Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

ЛУКАН ВОЗЫМО СВЯТОЙ ЕВАНГЕЛИЙ

Глава 2

1-7 Иисусын шочмыжо. 8-21 Кӱтӱчӧ да Суксо-влак. 22-38 Иисусым храмыш кондат. 39-40 Назаретыш пӧртылмаш. 41-52 Латкок ияш Иисус храмыште.

1Тиде жапыште Август кесарь деч калыкым уло мланде мучко шотлен возаш кӱштымаш лектын.2Тиде икымше шотлен возымашым Квиринийын Сирийыште вуйлатымыж годым эртареныт.3Чылан шке тукымыштын олашке возалташ каеныт.4Иосиф Давидын родо-тукымжо гыч лийын, сандене Галилейысе Назарет ола гыч Иудейышке, Давидын Вифлеем лӱман олашкыже, каен.5Возен шотлымашке Иосиф тудлан сӧрымӧ Мария ӱдыр дене пырля каен. Мария нелемше улмаш.6А кунам нуно Вифлеемыште лийыныт, Мариялан азам ышташ жап шуын.7Мария Икымше Шочшыжым, Эргым, ыштен, Тудым вӱдылын, шудо шерчаш пыштен. Унапӧртыштӧ нунылан вер лийын огыл.

8Тудо кундемыште кӱтӱчӧ-влак пасушто лийыныт, нуно йӱдым кӱтӱм ороленыт.9Теве ончыкышт Господьын Суксыжо лектын да Господьын чапше нуным волгалтарен. Кӱтӱчӧ-влак чот лӱдыныт,10но Суксо каласен: «Ида лӱд! Мый тыланда кугу куаным увертарем, тидыже уло калыклан йывыртымаш лиеш:11таче Давидын олаштыже тыланда Утарыше – Христос, Господь – шочын.12Теве тыланда пале: те вӱдыл пыштыме Азам муыда, Тудо шудо шерчаште кия».13Кенета тиде Суксо дене пырля пылпомышсо сарзе-влак шукын лектыныт да Юмым чапландареныт:14
«Юмылан кӱшнӧ чап лийже!
Мландӱмбалне тыныслык,
еҥ-влак дене Юмын поро кумылжо!»

15Суксо-влакын пылпомышко пӧртылмекышт, кӱтӱчӧ-влак икте-весыштлан ойленыт: «Айста Вифлеемыш каена, Господь мо нерген увертарымым, тушто мо лиймым ончалына».16Нуно вашкен каеныт, мийымекышт, Мариям, Иосифым да шудо шерчаште кийыше Азам муыныт.17Нуным ужмекышт, тиде Йоча нерген Суксын мом ойлымыжым каласкаленыт.18Тидым колшо-влак кӱтӱчӧ-влакын каласкалымыштлан чылан чот ӧрыныт.19А Мария чыла тидым шӱмышкыжӧ пыштен да арален.20Мом ужмо-колмыштлан Юмым моктен да чапландарен, кӱтӱчӧ-влак мӧҥгеш пӧртылыныт. Чылажат Суксо каласыме семынак лийын.

21Кандашымше кече шумеке, кунам Азалан пӱчмӧ йӱлам эртараш жап шуын, тудлан Иисус лӱмым пуэныт. Аважын нелеммыж деч ончычак Суксо Тудым тыге лӱмден.

22Моисейын законжо почеш эрныме йӱлам эртарыме кече шумеке, Иисусым, Господь ончык намияш манын, Иерусалимыш конденыт,23вет Господьын законыштыжо возымо: «Эн ондак шочшо кажне эрге аза Господьлан святитлыме лийшаш».24Тыгак нуно Господьын законышто ойлымо семын кок кедым але кок кӧгӧрчен игым надырлан пуышаш улыт улмаш.

25Иерусалимыште Симеон лӱман чын ыштыше да Юмым пагалыше еҥ лийын. Тудо Израильым лыпландарымым вучен, да ӱмбалныже Святой Шӱлыш лийын.26Господьын Христосшым ужмо деч ончыч колымашым от уж манын, Симеонлан Святой Шӱлыш увертарен.27Шӱлышын кумылаҥдымыж дене тудо храмыш толын. Кунам Иисусын ача-аваже, законышто возымо йӱлам Тудын шотышто шукташ манын, Азам тушко конденыт,28Симеон Тудым кидышкыже налын, Юмым моктен каласен:29
«Ынде, Господь, шомакетым шуктен,
шке тарзетым тыныслык дене колтет:
30мыйын шинчам Тыйын пуымо утарымашым ужо,
31тудым Тый чыла калык ончылно ямдыленат.
32Тудо чын Юмым палыдыме-влаклан чыным почшо волгыдо,
Тыйын Израиль калыкетлан чап лиеш».

33Иисус нерген мом ойлымылан Иосиф ден Азан Аваже ӧрыныт.34Симеон нуным благословитлен, а Азан Мария Аважлан каласен: «Теве Тудлан кӧра Израильыште шуко еҥ камвочшаш да шуко еҥ кынелшаш. Тудо ӱчашымашлан амал лиеш.35Тыге шукыштын шӱмеш шылтыме шонымашышт почылтеш. Тыйынат чонет вошт керде эрта».

36Туштак Асир тукым гыч Фануилын Анна пророк ӱдыржӧ лийын. Тудо пешак шоҥго улмаш. Ӱдыр жапше деч вара Анна шым ий марийже дене пырля илен,37а вара кандашле ныл ий теммешке тулык лийын илен. Храм деч тудо кораҥын огыл, йӱдшӧ-кечыже кумалын да пӱтым кучен Юмылан служитлен.38Тиде жапыште Анна нунын деке миен да Юмым моктен, Иерусалимыште утарымым вучышо-влаклан чылаштлан Иисус нерген каласкален.

39Господьын законжо почеш чыла ыштымеке, нуно Галилейышке, шкеныштын Назарет олашкышт, пӧртылыныт.40Йоча кушкын, шӱм-чон шӱлышыжӧ пеҥгыдемын, ушым поген. Юмын порылыкшо Тудын дене лийын.

41Иисусын ачаж ден Аваже кажне ийын Иерусалимыш Кугече пайремыш коштыныт.42Тудлан латкок ий теммеке, нуно йӱла почеш ончычсо семынак Иерусалимыш пайремыш миеныт.43Пайрем кече-влак пытымеке, нуно мӧҥгышкышт каеныт, а Рвезе Иисус Иерусалимеш кодын. Тидым Иосиф ден Тудын Аваже пален огытыл,44Тудо пырля мийыше-влак дене ошкеда, шоненыт. Тыге нуно кечыгут каеныт, вара Эргыштым родо-тукым да палыме коклаште кычалаш тӱҥалыныт.45Иисусым муын огытылат, Иерусалимыш пӧртылыныт да Тудым тушто кычалыныт.

46Иисусым кум кече гыч храмыште муыныт. Тудо туныктышо-влак коклаште шинчен, нуным колыштын да йодышым пуэден.47Иисусым колыштшо-влак чылан Тудын уш-акылжылан да вашештымыжлан ӧрыныт.48Тудым ужмеке, ачаж ден Аваже чот ӧрыныт. Аваже Тудлан ойлен: «Эргым, молан Тый мемнан дене тыге ыштенат? Тыйын ачат да Мый, чот ойгырен, Тыйым кычалынна».49Тудо нунылан каласен: «Молан те Мыйым кычалында? Мо Ачамын, Мыйын тушто лийшашем але те пален огыдал?»50Но нуно мом ойлымыжым умылен огытыл.51Иисус ачаж да Аваж дене пырля каен, Назаретыш пӧртылын да чыла шотыштат мутыштым колыштын. А Аваже чыла тидым шӱмыштыжӧ арален.52Иисус кушкын да ийгот ешаралтме семын ушым поген, Тудым Юмат, еҥ-влакат утларак да утларак йӧратеныт.


*а 2:7 «Икымше Шочшо» – грек мут тиде йоча икымше манын веле ончыкта, вес шочшыжо лийын але уке ок ончыкто. Шудо шерча – ясла.

*б 2:23 Исх 13:2,12.

*в 2:24 Лев 12:8.

*г 2:37 «Кандашле ныл ий теммешке» – тидым «кандашле ныл ий» манын кусарашат лиеш.

предыдущая глава Глава 2 следующая глава