дене чоҥат.13Кажнын пашаже чараш лектеш, тудым суд кече ончыкта, вет тулышто почылтеш, да кажнын пашаже могай улмым тул терга.14Кӧн чоҥымыжо чытен кодеш гын, тудо пашадарым налеш,15кӧн чоҥымыжо йӱла, тудлан эҥгекым чыташ логалеш, а шкеже утаралтеш, но тул гыч лекме семын веле.16Але огыда пале: те Юмын храмже улыда, да Юмын Шӱлыш тендан кӧргыштӧ ила?17Кӧ Юмын храмжым пытара гын, тудым Юмо пытара, вет Юмын храмже святой, да тиде храмже те улыда.

18Тек шкенжым нигӧ ок ондале. Тиде саманыште тендан кокла гыч иктаж-кӧ шкенжым уш-акыланлан шотла гын, чынак ушан лияш манын, тек ушдымо лиеш.19Вет тиде тӱнян уш-акылже Юмын ончылно ушдымылык. Тыге возымо:
«Уш-акылан-влакым Тудо нунын чоялыкышт дене куча».
20Адакшым возымо:
«Ушан-влакын шонкалымышт арам улмым Господь пала».
21Тугеже, айдеме дене иктат ынже моктане, вет чылажат тендан:22Павелат, Аполлосат, Кифат, тӱнят, илышат, колымашат, кызытсат, ончыкылыкат – чылажат тендан,23но те Христосын улыда, а Христос – Юмын.



*а 3:19 Иов 5:13.

*б 3:20 Пс 93:11.

предыдущая глава Глава 3 следующая глава