Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

МАРКЫН ВОЗЫМО СВЯТОЙ ЕВАНГЕЛИЙ

Глава 12

1-12 Виноград аҥам кучышо-влак нерген туштен каласымаш. 13-17 Кесарьлан йозак. 18-27 Ылыжме нерген йодыш. 28-34 Эн тӱҥ кӱштымаш. 35-37 Христос – Тудо кӧн Эргыже? 38-40 Иисус закон туныктышо-влак деч шекланаш кӱшта. 41-44 Тулык ӱдырамашын надырже.

1Иисус нунылан туштен ойлаш тӱҥалын. «Ик еҥ пасуэшыже виноградым шынден. Тудын йырже печым печен, саска вӱдым темден лукмо верым кӱнчен да башньым чоҥен. Вара аҥам виноград куштышо-влаклан кучаш пуэн да шкеже каен.

2Жап шумеке, виноград ончышо-влак деч саскам налаш манын, оза нунын деке тарзыжым колтен.3Нунышт тарзым кученыт, тудым кыреныт да нимо деч посна колтеныт.4Тунам оза нунын деке вес тарзым колтен, но тудын ӱмбаке кӱм кышкеныт, вуйжым сусыртеныт да, мыскылен, мӧҥгеш колтеныт.5Оза эше вес тарзым колтен. Тудыжым пуштыныт. Оза шуко молымат колтен, но нуно чыланыштымат але кыреныт, але пуштыныт.6Озан эше икте кодын: йӧратыме эргыже. Пытартышлан нунын деке тудым колтен. ”Эргым ончылно нуно вожылыт”, – ойлен тудо.7Но виноградым ончышо-влак икте-весыштлан ойленыт: ”Тиде наследник. Айста тудым пуштына, наследствыже мемнан лиеш”.8Нуно тудым руалтен кученыт, пуштыныт да виноград аҥа гыч луктын кудалтеныт.

9Виноград аҥан озаже ынде мом ышта? Тудо мия, виноград ончышо-влакым пытара, а виноград аҥам весылан пуа.10Але Возымаште тидым те лудын огыдал:
”Чоҥышо-влакын йӧрдымыш лукмо кӱышт
негыз пусак кӱ лийын:
11тидыже Господь деч,
мемнан шинча ончылнына моткоч ӧрыктарыше”.»

12Иудей-влакын вуйлатышышт Иисусын туштен ойлымыжо нунын нерген улмым умыленыт, сандене Иисусым тунамак руалтен кучынешт улмаш. Но нуно калык деч лӱдыныт да Иисусым коден каеныт.

13Иисусым мутешыже кучаш манын, Тудын деке икмыняр фарисей ден Ирод велке шогышо-влакым колтеныт.14Нунышт миеныт да Тудлан ойленыт: «Туныктышо! Тыйын чын улметым ме палена. Тый еҥлан йӧраш тӧчымӧ нерген от шоно, Тыланет чыла еҥ иктӧр, Юмын корныжлан чын туныктет. Кесарьлан йозакым тӱлаш лиеш але уке? Тудым ме тӱлышаш улына але уке?»15Иисус нунын сайла кояш тӧчымыштым пален да каласен: «Молан Мыйым тергеда? Мылам ончалаш динарийым кондыза».16Тудлан оксам конденыт. Иисус йодын: «Кӧм тышан сӱретлыме? Кӧн лӱмжӧ сералтын?» Нуно вашештеныт: «Кесарьын».17Тунам Иисус нунылан каласен: «Тыгеже кесарьлан кесарьыным, Юмылан Юмыным пуыза». Нуно Тудлан чот ӧрыныт.

18Вара Иисус деке саддукей-влак толыныт. Нуно колышо огеш ылыж манын шотленыт. Нуно йодыныт:19«Туныктышо! Моисей мыланна тыге возен: иктаж-кӧн ватан, но йочадыме изаже але шольыжо кола гын, тудын ватыжым изаже але шольыжо марлан налшаш. Тидыжым колышын тукымжым шуяш ыштыман.20Шым изак-шоляк лийын. Кугуракше ӱдырым налын, йочан лийдеак колен.21Сандене тулыкеш кодшо ватыжым шольыжо марлан налын. Но шольыжат колен, тудынат йочаже лийын огыл. Тыгак лийын кумшо денат.22Чыла шымыт тудым марлан налын, иктыштынат йочашт кодын огыл. Чылашт деч вара ӱдырамашат колен.23Ылыжмекышт, кузе лиеш? Тудо шымытыштынат ватыже лийын гын, колымаш гыч ылыж кынелмеке, кӧн ватыже лиеш?»

24Иисус каласен: «Те Возымашым да Юмын куатшым огыда пале, сандене йоҥылыш лийыда.25Колымаш гыч ылыж кынелмеке, еҥ-влак ӱдырымат огыт нал, марланат огыт лек. Нуно пылпомышто Суксо гай лийыт.26Колышо-влакын ылыжмышт нерген Моисейын книгаштыже те лудын огыдал мо? Йӱлышӧ вондер гыч Юмо Моисейлан ойлен: ”Мый Авраамын Юмыжо, Исаакын Юмыжо, Иаковын Юмыжо улам”.27Юмо колышо-влакын Юмышт огыл, Тудо илыше-влакын Юмышт! Те моткочак йоҥылыш лийыда».

28Закон туныктышо кокла гыч иктыже, нунын ӱчашымыштым да Иисусын сайын вашештымыжым колмеке, Тудын деке миен йодын: «Кӱштымаш кокла гыч эн тӱҥжӧ кудо?»29Иисус вашештен: «Эн тӱҥ кӱштымаш тиде: ”Израиль, колышт! Мемнан Господь Юмына – ик Господь веле.30Господь Юметым уло шӱмет, уло чонет, уло умылымашет, уло виет дене йӧрате”. Тиде эн тӱҥ кӱштымаш.31Кокымшо кӱштымаш тыгаяк кугу: ”Лишылетым шкендым йӧратыме семынак йӧрате”. Нине кок кӱштымаш деч кугужо уке».

32Закон туныктышо Тудлан каласен: «Моткоч сай, Туныктышо! Тый чыным каласышыч: Юмо икте веле, Тудын деч моло вес Юмо уке.33Юмым уло шӱм, уло уш-акыл, уло чон, уло вий дене йӧратыме, лишылымат шкендым йӧратыме семын йӧратыме – йӱлалтен пуымо да моло надыр дечат кӱлешанрак».34Закон туныктышын шот дене вашештымыжым ужын, Иисус тудлан каласен: «Тый Юмын Кугыжаныш деч тораште отыл». Тылеч вара Иисуслан нигӧат йодышым пуэдаш тоштын огыл.

35Храмыште туныктен ойлымыж годым Иисус йодын: «Закон туныктышо-влак кузе Христосым Давидын Эргыже манын кертыт?36Святой Шӱлыш кумылаҥдыме дене Давид шкеже ойлен:
”Господь мыйын Господемлан каласен:
Тыйын тушманет-влакым йол йымакет пыштымешкем,
пурла велыштем шинче”.
37Давид шкеже Тудым Господь манеш гын, кузе Тудо Давидын эргыже лийын кертеш?» Шуко калык Иисусым кумылын колыштын.

38Иисус туныктымаштыже ойлен: «Закон туныктышо-влак деч шекланыза. Нуно чапле вургемым чийымым, калык погынымо верлаште лиймышт годым шкаланышт вуй савымым йӧратат,39синагоглаште эн ончылно шинчынешт, пайремыште эн пагалыме верым налнешт.40Нуно тулык ӱдырамаш-влакын суртыштым йорлештарат да лӱмжылан гына кужу жап кумалыт. Тыгай-влакым поснак пеҥгыде суд вуча».

41Иисус надыр оксам пыштыме вер ваштареш шинчын да калык тушко надырым кузе пыштымым ончен. Шуко поянже оксам ятыр пыштен.42Вара ик йорло тулык ӱдырамаш толын да кок лептам, вес семынже кодрантым пыштен.43Иисус тунемшыж-влакым Шкеж деке ӱжын да каласен: «Тыланда чынак ойлем: тиде йорло тулык ӱдырамаш надырым чыла моло еҥ деч шукырак пыштен.44Нуно утышт деч пыштеныт, а тудо шкенжын йорлылыкшо деч мо улыжым, илышыжлан мо кӱлмым чыла пуэн».


*а 12:10-11 Пс 117:22-23.

*б 12:19 Втор 25:5.

*в 12:26 Йӱлышӧ вондер – купина.

*г 12:26 Исх 3:6.

*д 12:29-30 Втор 6:4-5.

*е 12:31 Лев 19:18.

*ж 12:32-33 Втор 4:35, 6:5.

*и 12:36 Пс 109:1.

*к 12:42 Кодрант – тыгыде окса единице.

предыдущая глава Глава 12 следующая глава