Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

СВЯТОЙ АПОСТОЛ ПАВЕЛЫН КОРИНФЯН-ВЛАКЛАН КОЛТЫМО ИКЫМШЕ СЕРЫШЫЖЕ

Глава 4

1-21 Христосын Апостолжо-влак.

1Тек еҥ-влак мемнам Христослан служитлышылан шотлат да мыланна Юмын тайныжым палдарыме пашам ӱшанен пуымым палат.2А пашам ӱшанен пуымо айдеме деч тудын ӱшанле улмыжо эн ондак йодалтеш.3Те мыйым судитледа гын, але кеч-могай айдеме суд судитла гын, мыйым тиде огеш тургыжландаре. Мый шкеат шкемым ом судитле.4Шӱмем мыйым нимо шотыштат ок титакле, но тидым чыныш лекташлан ом ойло. Мыйын судьям – Господь.5Сандене жап шумешке ида судитле. Шке жапыштыже Господь толеш да пычкемышеш шылтымым волгалтара, еҥ-влакын шӱм шонкалымыштым чараш луктеш, тунам тауштымаш кажнылан Юмо деч лиеш.

6Иза-шольо-влак, «Возымын чекше гыч лектын, утым ида шонкале» манме мом ончыктымым те мемнан деч тунемза манын, чыла тидым мый тыланда кӧра шкаланем да Аполлослан келыштаренам. Тендан кокла гыч нигӧат иктым кӱшкӧ, весым ӱлыкӧ ынже шынде.7Кӧ тыйым моло деч кӱшкӧ нӧлта? Мо тыйын тугай уло, мом Юмо деч налын отыл? А мо тыйын уло, тудым Юмо деч налынат гын, пуйто тиде пӧлек семын налме огыл манын, молан моктанет?8Те ынде темше улыда, те ынде поенда, мемнан деч посна кугыжа лийында! О, мыланнат тендан дене кугыжаланаш манын, чынжымак кугыжа лийыда ыле гын!9Юмо мемнам, Апостол-влакым, пуйто эн кӱлдымӧ еҥым, колаш палемдыме гайым ыштымыла мыланем чучеш, вет мемнам уло тӱня, Суксо-влакат, айдеме-влакат ончат.10Ме Христослан кӧра ушдымо улына, а те Христос дене – шонен моштышо. Ме вийдыме улына, а те виян, те чапланеда, а мемнам огыт пагале.11Кызыт мартеат шужена, йӱмына шуэш, чиемна шӱкшӧ, мемнам кырат, ме вер гыч верыш коштына,12шке кид дене тыршена да пашам ыштена. Мемнам вурсат, а ме порым тыланена, мемнам поктылыт, а ме чытена,13мемнам мыскылат, а ме поро мутым ойлена. Ме тӱнялан луктын кудалтыме шӱкшак гай, кызыт марте чылалан куштыра гай лийынна.

14Тендам вожылтараш огыл, а тыланда ушым шындаш тидым возем, вет те мыйын йӧратыме икшывем улыда.15Вет Христос дене ушнен шогымаште ончен-куштышыда тӱжем дене улыт гынат, ачада шуко огыл. Мый тендам Христос Иисус дене ушнен шогышым Поро Уверым каласкалыме гоч шочыктенам.16Сандене тендам сӧрвалем: кузе мый Христос семын ыштем, тугак теат мыйын семын ыштыза.17Тидлан мый тендан деке Тимофейым колтенам. Господь дене ушнен шогымаште тудо мыйын йӧратыме, ӱшанле эргым. Кузе мый Христос дене ушнен илем да кажне черкыште чыла вере мом туныктем, тудо тыланда ушештара.18Мый тендан деке ом мий манын шонен, тендан кокла гыч южышт кугешнаш тӱҥалыныт.19Но Господь колтынеже гын, вашке тендан деке мием да кугешныше-влакын мутыштым огыл, а вийыштым пален налам.20Вет Юмын Кугыжаныш шомакыште огыл, а куатыште.21Тендан шонымаште можо сайрак: мылам тендан деке тоя дене але йӧратымаш да ӱҥышӧ шӱм-чон шӱлыш дене мияш?



*а 4:6 Чек – граница.

предыдущая глава Глава 4 следующая глава