Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

МАРКЫН ВОЗЫМО СВЯТОЙ ЕВАНГЕЛИЙ

Глава 10

1-12 Мужыраҥме да ойырлымо нерген. 13-16 Иисус ден йоча-влак. 17-31 Поян. 32-34 Иисус шке колымыж да ылыжмыж нерген кумшо гана ойла. 35-45 Иаков ден Иоаннын йодмышт. 46-52 Иисус Вартимей лӱман сокырым паремда.

1Иисус, тушечын кайымеке, Иордан вес могырысо Иудей кундемыш толын. Тудын деке адакат калык погынен, Иисус нуным ончычсо семынак туныктен.

2Тудын деке фарисей-влакат толыныт. Нуно Тудым тергаш шонен йодыныт: «Марийлан ватыжым ойырен колташ лиеш мо?»3Иисус вашештен йодын: «А мом тыланда Моисей шӱден?»4Нуно ойленыт: «Моисей ойырлымо нерген кагазым возаш да ойырлаш лиеш манын».5Иисус вашештен: «Пешкыде шӱман улмыланда кӧра Моисей тыгай законым тыланда возен.6Тӱҥалтыштак, кунам Юмо тӱням да еҥ-влакым ыштен, нунылан пӧръеҥ ден ӱдырамаш лияш пӱрен.7Сандене пӧръеҥ ачаж ден аважым кода, шке ватыж дене ушна,8да нуно коктын ик кап да чон лийыт. Тыгеракын, нуно ынде кокыт огыл, а икте улыт.9Мом Юмо ушен, айдеме ынже ойыро».

10Пӧртыштӧ тунемшыж-влак Иисус деч тидын нергенак угыч йодыныт.11Иисус нунылан тыге вашештен: «Кӧ шке ватыжым ойырен колта да весым марлан налеш, ватыж ваштареш яжарланыме языкым ышта.12А вате, марийже деч ойырлен, весылан марлан лектеш гын, тудат яжарлана».

13Нунын деке тӱкныжӧ манын, Иисус деке йочаштым конденыт. Но тунемшыж-влак кондышо-влакым чареныт.14Кунам Иисус тидым ужын, шыдешкен да каласен: «Йоча-влакым Мый декем пуртыза, нуным ида чаре, вет Юмын Кугыжаныш – нунын гай еҥ-влакын.15Тыланда чынак ойлем: кӧ Юмын Кугыжанышым йоча семын порын ок вашлий, тудо тушко пурен ок керт».16Иисус йоча-влакым ӧндалын, нунын ӱмбаке кидшым пыштен да нуным благословитлен.

17Иисусын корныш лекмыж годым Тудын дек ик еҥ куржын миен, ончыланже сукен шинчын да йодын: «Поро Туныктышо! Курымашлык илышым налаш манын, мыланем мом ыштыман?»18Иисус тудлан каласен: «Молан тый Мыйым поро манат? Юмо деч моло нигӧ поро огыл.19Тудын кӱштымыжым тый палет: ”Ит яжарлане”, ”Ит пушт”, ”Ит шолышт”, ”Шойыштын, еҥ ӱмбаке таныклен ит ойло”, ”Еҥыным ондален ит нал”, ”Ача-аватым пагале”»...20«Туныктышо, – вашештен еҥ, – чыла тидым самырык годсек мый шуктен шогем.»21Иисус тудын ӱмбаке йӧратен ончалын да каласен: «Икте гына тыланет ок сите: кае да уло погетым ужале, оксажым йорло-влаклан пу. Тунам пылпомышто тыйын поянлыкет лиеш. Вара тол, ыресетым нал да почешем кай».22Но тыгай ойлан пӧръеҥ шӱлыкаҥын да ойганен кораҥын. Тудо моткоч поян улмаш.

23Иисус йырваш ончалын да тунемшыж-влаклан каласен: «Поян еҥлан Юмын Кугыжанышыш пураш моткоч йӧсӧ!»24Нине мутшо тунемшыж-влакым чот лӱдыктен, но Иисус уэш каласен: «Икшывем-влак, поянлыклан ӱшаныше-влаклан Юмын Кугыжанышыш пураш моткоч йӧсӧ!25Верблюдлан имышу вошт лекташ куштылго огыл, а поянлан Юмын Кугыжанышыш пураш эшеат нелырак».26Тунемшыж-влак эшеат чот ӧрыныт да икте-весышт деч йодыштыныт: «Тыгеже кӧ утаралт кертеш?»27Иисус нунын ӱмбак ончалын да каласен: «Еҥ-влаклан тиде ышташ лийдыме, но Юмылан огыл. Юмо чыла ыштен кертеш».

28Тунам Петр ойлаш тӱҥалын: «Теве ме чыла коденна да Тыйын почешет каенна».29Иисус каласен: «Тыланда чынак ойлем: кӧ гына Мыйын верч да Поро Увер верч пӧртым, иза-шольым, ака-шӱжарым, ача-авам, ватым, йочам але пасум коден,30тудо ынде кызытсе саманыште, шыгыремдылме жапыште, шӱдӧ пачаш шукырак пӧртым, иза-шольым, ака-шӱжарым, авам, йочам, пасум налде ок код. А шушаш саманыште тудо курымаш илышым налде ок код.31Туге гынат ончылсо-влак шукышт шеҥгелне да шеҥгелсе-влак шукышт ончылно лийыт».

32Нуно корно дене Иерусалим велкыла тайыл ваштареш кӱзеныт. Иисус ончылно ошкылын, а тунемшыж-влак ӧрыныт, почешыже лӱдын каеныт. Тудо латкок тунемшыжым адак Шкеж деке ӱжын да Шкеж дене мо лийшаш нерген каласкалаш тӱҥалын:33«Теве ме Иерусалимыш миен шуына. Айдеме Эрге архиерей ден закон туныктышо-влаклан кучен пуалтеш. Нуно Тудым пушташ пунчалыт да чын Юмым палыдыме-влакын кидыш пуат.34Тудым игылтыт, ӱмбакыже шӱведат, сола дене кырат, а вара пуштыт. Но кумшо кечын Тудо ылыж кынелеш».

35Иисус деке Зеведейын Иаков ден Иоанн эргышт лишемыныт. «Туныктышо, – каласеныт нуно, – мом Тый дечет йодына, мыланна ыште.»36Тудо йодын: «Те Мый дечем мом ыштымым вучеда?»37Нуно маныныт: «Кунам чапыштет лият, мыланна иктыжлан пурла могырыштет, весыжлан шола могырыштет шинчаш пу».38Иисус нунылан каласен: «Те мом йодмыдам огыда пале. Мыйын йӱшаш чаше гыч йӱын кертыда мо? Мыйын тынеш пурымем семын тынеш пурен кертыда мо?»39«Кертына», – вашештеныт нуно. Иисус нунылан ойлен: «Мыйын йӱшаш чаше гыч теат йӱаш тӱҥалыда. Тынешат Мыйын семынак пуреда.40Но воктекем пурла да шола велыш шындаш Мый дечем огыл, а нине верым кӧлан ямдылыме, нунын лийыт».

41Тиде мутланыме нерген моло лу тунемшыже колмеке, Иаков ден Иоаннлан сыреныт.42Иисус нуным Шкеж деке ӱжын да каласен: «Те паледа: калык-влакын вуйлатышыштлан шотлалтше-шамыч нунын дене озаланат, да виянышт калык-влакым кид йымалнышт кучат.43Но тендан коклаште тек тыге огеш лий. Тендан коклаште кӧ кугурак лийнеже, тудо тек тарзыда лиеш,44кӧ ончылно лийнеже, чылаштынат кулжо лийшаш.45Айдеме Эргат Шкаланже тарзыланыкташ огыл, а тарзе лияш да шуко айдемым тӱлен налаш манын, шке чонжым пуаш толын».

46Нуно Иерихоныш миен шуыныт. Тунемшыж-влак да шуко калык дене пырля Иерихон гыч Иисусын лекмыж годым Тимейын Вартимей эргыже, сокыр кӱчызӧ, корно воктене шинчен.47Воктечынже Назорей Иисус эртымым пален налмеке, тудо кычкыраш тӱҥалын: «Иисус, Давидын Эргыже! Мыйым серлаге!»48Шыпланыже манын, тудым шукын чареныт. Но Вартимей утларак чот веле кычкырен: «Давидын Эргыже! Мыйым серлаге!»49Иисус чарнен шогалын да тудым ӱжаш каласен. Сокырым ӱжаш миеныт да каласеныт: «Ит лӱд! Кынел, Тудо тыйым ӱжеш».50Вартимей ӱмбал вургемжым кудаш кудалтен, кынелын да Иисус деке миен.51Иисус йодын: «Тый Мый дечем мом ыштымым вучет?» Тудо манын: «Раввуни, шинчам почылтшо».52Тунам Иисус тудлан каласен: «Кае, тыйым ӱшанымет утарен». Сокырын шинчаже тунамак почылтын да тудо Иисус почеш корно дене каен.


*а 10:4 Втор 24:1.

*б 10:6-8 Быт 1:27, 2:24.

*в 10:19 Исх 20:12-16, Втор 24:14.

предыдущая глава Глава 10 следующая глава