Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

МАРКЫН ВОЗЫМО СВЯТОЙ ЕВАНГЕЛИЙ

Глава 15

1-5 Иисус Пилат ончылно. 6-15 Иисус але Варавва? 16-20 Сарзе-влак Иисусым игылт орландарат. 21-32 Ыресеш пудален сакымаш. 33-41 Иисусын колымыжо. 42-47 Иисусым тойымаш.

1Эрдене эрак архиерей, калык кугурак, закон туныктышо да уло Синедрион кутырен келшаш погыненыт. Нуно Иисусым пидыныт, тушеч наҥгаеныт да Пилатын кидышкыже пуэныт.2Пилат Иисус деч йодын: «Тый иудей-влакын Кугыжашт улат?» Иисус вашештен: «Шке тидым каласышыч».3Архиерей-влак Иисусым шукылан титакленыт.4Пилат Тудын деч адак йодын: «Тый нимом от вашеште? Ужат, Тыйын ваштареш кунар титаклымаш уло».5Но Иисус нимом вашештен огыл, тидыже Пилатым ӧрыктарен.

6Кажне пайремлан Пилат кучен петырыме-влак кокла гыч иктыжым калык йодмо почеш эрыкыш колта улмаш.7Тунам Варавва лӱман еҥ шке йолташыж-влак дене пырля петырымаште лийын, калык пудыранымаш годым нуно еҥым пуштыныт.8Молгунамсе семынак ыштыже манын, Пилат деч калык кычкырен йодаш тӱҥалын.9Пилат вашештен каласен: «Тыланда иудей-влакын Кугыжаштым луктын колтем гын, йӧра мо?»10Тудо пален: архиерей-влак кӧранымышт дене Иисусым тудын кидышкыже пуэныт.11Но архиерей-влак эрыкыш Иисусым огыл, а Вараввам лукташ йодаш калыкым таратеныт.12Пилат адак калык деч йодын: «Кӧм иудей-влакын Кугыжашт маныда, Тудын дене те мылам мом ыштыктынеда?»13«Тудым ыресеш пудален саке!» – калык тӱшка кычкырен.14Пилат йодын: «Могай осалым Тудо ыштен?» Но калык эшеат виян кычкырен: «Тудым ыресеш пудале!»

15Пилат, калыклан йӧраш манын, Вараввам эрыкыш колтен, а Иисусым сола дене кырыктен да ыресеш пудален сакаш пуэн.

16Сарзе-влак Иисусым преторийын кӧргӧ кудывечышкыже наҥгаеныт да тушко уло полкым ӱжын конденыт.17Нуно Тудлан шемалге-йошкар вургемым чиктеныт, шуанвондо дене вуйшӱдышым тодыныт да вуйышкыжо пыштеныт.18«Куане, иудей-влакын Кугыжашт!» – Тудым саламлаш тӱҥалыныт.19Нуно Тудым вуй гыч тоя дене кыреныт, ӱмбакыже шӱведеныт, ончыланже, сукен возын, Тудлан вуйым савеныт.20Игылтын чарнымекышт, Иисус ӱмбач шемалге-йошкар вургемым кудашыныт, шке вургемжым чиктеныт, вара пудален сакаш наҥгаеныт.

21Эртен кайыше ик еҥлан, Кириней гыч Симонлан, Александр ден Руфын ачаштлан – тудо пасу гыч толын – Иисусын ыресшым ӧкым нумалыктеныт.22Иисусым Голгофа манме верыш конденыт, тиде лӱмжӧ «саҥга вер» манмым ончыкта.23Иисуслан смирна дене варыме йошкар аракам пуэныт, но Тудо йӱын огыл.24Иисусым ыресеш пудалыше-влак, кӧлан мом налаш шывагам кучен, шке коклаштышт вургемжым шеледеныт.25Тудым ыресеш пудален сакыме годым кумшо шагат лийын.26Титакшым ончыктен возымо улмаш: «Иудей-влакын Кугыжашт».27Аген коштшо кок еҥым Иисус дене пырля пудален сакеныт, иктыжым пурла могырыш, весыжым шола могырыш.28Тыге Возымаште улшо «Законым пудыртышо коклаш пуртеныт» манме шомак шукталтын.

29Эртен кайыше-влак Иисусым игылтыныт да вуйым рӱзен ойленыт: «Эй, храмым шалатен да кум кечыште чоҥен шогалтен кертше!30Шкендым Шке утаре да ырес гыч воло!»31Архиерей ден закон туныктышо-влакат шке коклаштышт игылтыныт: «Молым утарен, а Шкенжым утарен ок керт.32Тек тиде Христос, Израильын Кугыжаже, ынде ырес гыч вола. Тидым ужмеке, ме Тудлан ӱшанена». Иисус дене пырля пудален сакыме еҥ-влакат Тудым игылтыныт.

33Кудымшо шагат гыч индешымше шагат марте уло мланде ӱмбалне пычкемыш лийын.34Индешымше шагатыште Иисус виян йӱк дене кычкыралын: «Элои, Элои, ламма савахфани?» Тидыже «Юмем, Юмем, молан Мыйым кудалтен коденат?» манме лиеш.35Тидым колмеке, тушто шогышо кокла гыч южышт ойленыт: «Теве Тудо Илиям ӱжеш».36Ик еҥ куржын миен, губкым уксусеш нӧртен да тоя вуеш керын. Вара Иисуслан йӱкташ намиен да каласен: «А ынде ончалына, Илия Тудым ырес гыч волташ толеш мо?»37Но Иисус чот кычкыралын, да чонжо лектын.

38Тунам храмысе пӱрдыш кӱшычын ӱлыкӧ кокыте кушкедлен.39Иисус воктене шогышо шӱдывуй Тудын тыге кычкыралын колымыжым ужын да каласен: «Тиде Айдеме чынжымак Юмын Эргыже лийын!»

40Тушто ӱдырамаш-влакат лийыныт, нуно ӧрдыж гыч онченыт. Нунын коклаште Мария Магдалина, изирак Иаков ден Иосийын Мария авашт да Саломия лийыныт,41Иисус Галилейыште лийме годым нуно Тудын почеш коштыныт да Тудлан служитленыт. Иерусалимыш Иисус дене пырля толшо шуко моло ӱдырамашат тыштак лийын.

42Кас лишемын. Тунам шуматкече вашеш кугарня лийын, сандене43Синедрионын пагалыме еҥже, Аримафей гыч Иосиф, толын – тудо шкежат Юмын Кугыжанышым вучен –, Пилат деке пураш тоштын да Иисусын капшым йодын.44Иисус чынак колен шуктен мо манын, Пилат ӧрын. Тудо шӱдывуйым ӱжыктен да Иисус шукертак колен мо манын йодын.45Тидым шӱдывуй деч пален налмеке, Иисусын капшым Иосифлан пуаш сӧрен.46Иосиф йытын вынерым тӱлен налын, Иисусын капшым волтен, вынереш вӱдылын да курык саҥгаш кӱнчымӧ шӱгареш пыштен. Шӱгар аҥым кӱ дене петырен.47Мария Магдалина ден Иосийын Мария аваже Иисусым кушан пыштымым онченыт.


*а 15:18 «Куане» – грек йылмыште тидыже саламлыме мут.

*б 15:25 Кумшо шагат – мемнан жап дене кандаш шагат эртымеке.

*в 15:33 Куд шагат – мемнан жап дене тура кечывалым.

*г 15:34 Пс 21:2.

предыдущая глава Глава 15 следующая глава