Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

МАРКЫН ВОЗЫМО СВЯТОЙ ЕВАНГЕЛИЙ

Глава 8

1-10 Ныл тӱжем еҥым пукшымаш. 11-13 Юмын палым ончыкташ йодмаш. 14-21 Ирод ден фарисей-влакын руышт. 22-26 Вифсаидаште сокырым паремдымаш. 27-30 Петр Иисусым Христос манеш. 31-38 – 9:1 Иисус Шкенжын колымыж да ылыжмыж нерген каласкала.

1Тиде кечылаштак моткоч шуко еҥ погынен, а кочкашышт нимо лийын огыл. Иисус тунемшыж-влакым Шкеже деке ӱжын да каласен:2«Нине еҥым чаманем. Нуно ынде кум кече Мый денем пырля улыт, а кочкашышт нимо уке.3Мый нуным шужышым мӧҥгышкышт колтем гын, корнеш ярнат. Южышт тора гыч толшо улыт».4Тунемшыж-влак Тудлан вашештеныт: «Чылам пукшаш манын, тыште, ир мландыште, кушеч тынар киндым налаш лиеш?»5Иисус нунын деч йодын: «Тендан киндыда кунар уло?» Нуно вашештеныт: «Шымыт».6Иисус калыклан мланде ӱмбалан верланаш кӱштен. Вара тиде шым киндым налын, Юмылан таум ыштен, тодылын да тунемшыж-влаклан, пуэдышт манын, пуэн. А нунышт киндым калыклан пуэденыт.7Нунын икмыняр изи колыштат лийын. Иисус тидымат благословитлен да шеледен пуаш кӱштен.8Чылан кочкын темыныт. Вара кодшо кинде катышым шым комдым погеныт.9Кочшо-влак ныл тӱжем нарын лийыныт. Иисус калыкым колтен,10тунамак тунемшыж-влак дене пырля пушышко шинчын да Далмануф кундемыш каен.

11Иисус деке фарисей-влак ӱчашаш манын миеныт. Тудым тергаш шонен, палдарыше палым ончыкташ йодыныт.12Иисус келгын шӱлалтен да пелештен: «Молан тиде тукым палдарыше палым йодеш? Мый тыланда чынак ойлем, тиде тукымлан пале ок пуалт».13Нуным коден, уэш пушыш шинчын да вес серыш вончен.

14Тунемшыж-влак пеленышт киндым налаш монденыт. Пушышто нунын ик сукыр гына лийын.15Иисус нунылан кӱштен: «Ончыза, фарисей-влакын руышт деч да Иродын ружо деч шекланыза».16А нуно шке коклаштышт шонкаленыт: «Мемнан киндына уке».17Тидым пален, Иисус каласен: «Те молан киндына уке манын ойледа? Те алят огыда ыҥле да огыда умыло мо? Шӱмда алят кӱэмалтше мо?18Тендан шинчада уло, огыда уж? Пылышда уло, огыда кол? Огыда шарне?19Вич сукыр киндым вич тӱжем еҥлан тодыл пуымем деч вара те кодшо катышыж дене мыняр комдым теменда?» «Латкокытым», – вашештеныт.20«А кунам Мый шым сукыр киндым ныл тӱжем еҥлан тодыл пуэнам, мыняр комдо кодшо катышым погенда?» «Шымытым», – вашештеныт нуно.21Иисус нунылан каласен: «Те кузе огыда умыло?»

22Вифсаидаш толмекыже, Иисус деке сокырым конденыт да тудын деке тӱкнаш йодыныт.23Иисус сокыр еҥым кидше гыч кучен, ял гыч вӱден луктын. Вара тудын шинчашкыже шӱвалын, ӱмбакыже кидшым пыштен да йодын: «Иктаж-мом ужат?»24Тудыжо ончалын да ойлен: «Мый эртен кайыше еҥ-влакым ужам, нуно пушеҥгыла койыт».25Иисус тудын шинчаж ӱмбаке уэш кидшым пыштен. Иисус тудлан ончалаш кӱштен, да тудо паремын, чыла раш ужаш тӱҥалын.26Иисус тудым мӧҥгыжӧ колтен да каласен: «Ялышке ит пуро да тушто тидын нерген нигӧлан ит каласкале».

27Иисус тунемшыж-влак дене пырля Филипп-Кесарий воктенысе яллашке каен. Корнышто Иисус нунын деч йодын: «Мыйым калык кӧлан шотла?»28Тунемшыж-влак вашештеныт: «Иктышт – Тынеш Пуртышо Иоаннлан, весышт – Илиялан, кумшышт – пророк кокла гыч иктыжлан».29Тудо нунын деч йодын: «А те кузе шотледа, Мый кӧ улам?» Петр вашештен: «Тый Христос улат».30Шкеж нерген нигӧлан каласаш огыл манын, Иисус нуным чарен.

31Вара Айдеме Эргын шуко орлыкым ужшашыж нерген Иисус тунемшыж-влаклан туныкташ тӱҥалын. Калык кугурак, архиерей ден закон туныктышо-влак Тудым йӧрдымыш луктыт. Тудым пуштыт, но кум кече гыч Тудо ылыж кынелеш.32Тидын нерген шылтыде ойлен. А Петр Иисусым ӧрдыжкӧ ӱжын да шӧрен ойлаш тӱҥалын.33Но Иисус савырнен, тунемшыж-влак ӱмбаке ончалын да Петрлан пеҥгыдын каласен: «Кораҥ Мый дечем, сатана! Тыйын шонымет айдемын, а Юмын огыл».34Вара Иисус калыкым да тунемшыж-влакым Шкеж деке ӱжын да каласен: «Кӧ почешем кайынеже, шке эрыкшым кудалтыже, шке ыресшым налже да почешем ошкылжо.35Вет кӧ шке чонжым утарынеже, тудо йомдара, а кӧ чонжым Мыйын верч да Поро Увер верч йомдара, тудо чонжым утара.36Уло тӱням кидышкыже налеш, но чонжылан зияным конда гын, айдемылан могай пайда?37Айдеме мо дене чонжым сулен налеш?38Яжарланыше да языкан тиде тукым коклаште Мый дечем да Мыйын шомакем деч кӧ вожылеш, Айдеме Эргат Ачажын чапше дене святой Суксо-влак дене пырля толмыж годым тудын деч вожылеш».


*а 8:34 Эрык – воля, желание.

предыдущая глава Глава 8 следующая глава