Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

МАРКЫН ВОЗЫМО СВЯТОЙ ЕВАНГЕЛИЙ

Глава 13

1-2 Храмым шалатыме нерген ончылгоч каласымаш. 3-13 Эҥгекын тӱҥалмыже. 14-23 Кугу йӧсланымаш. 24-31 Айдеме Эргын толмыжо. 32-37 Кече ден шагатше пале огыл.

1Храм гыч Иисус лекме годым тунемшыж-влак кокла гыч иктыже Тудлан ойлен: «Туныктышо! Ончал, могай кӱ-влак! Могай оралте-влак!»2Иисус тудлан вашештен: «Тый нине кугу оралтым ужат. Но тыште кӱ ӱмбалан кӱ ок код, чыла шалатыме лиеш».

3Елеон курыкышто храм ваштареш шинчымыж годым Иисус деке Петр, Иаков, Иоанн да Андрей йодыш дене посна миеныт.4«Мыланна каласе, кунам чыла тиде лиеш? Тидлан жап шумым могай палдарыше пале ончыкта?»

5Иисус нунылан ойлаш тӱҥалын: «Шекланыза, нигӧат тендам ынже ондале.6Мыйын лӱмем дене шукын толыт да ойлат: ”Тиде Мый улам”, да ятырыштым ондалат.7Кунам те сар йӱкым да сар нерген увер-влакым колыда, ида лӱд. Чыла тиде лийшаш, но тиде але мучаш огыл.8Калык ӱмбаке калык кынелеш, кугыжаныш ӱмбаке – кугыжаныш. Верын-верын мланде чытырналтеш, шужымаш да калык пудыранымаш толыт, но тиде – орлыкын тӱҥалтышыже веле.

9Шекланен шогыза! Тендам судитлаш пуат, синагоглаште кыраш тӱҥалыт. Мыланем верч тендам вуйлатыше да кугыжа-влак ончыко шогалтат. Тиде нунылан таныклымаш лиеш.10Но тылеч ондак чыла калык коклаште Поро Уверым каласкалыман.11Кунам тендам судыш кучен наҥгаят, мом ойлышаш нерген ончылгоч ида азаплане. Мо тыланда тудо шагатыште пуалтеш, тудымак ойлыза, вет те огыл ойлаш тӱҥалыда, а Святой Шӱлыш.12Изаже шольыжым, ачаже шочшыжым пушташ пуат, а йоча-влак ача-авашт ваштареш кынелыт да нуным пуштыт.13Мыйын лӱмем верчын тендам чыланат ужмышудымо лийыт, но кӧ мучаш марте чытен лектеш, утаралтеш.

14Кушто лийшаш огыл, тушто Даниил пророкын ойлымо йырнык пустаҥмашым ужмекыда – лудшо тек умыла –, Иудейыште улшо-влак тек курыкышко куржыт.15Кӧ пӧрт леведыш ӱмбалне гын, тек ок воло да пӧртшӧ гыч иктаж-мом налаш ок пуро.16Кӧ пасушто, тек вургемжым налаш ок пӧртыл.17Ойго лиеш тудо кечылаште мӱшкыран ӱдырамаш ден чызым пукшышо ава-влаклан!18Тендан куржмыда телым ынже лий манын, Юмым сӧрвалыза.19Тудо кечылаште тугай кугу орлык лиеш, могайже тӱня тӱҥалтыш гыч, Юмо тудым пӱрымӧ деч вара, але лийынжат огыл да нигунам огеш лий.20Тиде кече-влакым Господь огеш кӱчыкемде ыле гын, иктат утлен ок код ыле. Но ойырен налме еҥже-влаклан кӧра тиде кече-влакым кӱчыкемден.

21Тунам тыланда ”Теве тыште Христос!” але ”Тушто Христос!” манын иктаж-кӧ каласа гын, ида ӱшане.22Вет шояк христос ден шояк пророк-влак лектыт да ойырен налме-влакымат лийме семын ондалаш тӱрлӧ палдарыше пале ден чудым ыштат.23Теже шекланыза! Тыланда Мый чылажымат ончылгочак каласенам.

24Но тунам, тиде азап деч вара, кече пычкемышалтеш, тылзе волгалтарымыжым чарна,25шӱдыр-влак кава гыч камвозыт да пылпомыш вий-влак вер гыч тарванат.26Тунам еҥ-влак Айдеме Эргын кугу куат да чап дене пыл ӱмбалне толмыжым ужыт.27Тудо Суксыж-влакым колта да тӱнян ныл могыржо гыч, пылпомышын ик тӱржӧ гыч тӱҥалын, вес тӱрышкыжӧ шумеш шке ойырен налме еҥже-влакым пога.

28Смоква пушеҥге нерген туштен ойлымо деч тунемза. Кунам тудын укшлаже ылыжыт да лышташым колтат, те паледа: вашке кеҥеж толеш.29Тыштат тыгак. Кунам ойлымемын шукталтмыжым ужыда, палыза: тудо лишнак, омса воктенак.30Тыланда чынак ойлем: чыла тиде шукталтмеш, тиде тукым пытен ок шу.31Кава ден мланде пытат, но Мыйын шомакем огеш пыте.

32Тиде кече да шагат кунам толын шуэш, нигӧ ок пале: пылпомышсо Суксо-влакат, Эргат огыт пале, Ача веле пала.33Сандене шекланыза, кумалза, ида мале. Тиде жап кунам толмым те огыда пале.34Тидым кужу корныш кайыше еҥ дене таҥастараш лиеш. Тудо пӧртшым тарзыж-влаклан ончаш кода, кажне тарзылан посна пашам пуа, а капка ороллан шекланаш кӱшта.35Теат шекланен шогыза! Вет сурт оза кунам пӧртылшашым огыда пале: ала кастене, ала пелйӱдлан, ала агытан мурымо дене пырля, ала эрдене эрак.36Тудо вучыдымын толеш, сандене шекланыза, тендам мален кийышым ынже уж.37Мом тыланда ойлем, чылалан ойлем: шекланен шогыза!»


*а 13:2 Мемнан саманысе 70-шо ийлаште храмым шалатеныт да угыч чоҥен огытыл.

*б 13:14 Дан 9:27.

*в 13:19 Пӱрымӧ – ыштыме.

*г 13:26 Дан 7:13-14.

предыдущая глава Глава 13 следующая глава