Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

МАРКЫН ВОЗЫМО СВЯТОЙ ЕВАНГЕЛИЙ

Глава 1

1-8 Тынеш Пуртышо Иоанн. 9-13 Иисусым тынеш пуртымаш да тергымаш. 14-20 Икымше тунемшыж-влак. 21-28 Капернаумысо синагогышто. 29-34 Иисус шуко еҥым паремда. 35-39 Иисус Галилейыште туныктен каласкала. 40-45 Проказе черан еҥым паремдымаш.

1Юмын Эрге Иисус Христосын Евангелийжын тӱҥалтышыже

2Пророк-влакын книгаштышт тыге возымо:
«Теве Тыйын ончылнет
Мый Шкемын Суксем колтем,
Тудо Тылат корным ямдыла.
3Ир мландыште кычкырышын йӱкшӧ шокта:
”Господьлан корным ямдылыза!
Тудын йолгорныжым вияшым ыштыза!”»

4Иоанн толын. Тудо еҥ-влакым ир мландыште тынеш пуртен да языкыштым касарыкташ манын, язык верч ӧкынен, тынеш пураш туныктен.5Тудын деке уло Иудей эл да Иерусалимысе калык лектыныт. Нуно шке языкыштым почын ойленыт, да Иоанн чыланыштымат Иордан эҥереш тынеш пуртен.

6Иоанн верблюд меж вургемым чиен коштын, кыдалыштыже шӱштӧ ӱштӧ лийын. Тудо шурнышырчыкым да ир мӱкшын мӱйжым кочкын илен.7Иоанн тыге увертарен: «Мыйын почешем мый дечем Виянрак толеш. Мый Тудын йолчием кылжым, кумык лийын, рудашат ом йӧрӧ.8Мый тендам вӱд дене тынеш пуртем, а Тудо тендам Святой Шӱлыш дене тынеш пурташ тӱҥалеш».

9Тудо жапыште Галилейысе Назарет гыч Иисус толын, да Иоаннлан Шкенжым Иордан эҥереш тынеш пуртыктен.10Вӱд гыч лекмыж годым Иисус шелалт почылтшо пылпомышым да ӱмбакыже кӧгӧрчен семын волышо Святой Шӱлышым ужын.11Пылпомыш гыч йӱк шоктен: «Тый Мыйын йӧратыме Эргым улат, Мыйын поро кумылем Тый денет!»

12Тидын деч вара Святой Шӱлыш Иисусым вигак ир мландыш наҥгаен.13Тушто, ир мландыште, Тудо нылле кече лийын, да сатана Тудым алгаштараш тӧчен. Иисус янлык-влак коклаште лийын, Тудлан Суксо-влак служитленыт.

14Иоанным кучен петырыме деч вара Иисус Галилейыш толын да Юмын Кугыжанышын Поро Увержым каласкален15ойлен: «Жап шуын, Юмын Кугыжаныш ынде лишемын. Языкым касарыктен, Юмо деке савырныза да Евангелийлан ӱшаныза!»

16Галилей теҥыз сер воктене коштмыж годым Иисус вӱдышкӧ вапшым кышкыше Симон ден тудын Андрей шольыжым ужын. Нуно колызо лийыныт.17Нунылан Иисус каласен: «Мыйын почешем кайыза. Мый тендам айдеме кучышым ыштем!»18Нуно тунамак вапшыштым коденыт да Тудын почешыже каеныт.

19Умбакырак торлымеке, Иисус Зеведейын Иаков ден Иоанн эргыж-влакым ужын. Нуно пушышто шинченыт да вапшым тумыштеныт.20Иисус нунымат тунамак ӱжын. Нуно, Зеведей ачаштым да тарлыме пашаеҥ-влакым пушеш коден, Тудын почеш каеныт.

21Иисус тунемшыж-влак дене Капернаумыш миен. Икымше шуматкечынак Тудо синагогыш пурен да туныктен.22Калык Тудын туныктымыжлан ӧрын. Нуным закон туныктышо-влак семын огыл, а власть улшан семын туныктен.

23Тиде жапыштак тысе синагогышто осал шӱлыш кучыман еҥ улмаш да кычкыраш тӱҥалын:24«Назарет Иисус, мемнам ит логал! Мом Тый мемнан дене ыштынет? Мемнам пытараш толынат? Кӧ улметым мый палем, Тый Юмын Святойжо улат!»25Но Иисус осал шӱлышым чарен каласен: «Шып лий! Кӧргыж гыч лек!»26Осал шӱлыш тиде еҥым чытырыктен да, чот кычкыралын, тудын кӧргыж гыч лектын.27Чылан чот лӱдыныт да икте-весышт деч йодыштыныт: «Мо тиде? Тиде могай у туныктымаш? Тиде Айдеме осал шӱлыш-влакланат виян кӱшта, да нунышт Тудын мутшым колыштыт».28Тунамак Иисус нерген ойлымо шомак уло Галилей мланде мучко шарлен.

29Синагог гыч лектын, нуно тунамак Иаков да Иоанн дене пырля Симон ден Андрейын мӧҥгышкышт каеныт.30Симонын оньыкуваже шокшымужо дене черле киен, тудын нерген Иисуслан вигак ойленыт.31Иисус тудын деке миен, кидшым кучен да кынелаш полшен. Шокшымужо тунамак пытен, да ӱдырамаш уна-влакым ончаш тӱҥалын.

32Кастене, кече шичмеке, Иисус деке черле-влакым да иян кид йымакыже логалше-влакым чыланыштымат намиеныт.33Омса ончыко уло ола погынен.34Иисус тӱрлӧ чер деч шуко еҥым паремден. Тудо ятыр иям поктен луктын, но нунылан ойлаш кӱштен огыл, вет Тудым, Тудо Христос улмым нуно паленыт.

35Иисус эрдене эрак волгыжаш тӱҥалме деч ончыч кынелын, тымык верыш каен да тушто кумалын.36Симон да тудын дене пырля лийше-влак Иисус почеш вашкеныт.37Тудым мумеке, Тудлан ойленыт: «Чыланат Тыйым кычалыт».38Иисус нунылан манын: «Лишыл яллашке да олалашке каена. Мыланем туштат туныктен каласкалаш кӱлеш. Тидланак Мый толынам».39Тудо уло Галилей мучко коштын, синагоглаште увертарен каласкален, ия-влакым поктен луктын.

40Иисус деке проказе черан еҥ лишемын, Тудын ончылан сукен шинчын да сӧрвален йодын: «Паремдынет гын, мыйым эрныктен кертат».41Иисус тудым чаманен, кидшым шуялтен, тудын деке тӱкнен да каласен: «Паремдынем, эрналт!»42Иисус тыге пелештымеке, тиде еҥын проказе черже тунамак пытен, тудо эрнен.43Тиде еҥым Иисус тунамак поктен колтен, но тылеч ончыч тудлан пеҥгыдын каласен:44«Шеклане, тидын нерген нигӧлан нимом ит ойло. Кай да шкендым иерейлан ончыкто, эрналтмет лӱмеш Моисейын кӱштымӧ надыржым намие. Тидын дене тый паремметым ончыктет».45Но тудо каен да шкеж дене мо лийме нерген чылалан каласкалаш тӱҥалын. Тидлан кӧра олашке Иисус еҥ ончылно пурен кертын огыл. Тудо олала деч ӧрдыжтӧ, тымык верлаште, лийын. Иисус деке калык чыла верла гычат миен.


*а 1:2-3 Мал 3:1, Ис 40:3.

предыдущая глава Глава 1 следующая глава