Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

МАРКЫН ВОЗЫМО СВЯТОЙ ЕВАНГЕЛИЙ

Глава 14

1-2 Иерей-влак Иисусым пушташ шонат. 3-9 Вифанийыште Иисусым миро дене шӱрымаш. 10-11 Иисусым Иуда ужала. 12-21 Кугече кас кочкыш. 22-26 Святой кас кочкыш. 27-31 Тунемшыж-влакын кораҥмышт нерген Иисус ончылгоч каласа. 32-42 Гефсиманийыште Иисусын кумалмыже. 43-52 Иисусым кучен наҥгайымаш. 53-65 Синедрион ончылно. 66-72 Петрын кораҥмыже.

1Кок кече гыч Кугече да Шергинде пайрем тӱҥалшаш улмаш. Архиерей ден закон туныктышо-влак, Иисусым чояланен кучаш да пушташ манын, йӧным кычалыныт.2Нуно ойленыт: «Пайрем годым тидым ышташ ок лий. Калык пудыранен кертеш».

3Кунам Иисус Вифанийыште проказе черан Симонын пӧртыштыжӧ лийын да кочкын, тушко ик ӱдырамаш пурен, нард гыч лукмо пеш шергакан яндар миром алебастр кӱ атеш конден. Тудо ате шӱйым пудыртен, а ӱйжым Иисусын вуйышкыжо опталын.

4Южышт, вуеш налын, икте-весыштлан ойленыт: «Молан миром арам кучылтмаш?5Тиде миром кум шӱдӧ утла динарийлан ужален, оксажым йорло-влаклан пуэдаш лиеш ыле». Нуно ӱдырамашым шылталеныт.

6Но Иисус каласен: «Тудын деч кораҥза, мом тудым тургыжландареда? Тудо Мылам поро пашам ыштен.7Йорло-влак тендан дене эре лийыт, те кунам шонеда, нунылан порым ыштен кертыда. А Мый тендан дене эре ом лий.8Тудо мо кертмыжым ыштен: ончылгочак Мыйын капем тояш шӱрен ямдылен.9Тыланда чынак ойлем: уло тӱня мучко, кушто гына Поро Уверым каласкалаш тӱҥалыт, тыгак тиде ӱдырамашын мом ыштымыж нерген ойлаш да шкенжым шарнаш тӱҥалыт».

10Латкок тунемшыж кокла гыч иктыже, Искариот манме Иуда, Иисусым ужалаш манын, архиерей-влак деке каен.11Иудам колыштмеке, нуно куаненыт да тудлан ший оксам пуаш сӧреныт. Иисусым ужалаш манын, Иуда йӧнан жапым вучаш тӱҥалын.

12Шергинде пайремын икымше кечынже, кунам йӱла почеш кугече пачам шӱшкылаш кӱлеш улмаш, тунемше-влак Иисус деч йодыныт: «Тый кугече кочкышым кушто кочкаш шонет? Ме тудым ямдылаш кушко каена?»13Тунам Иисус нунын кокла гыч кокытшылан каласен колтен: «Олаш кайыза. Тушто те кувшин дене вӱдым нумал ошкылшо еҥым вашлийыда. Тудын почешыже кайыза.14Кудо пӧртыш пура, тудо сурт озалан каласыза: ”Туныктышо пӧлем нерген йодеш: тунемшыж-влак дене пырля кугече пачам кушто кочкын кертеш?”15Тиде еҥ тыланда йоҥгыдо да тидлан ямдылыме, ӱштын шындыме кӱшыл пӧлемым ончыкта. Тушан мыланна чыла ямдылыза».16Тунемшыж-влак каеныт, олашке пуреныт. Чылажат Иисус ойлымо семынак лийын. Нуно кугече кочкышым ямдыленыт.

17А кастене тушко латкок тунемшыж дене пырля Иисус толын.18Кунам нуно ӱстелтӧрыштӧ лийыныт да кочкыныт, Тудо каласен: «Тыланда чынак ойлем: тендан кокла гыч иктыже, кӧ кызыт Мый денем пырля кочкеш, Мыйым ужала».19Тунемшыж-влак ойгаҥыныт, икте почеш весе Тудын деч йодышташ тӱҥалыныт: «Мыяк огыл дыр? Мыяк огыл дыр?»20Иисус каласен: «Тиде – латкокыт гыч иктыже, кӧ кӱмыжыш Мый денем пырля киндым тушкалта.21Айдеме Эрге нерген кузе возымо, тиде илыш гыч Тудо туге кая, но Айдеме Эргым ужалышылан ойго лиеш! Ок шоч гын, тиде еҥлан сайрак ыле».

22Кочмышт годым Иисус киндым налын, благословитлен, тодылын, тунемшыж-влаклан пуэн да каласен: «Налза, кочса. Тиде – Мыйын Капем».23Вара чашым налын, тауштен пелештен да нунылан пуэн. Чыланат тушеч йӱыныт.24Иисус ойлен: «Тиде – Мыйын шуко еҥ верч йоктарыме у сугынь Вӱрем.25Тыланда чынак ойлем: Юмын Кугыжаныште у йошкар аракам йӱмӧ кече шумешке, Мый виноград саска гыч ыштымым ом йӱ».

26Нуно Юмылан таум ыштен муреныт, вара Елеон курыкыш каеныт.

27Иисус нунылан ойлен: «Чылан те Мый дечем тиде йӱдым кораҥыда. Возымо: ”Кӱтӱчыжым перен шуэм, да шорык кӱтӱ шалана”.28Но, ылыж кынелмекем, Мый тендам Галилейыште вашлиям».29Петр Тудлан каласен: «Чылан Тый дечет кораҥыт гынат, мый тидым ом ыште!»30Иисус вашештен: «Тыланет чынак ойлем: таче, тиде йӱдымак, агытан кок гана муралтымешке, тый кум гана Мыйын нерген ”Тудым ом пале” манат».31Но Петр чотрак ӱшандарен ойлен: «Тый денет пырля мылам колаш логалеш гынат, мый Тыйын нерген ”ом пале” манын ом ойло!» Моло тунемшыжат тидымак ойленыт.

32Нуно Гефсиманий манме верыш толыныт, да Иисус тунемшыж-влаклан каласен: «Мыйын кумалмем годым тыште шинчыза».33Тудо Шкеж дене пырля Петрым, Иаковым да Иоанным налын. Иисусым шучкылык да неле йӧсланымаш авалташ тӱҥалын.34Тудо манын: «Мыйын чонем колышаш гай ойганен. Тыште лийза да ида мале».

35Изиш ӧрдыжкырак кораҥмеке, Иисус мланде ӱмбаке кумык возын. Лиеш гын, тиде шагат Мый дечем эртен кайыже ыле манын кумалын.36Тудо ойлен: «Авва! Ачай! Тый чыла кертат. Тиде чашым Мый дечем кораҥден наҥгае, но тек Мыйын шонымо семын огыл, а Тыйын шонымет семын лиеш».

37Вара Тудо тунемшыж-влак деке пӧртылын, нуным малышым ужын да Петрлан ойлен: «Симон, тый малет? Ик шагатымат малыде эртарен кертын отыл?38Алгаштаралташ огыл манын шекланыза, кумалза. Чон чулым, но кап вийдыме».

39Иисус уэш каен да тудо мут денак кумалын.40Пӧртылмекыже, тунемшыж-влакым адакат малышым ужын. Нунын шинчагомдышышт нелемын, да Иисуслан мом вашешташат пален огытыл.

41Кумшо гана толмеке, Иисус каласен: «Те алят маледа да канеда! Сита! Жап шуын. Айдеме Эрге языкан-влак кидыш пуалтеш.42Кынелза, каена: теве Мыйым ужалыше лишемеш».

43Иисус але ойленат пытарен огыл, латкокыт гыч иктыже, Иуда, да тудын дене пырля шуко калык керде да шугыньо дене толын. Нуным архиерей, закон туныктышо ден калык кугурак-влак колтеныт.44Ужалыше нунылан Иисусым тыге палдараш сӧрен улмаш: «Кӧм мый шупшалам, тиде Иисус. Тудым кучыза да шекланен наҥгайыза».45Толмеке, Иуда вик Иисус деке миен да манын: «Равви! Равви!» Вара Иисусым шупшалын.46Иисус ӱмбаке кидыштым нӧлталыныт да Тудым руалтен кученыт.47Тушто шогышо кокла гыч иктыже кердыжым луктын да архиерейын тарзыжым руалын, тудын пылышыжым ойырен шуэн.

48Иисус нунылан каласен: «Аген коштшо ӱмбаке лекмыла, кердым, шугыньым налын, те Мыйым кучаш толында.49Кече еда храмыште тендан дене лийынам да калыкым туныктенам, а те Мыйым руалтен кучен огыдал. Но Возымаште каласыме шукталтшаш».50Иисусым коден, чыла тунемшыже куржын пытен.

51Но ик самырык пӧръеҥ Иисус почеш каен. Тудын чара могырыштыжо вынер леведыш веле лийын. Тудым руалтен кученыт,52а тудо, леведышыжым коден, нунын деч чараматын куржын.

53Иисусым архиерей деке наҥгаеныт, да тушко чыла архиерей, калык кугурак да закон туныктышо-влак погыненыт.54Петр ӧрдыжтырак лийын, Тудын почеш архиерейын кудывечышкыже пурен да тарзе-влак дене пырля тул воктене ырыктен шинчен.

55Архиерей-влак да уло Синедрион, Иисусым пуштыкташ амалым муаш манын, Тудын ваштареш таныклымашым кычалыныт, но муын кертын огытыл.56Тудын ваштареш шояклен таныклыше шукын лийыныт, но нунын таныклымышт ваш-ваш келшен толын огытыл.57Южышт шогалыныт да Иисус ваштареш шояклен тыге ойленыт:58«Ме Тудын тыгай ойлымыжым колынна: ”Мый еҥ-влакын кид дене ыштыме тиде храмым шалатем да, айдеме кид тӱкныде, кум кечыште весым чоҥен шогалтем”».59Но нунын тыгай таныклымыштат икте-весе дене келшен толын огытыл.

60Тунам архиерей кынел шогалын, ончык лектын да Иисус деч йодын: «Ваштарешет титаклен ойлымыштлан Тый нимом от вашеште?»61Но Иисус шып шоген, нимом вашештен огыл. Архиерей Тудын деч адак йодын: «Тый Христос, моктымо Юмын Эргыже, улат мо?»62«Мый, – вашештен Иисус, – те Айдеме Эргын Куатан Юмын пурла могырыштыжо шинчымыжым да кавасе пыл ӱмбалне толмыжым ужыда.»63Тунам архиерей вургемжым кушкедын да каласен: «Адак могай таныклыше-влак мыланна кӱлыт!64Те Юмым мыскылымыжым колда. Тидлан мом каласеда?» Иисус титакан да колышаш манын чылан келшеныт.

65Тунам южышт Тудын ӱмбаке шӱведаш тӱҥалыныт. Иисусын шӱргыжым петыреныт, Тудым переныт да ойленыт: «Ынде пророкла каласе!» Тарзе-влакат Иисусым кыреныт.

66Кунам Петр ӱлнӧ, кудывечыште, лийын, тушко архиерейын тарзе ӱдыржӧ-влак кокла гыч иктыже толын.67Тул воктене ырыктыше Петрым ужын, тӱсленрак ончалын да ойлен: «Тыят Назарет гыч толшо тиде Иисус дене пырля лийынат».68Но Петр тореш ойлен. «Мом тый ойлет – мый ом пале да ом умыло», – манын да ончыл кудывечыш лектын. Тунам агытан муралтен.69Ӱдыр тудым адак ужын да тушто шогышо-влаклан ойлен: «Тиде еҥат нунын кокла гыч».70Петр адакат тореш каласен. Изиш лиймеке, воктен шогышо-влак тудлан ойленыт: «Чынак тый нунын кокла гыч улат. Тыят Галилей гыч улат, тыйын ойлыметат нунын гай».71Петр Юмо ончылно товатлен ойлаш тӱҥалын: «Кӧн нерген ойледа, мый Тудым ом пале».72Тунам агытан кокымшо гана муралтен, да Петр Иисусын ойлымыжым шарналтен: «Агытан кок гана муралтымешке тый кум гана Мыйын нерген ”Тудым ом пале” манат». Вара тудо шорташ тӱҥалын.


*а 14:27 Зах 13:7.

*б 14:62 Дан 7:13.

*в 14:63 Вургемым кушкедмаш кугу ойгым, удалан шотлымым ончыкта.

предыдущая глава Глава 14 следующая глава