Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

СВЯТОЙ АПОСТОЛ ПАВЕЛЫН КОРИНФЯН-ВЛАКЛАН КОЛТЫМО ИКЫМШЕ СЕРЫШЫЖЕ

Глава 2

1-5 Павел ыресеш пудален сакыме Христос нерген увертара. 6-16 Юмын кугу уш-акылже.

1Иза-шольо-влак, кунам тендан деке миенам, мый Юмын таныклымыжым пеш чапле мут да кугу уш-акыл дене огыл увертараш толынам.2Вет тендан дене лиймем годым мый Иисус Христос, пудален сакыме Иисус Христос, деч молым нимом палаш огыл манын шонен пыштенам.3Мый тендан дене улмем годым вийдыме, лӱдшӧ да пырткыше чонан лийынам,4мый айдеме уш-акылын ӱшандарыше мутшо дене огыл, а Шӱлыш ден вийым ончыктен ойленам да увертаренам,5вет тендан ӱшанымыда айдемын уш-акылеш огыл, а Юмын куатеш негызлалтшаш.

6Туге гынат ме ушым шындыше-влак коклаште кугу уш-акылым ойлена, но тидыже кызытсе саманын уш-акылже але кызытсе саманын пытышаш вуйлатыше-влакын уш-акылышт огыл.7Ме Юмын шолып кучымо, шылтыме кугу уш-акылым ойлен пуэна, тиде уш-акылжым Юмо мемнан чапнам нӧлташ жап тӱҥалме деч ончычак палемден.8Тиде уш-акылым кызытсе саманын власть кучышо-влак кокла гыч иктат пален огыл, а палат ыле гын, чапын Господьшым пудален огыт саке ыле.9Но возымо семын
«Мом шинчат ужын огыл,
пылышат колын огыл,
да мом айдеме шӱмыштыжӧ пален огыл,
тудым Юмым йӧратыше-влаклан Юмо ямдылен».
10А мыланна Юмо тидым шке Шӱлышыж гоч почын, вет Шӱлыш чылажымат, Юмын келгытшымат шымла.11Айдемын келгытшым айдеме кокла гыч кӧ пала? Тидым айдемын кӧргӧ шӱлышыжӧ веле пала. Тыгак Юмын келгытшымат Юмын Шӱлыш деч моло нигӧ ок пале.12А ме тиде тӱнян шӱлышыжым огыл, а Юмо деч толшо Шӱлышым налынна, вет Юмо мом мыланна пӧлеклен, тудым палышаш улына.13А ме тидын нерген айдеме уш-акылын туныктымо мутшо дене огыл, а Святой Шӱлыш туныктымо мут дене ойлена, да Шӱлыш пашам Шӱлыш почеш илыше-влаклан умылтарена.14Мо Юмын Шӱлыш деч, тудым шке шӱм-чонжо почеш илыше еҥ шӱмышкыжӧ ок пыште, вет тудлан тиде ушдымылык, тидым шӱлыш дене веле лончылаш лиеш, сандене умылен ок керт.15Но Шӱлыш почеш илыше еҥ чыла лончылен кертеш, а тудым нигӧ лончылен ок керт,16вет
«Кӧ Господьын ушыжым пала
да Тудым туныктен кертеш?»
А Христосын ушыжо мемнан уло.



*а 2:9 Ис 64:4.

*б 2:13 «Шӱлыш почеш илыше-влаклан»: грек мутым «Шӱлыш пуымо мут дене» манынат умылаш лиеш.

*в 2:16 Ис 40:13.

предыдущая глава Глава 2 следующая глава