Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

МАРКЫН ВОЗЫМО СВЯТОЙ ЕВАНГЕЛИЙ

Глава 9

2-13 Волгалт вашталтмаш. 14-29 Осал шӱлыш дене орланыше рвезым паремдымаш. 30-32 Иисус угычын Шкенжын колымыж да ылыжмыж нерген каласкала. 33-37 Кӧжӧ кугурак? 38-41 Кӧ мемнан ваштареш огыл, тудо мемнан верч. 42-50 Алгаштарыме нерген.

1Тудо нунылан эше каласен: «Тыланда чынак ойлем: Юмын Кугыжанышын уло куат дене толмыжым ужмешке, тыште шогышо кокла гыч южышт огыт коло».

2Куд кече гыч Иисус пеленже Петрым, Иаковым, Иоанным налын да нуным кӱкшӧ курык ӱмбаке посна намиен. Тушто нунын ончылно волгалт вашталтын.3Тудын вургемже йылгыжше, лум гай моткоч ошо лийын. Тӱнямбалсе ик ошемдышат тыге ошемден ок керт.4Нунылан Илия ден Моисей конченыт да Иисус дене мутланеныт.5Петр Иисуслан каласен: «Равви! Тыште улмына моткоч сай. Айста кум омашым ыштена: иктым Тыланет, иктым Моисейлан да Илиялан иктым».6Тунемше-влак пеш чот лӱдыныт, сандене Петр мом ойлымыжымат пален огыл.7Но тиде жапыште нуным пыл леведын, а пыл лоҥга гыч йӱк шоктен: «Тиде Мыйын йӧратыме Эргым, Тудым колыштса!»8Тунамак, йырымваш ончалмекышт, воктенышт Иисус деч молым ынде нигӧм ужын огытыл.

9Курык гыч волымышт годым Тудо кӱштен ойлен: «Айдеме Эргын колымаш гыч ылыж кынелмешкыже, мом ужмыдам нигӧлан ида каласкале».10Нуно Иисусын мутшым ушыш пыштеныт да, колымаш гыч ылыж кынелмаш мом ончыкта манын, икте-весышт деч йодыштыныт.

11Тунемшыж-влак Иисус деч йодыныт: «Но кузе законым туныктышо-влак ондак Илия толшаш манын ойлат?»12«Чын, – вашештен Иисус, – Илия ондак толеш да чылажымат тӧрлен ямдыла. А возымо семын Айдеме Эрге шуко орланышаш да ӱлык шындыме лийшаш.13Тыланда ойлем: Илият ынде толын, тудын дене мом шонымыштым ыштеныт. Тудын нерген тыгак возымо».

14Моло тунемшыж-влак деке мӧҥгеш пӧртылмекыже, Иисус нунын йыр шуко калыкым да тунемше-влак дене ӱчашыше закон туныктышо-влакым ужын.15Иисусым ужмеке, уло калык ӧрын, еҥ-влак Тудын деке куржын миеныт да саламленыт.16Иисус закон туныктышо-влак деч йодын: «Мо нерген те нунын дене ӱчашеда?»17Еҥ тӱшка гыч икте вашештен: «Туныктышо, мый Тый декет йылмыдыме шӱлыш кучыман эргым конденам.18Кеч-кушто осал шӱлыш тудым куча, мланде ӱмбаке йӧрыкта. Эргымын умша гычше шоҥ лектеш, тудо пӱйым пуреш, тӱҥеш. Мый тунемшет-влак деч эргымын кӧргӧ гыч осал шӱлышым поктен лукташ йодынам, но нуно кертын огытыл».19Иисус каласен: «О, ӱшаныдыме тукым! Мыняр Мылам эше тендан дене лийман? Мыняр Мылам тендам чытыман? Тудым Мый декем кондыза».

20Рвезым Тудын деке конденыт. Иисусым ужын, осал шӱлыш рвезым тунамак чытырыктен. Рвезе мланде ӱмбаке йӧрлын, пӧрдалын, да умша гычше шоҥ лекташ тӱҥалын.21Ачаж деч Иисус йодын: «Кунамсек тудын дене тыге лийын?» Тудо вашештен: «Йоча годсекак.22Пытараш манын, осал шӱлыш тудым шуко гана тулышкат, вӱдышкат шуэн. Но иктаж-мом ыштен кертат гын, мемнам чамане, мыланна полшо!»23Иисус тудлан каласен: «Иктаж-мыняр ӱшанен кертат гын – ӱшаныше чыла ыштен кертеш».24Йочан ачаже тунамак шинчавӱд йӧре кычкыралын: «Господь, мый ӱшанем! Ӱшанен моштыдымемлан полшо».

25Калык погынымым ужын, Иисус осал шӱлышлан шӱден: «Йылмыдыме да соҥгыра шӱлыш, Мый тыланет кӱштем: тудын кӧргӧ гыч лек да ит пӧртыл!»26Осал шӱлыш кычкыралын, рвезым чот чытырыктен да кӧргыж гыч лектын. Рвезе колышо гай лийын. «Колыш», – ятыр еҥ ойлен.27Но Иисус тудым кидше гыч кучен, кынелашыже полшен, рвезе кынел шогалын.

28Кунам Иисус пӧртышкӧ пурен, тунемшыж-влак, Тудын дене шкет кодмеке, йодыныт: «Молан ме тиде шӱлышым поктен луктын кертын огынал?»29Иисус вашештен: «Тыгай шӱлышым кумалме да пӱтым кучымо дене веле поктен лукташ лиеш».

30Иисус ден тунемшыж-влак, тиде верым коден, Галилей вошт эртен каеныт. Нунын кушто улмыштым Иисус ынеже палдаре улмаш.31Тудо тунемшыж-влакым туныктен да нунылан ойлен: «Айдеме Эрге айдеме кидышке пуалтеш, да Тудым пуштыт. Пуштмеке, кумшо кечын Тудо ылыж кынелеш».32Но тиде шомакым нуно умылен огытыл, а Тудын деч йодаш лӱдыныт.

33Иисус Капернаумыш толын. Пӧртышкӧ пурымекыже, Тудо нунын деч йодын: «Те корнышто мо нерген кутырышда?»34Но тунемшыж-влак нимом пелештен огытыл, вет нуно шке коклаштышт кӧжӧ кугурак манын корнышто ӱчашеныт.35Тунам Иисус шинчын, шке йырже латкок тунемшыжым поген да каласен: «Кӧ эн ончылно лийнеже, тек тудо эн шеҥгелне да чылалан тарзе лиеш».36Иисус йочам налын, нунын коклашке шогалтен, ӧндалын да ойлен:37«Кӧ тидын гай ик йочам Мыйын лӱмем верч йӧратен налеш гын, Мыйым налеш. А кӧ Мыйым налеш, тудо Мыйым огыл, Мыйым Колтышым налеш».

38Иисуслан Иоанн каласен «Туныктышо! Тыйын лӱмет дене иям поктен лукшо ик еҥым ужынна. Тудо мемнан дене пырля огыл, садлан ме тудым чарышна».39Но Иисус вашештен: «Тудым ида чаре. Кӧ Мыйын лӱмем дене чудым ышта, тудо Мыйын нерген вигак осалым ойлен ок керт.40Кӧ тендан ваштареш огыл, тудо тендан верч шога.41Тыланда чынак ойлем: Мыйын лӱмемлан кӧра да Христосын улмыланда верч кӧ тыланда корка вӱдым йӱаш пуа гынат, тудо суапым налде ок код.

42А Мыланем ӱшаныше тыгай изирак-влак кокла гыч иктыжым чын корно гыч кӧ кораҥда гын, тудын шӱйышкыжӧ вакшкӱм сакен, теҥызыш шуат гын, тудлан сайрак лиеш ыле.43Кидет тыйым алгаштарынеже гын, тудым руал шу. Тамыкысе йӧрташ лийдыме тулыш кок кидан логалмешке, илышыш пел кидан пураш тыланет сайрак.44Тамыкыште ”нунын шукшыштат ок коло, тулат ок йӧрӧ”.45Йолет тыйым алгаштарынеже гын, тудым руал шу. Тамыкыш йӧрташ лийдыме тулыш кок йолан кудалтыме лиймешке, илышыш пел йолан пураш тыланет сайрак.46Тамыкыште ”нунын шукшыштат ок коло, тулат ок йӧрӧ”.47Шинчат тыйым алгаштарынеже гын, тудым луктын шу. Тулан тамыкыш кок шинчан кудалтыме лиймешке, Юмын Кугыжанышыш пел шинчан пураш тыланет сайрак.48Тамыкыште ”нунын шукшыштат ок коло, тулат ок йӧрӧ”.

49Кажне еҥ тул дене шинчалтыме лиеш, да кажне надыр шинчал дене шинчалтыме лиеш.50Шинчал сай. Но шинчал шинчалан лиймым чарна гын, мо дене тудым угыч шинчаланым ыштен кертыда? Тендан кӧргыштыда шинчал лийже, да икте-весе дене келшен илыза».


предыдущая глава Глава 9 следующая глава