Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

ЛУКАН ВОЗЫМО СВЯТОЙ ЕВАНГЕЛИЙ

Глава 1

1-4 Ончылмут. 5-25 Тынеш Пуртышо Иоаннын шочмыж нерген ончылгоч каласымаш. 26-38 Иисусын шочмыж нерген ончылгоч каласкалымаш. 39-56 Елисавета деке Мария ужаш мия. 57-66 Тынеш Пуртышо Иоаннын шочмыжо. 67-80 Захарийын пророкла ойлымыжо.

1Мемнан коклаште мо лийме да сайын палыме паша нерген шукын возаш тӱҥалыныт.2Нуно тӱҥалтыш гычак чыла тидым ужшо да Шомаклан служитлыше-влакын мыланна каласкалымыштым возат.3Сандене мыят, тӱҥалтыш гыч чыла шымлен лекмеке, тидым тыланет, кугун пагалыме Феофил, радамын возаш шонен пыштышым.4Тыланет мом туныктымын ӱшанле улмыжым палет манын, мый ужнем.

5Иудейын Ирод кугыжаже годым Авийын черетыштыже служитлыше Захарий лӱман иерей улмаш. Тудын ватыжат Аарон тукым гыч улмаш, лӱмжӧ Елисавета лийын.6Нуно коктынат Юмын ончылно чын ыштыше лийыныт, Господьын уло кӱштымыж да шӱдымыж почеш шылталаш лийдымын иленыт.7Но Елисавета йочам ыштен кертдыме улмаш, сандене нунын йочашт лийын огыл. Нуно коктынат шоҥго лийыныт.

8Икана Захарий радам почеш шке черетше дене Юмын ончылно служитлен.9Иерей-влакын йӱлашт почеш шывагам кучымекышт, тудлан Господьын храмышкыже тӱтыраш пураш логалын,10а тамле пушым тӱтырымӧ годым шуко калык тӱнӧ кумалын.

11Тунам Захарийлан Господьын Суксыжо кончен, тудо тӱтырымӧ жертвенник деч пурла могырышто шоген.12Тудым ужмеке, Захарий чот ӧрын, тудым лӱдмаш авалтен.13Но Суксо тудлан каласен: «Захарий, ит лӱд. Тыйын сӧрвалыметым колмо. Елисавета ватет тылат эргым ышта, да тый тудым Иоанн манын лӱмдет.14Тыланет куанымаш да йывыртымаш лиеш, эргычын шочмыжлан шукын йывырташ тӱҥалыт.15Господь ончылно тудо пеш кугу лиеш. Тудо йошкар аракамат, моло руштыктарышымат йӱаш ок тӱҥал, ава кӧргыштӧ лиймыж годымак Святой Шӱлыш дене темалтеш.16Израиль эрге кокла гыч шукыштым Господь деке, нунын Юмышт деке, пӧртылта.17Господь ончыко ямдылыме калыкым лукташ манын, Илиян гай вий-куат да шӱлыш дене тудо Господь деч ончыч толеш, ача-влакын шӱмыштым шочшышт деке пӧртылта, чын ыштыше-влак семын шонаш мут колыштдымо-влакым савыра».

18Захарий Суксылан каласен: «Тиде чын улмым кушеч мый палем? Мый шоҥго улам, ватемат ынде самырык огыл».19Суксо вашештен: «Мый Гавриил улам, Юмын ончылно шогем, тыланет ойлаш да тиде куан уверым каласаш мыйым колтымо.20Теве тый мутланен кертдыме лият, чыла тиде шукталтме кече марте ойлен от керт. Шке жапыштыже шукталтшаш шомакемлан тый ӱшанен отыл, сандене тыге лиеш».

21А калык Захарийым вучен да храмыште юватылмыжлан ӧрын.22А лекмеке, Захарий нунылан нимом ойлен кертын огыл. Нуно умыленыт: храмыште тудо кончымашым ужын. Захарий кидше дене ончыктылын, но йылмыдымак кодын.23А служитлыме кечыже-влак эртымеке, Захарий мӧҥгыжӧ пӧртылын.

24Икмыняр жап гыч Елисавета ватыже нелемын, тудо вич тылзе шылын илен да ойлен:25«Тидым мылам Господь ыштен! Тиде кечылаште Тудо ӱмбакем ончалын, еҥ-влак деч чытен илыме намысем ӱмбачем кораҥден».

26Кудымшо тылзын Юмо Гавриил Суксым Галилейысе Назарет манме олашке колтен.27Тудо Давид тукым гыч Иосиф лӱман пӧръеҥлан сӧрымӧ ӱдыр деке колтымо улмаш. Ӱдырын лӱмжӧ Мария лийын.28Суксо Тудын деке пурен да каласен: «Поро пӱрымашан, йывырте! Тый денет Господь. Ӱдырамаш-влак коклаште Тый благословитлыме улат!»29А Мария, тудым ужмеке, тыгай мутлан аптыранен да саламлымаш мом ончыкта манын шонкален.30Суксо Тудлан каласен: «Мария, ит лӱд. Тый Юмын порылыкшым налынат.31Тый нелемат да Эргым ыштет. Тудлан Иисус лӱмым пуэт.32Тудо пеш кугу лиеш да Кӱшнысӧ Юмын Эрге манын лӱмдалтеш. Господь Юмо Тудлан Давид ачажын престолжым пуа.33Тудо курымеш Иаков тукымын Кугыжаже лиеш, Тудын кугыжа улмыжлан мучаш ок лий».34Суксылан Мария каласен: «Кузе тиде лийын кертеш? Мый пӧръеҥым ом пале».35Суксо Тудлан вашештен: «Ӱмбакет Святой Шӱлыш вола, Кӱшнысӧ Юмын куатше Тыйым леведеш. Санденак шочшаш Аза святой лиеш, Тудым Юмын Эрге манын лӱмдат.36Теве Тыйын Елисавета родетат, шоҥго гынат, мӱшкыран, тудын эрге шочеш. Тудым чылан йочам ыштен кертдымылан шотленыт, ынде кудымшо тылзе Елисавета нелемше.37Юмын ик мутшат ышталт кертдыме ок лий».38Мария каласен: «Мый Господьын тарзыже улам. Тек Мыланем ойлымет семынак лиеш». Суксо Тудын деч кораҥын.

39Тиде кечылаште Мария тарванен да курыкан кундемысе Иудан олашкыже вашкен каен.40Тудо Захарийын пӧртышкыжӧ пурен да Елисаветам саламлен.41Кунам Мариян саламлымыжым Елисавета колын, мӱшкырыштыжӧ азаже тарванен, да Елисавета Святой Шӱлыш дене темын.42Тудо виян кычкыралын: «Ӱдырамаш-влак коклаште Тый благословитлыме улат! Тый дечет Шочшат благословитлыме!43Мый декем Господемын Аваже толын. Кушеч мылам тыгай пиал!44Кунам саламлымет пылышышкем шоктыш, кӧргыштем азам куанен тарваныш.45Ӱшаныше – поро пиалан, вет Господьын Тудлан каласымыже шукталтеш».

46Мария каласен:
«Мыйын чонем Господьым мокта,
47Юмылан, Мыйым Утарышылан, кӧргӧ шӱлышем куана.
48Тудо ӱҥышӧ тарзе Ӱдыржӧ веке ончалтышыжым савырен,
тиде жап гыч чыла тукым Мыйым поро пиалан манаш тӱҥалеш:
49куатан Юмо Мылам моткоч кугу порылыкым ыштен.
Тудын лӱмжӧ святой!
50Тудлан лӱдын кумалше-влаклан тукым гыч тукымыш
Тудо шке порылыкшым ончыкта.
51Тудо шке кидшын куатшым ончыктен,
кугешныше шонымашым шӱмыштышт кучышо-влакым шалатен колтен.
52Виян-влакым престол гыч сӱмыралын,
ӱҥышӧ-влакым нӧлталын,
53шужышо-влакым поро дене темен,
пойышо-влакым нимо деч посна колтен.
54-55Мемнан ачана-влаклан ойлымыж семын,
Авраам ден тудын тукымжылан
порылыкшым курымеш шарнен,
Тудо Шкенжын Израиль шочшыжым йӧратен налын».

56Елисавета дене Мария кум тылзе наре лийын, вара мӧҥгыжӧ пӧртылын.

57Елисаветалан азам ышташ жап шуын, тудо эргым ыштен.58Господь тудын деке моткоч поро лийме нерген пошкудо да родо-тукымжо колыныт да тудын дене пырля куаненыт.

59Кандашымше кечын азалан пӱчмӧ йӱлам эртараш толыныт да тудым ачажын лӱмжӧ дене Захарий манын лӱмдынешт улмаш.60Но азан аваже каласен: «Уке. Тудым Иоанн манын лӱмдена».61Елисаветалан каласеныт: «Но тыгай лӱманже тыйын тукымышто иктат уке».62Кид дене ончыктыл, азан ачаж деч тудым кузе лӱмдынеже манын йодыныт.63Захарий изи оҥам йодын да возен: «Тудын лӱмжӧ Иоанн». Чылан ӧрыныт.64Тунамак Захарийын умшаже почылтын, йылмыже рудалтын, тудо ойлаш да Юмым чапландараш тӱҥалын.

65Тыште илыше-влак чылан чот лӱдыныт. Чыла тидын нерген Иудейын курыкан кундемже мучко каласкаленыт.66Кӧ тидын нерген колын гын, чылан шӱмыш пыштеныт да ойленыт: «Тиде йоча мо лиеш?» Вет тудын пелен Господьын кидше лийын.

67Иоаннын ачаже, Захарий, Святой Шӱлыш дене темын да пророкла ойлен каласкален:68
«Израильын Господь Юмыжо моктымо лийже!
Тудо шке калыкше деке лишемын
да тудлан эрыкыш лекмашым ямдылен.
69-70Ожнысо святой пророкшо-влак гоч
мом сӧрымыжым ыштен:
Давид шочшыжын тукымжо гыч
Тудо мыланна виян Утарышым луктын.
71Тушманна-влак деч, мемнам ужмышудымо-влакын
чыланыштын кидышт гыч
Господь утара.
72Тыге Тудо ачана-влаклан порылыкшым ончыкта да
Шкенжын святой сугыньжым шарна.
73-75Авраам ачаланна товатлымыжым монден огыл:
мемнам тушман кид йымач эрыкыш луктеш,
да, Тудын ончылно святойын да чын ыштен,
Тудлан илышаш кечына мучко лӱдде служитлен кертына.
76А тый, йоча,
Кӱшнысӧ Юмын пророкшо манын лӱмдалтат,
Господь ончылно кает, Тудлан корным ямдылет да
77Тудын калыкшылан утаралтмаш
языкыштым кудалтымыж дене лиймым палдарет.
78Тыге мемнан Юмына шӱм порылыкшо дене
кӱшыч мыланна Эр Волгыдым колтен –
79Тудыжо пычкемыште да колымаш ӱмылыштӧ
шинчыше-влакым волгалтара
да тыныслык корныш мемнан ошкылнам виктара».

80А йоча кушкын да шӱм-чон шӱлышыжӧ пеҥгыдемын. Израиль калык ончык лекшаш кече шумешке, тудо ир мландыште илен.


*а 1:5 Иерусалимысе храмыште служитлыше иерей-влак коло ныл сменылан пайлыме лийыныт. Нунын кокла гыч кандашымшыже – Авийын черетше, ончо 1 Пар 24:10.

*б 1:28 «Йывырте» – грек йылмыште тидыже саламлыме мут.

*в 1:37 Тиде почеламутым «Юмын ыштен кертдыме нимо уке» манынат умылаш лиеш.

предыдущая глава Глава 1 следующая глава