Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

МАРКЫН ВОЗЫМО СВЯТОЙ ЕВАНГЕЛИЙ

Глава 2

1Икмыняр кече гыч Иисус уэш Капернаумыш толын, да еҥ-влак мӧҥгыштӧ улмыж нерген колыныт.2Вашке тушко тунар калык погынен, омса воктенат вер кодын огыл. Иисус нунылан Юмын шомакым ойлен.3Тудын деке ныл пӧръеҥ йыжыҥдыме еҥым нумал конден.4Калык шуко улмылан кӧра Иисус деке лишемын кертын огытылат, Тудын тураште пӧрт леведышым ронченыт, вакшышыште кийыше черле еҥым рож гыч волтеныт.5Иисус нунын ӱшанымыштым ужын да йыжыҥдыме айдемылан каласен: «Эргым, тыйын языкет кудалтыме лиеш!»

6Тушто законым туныктышо икмыняр еҥ шинчен. Нуно шке семынышт шоненыт:7«Молан Тудо тыге Юмым мыскылен ойла? Юмо деч моло кӧ айдемын языкшым кудалтен кертеш?»8Нунын тыге шонымыштым Иисус шке шӱлышыж дене тунамак шижын да нунылан каласен: «Шӱмыштыда молан тыге шонеда?9Можо куштылгырак? Йыжыҥдыме еҥлан ”Тыйын языкетым Юмо кудалта” але ”Кынел, вакшышетым нал да ошкыл” манмыже?»10Но те пален лийза: Айдеме Эргын мланде ӱмбалне языкым кудалташ властьше уло». Иисус йыжыҥдыме еҥлан каласен:11«Тыланет ойлем: кынел, вакшышетым нал да мӧҥгышкет кай».12Чылан ончылно тудо тунамак кынелын, вакшышыжым погалтен да лектын каен. Тиде чылам чот ӧрыктарен, еҥ-влак Юмым чапландареныт да ойленыт: «Тыгайым ме нигунам ужын огынал!»

13Иисус угыч теҥыз деке лектын. Уло калык Тудын деке толын, да Иисус нуным туныктен.

14Йозак оксам погымо вер воктеч эртен кайымыж годым Иисус тушто Алфейын Левий эргыже шинчымым ужын да тудлан каласен: «Почешем мий». Левий кынелын да Тудын почешыже каен.15Вара Иисус Левийын пӧртыштыжӧ кочкын. Тудын да тунемшыж-влак дене пырля йозак погышо да моло языкан еҥ-влакат шукын кочкыныт, вет Тудын почеш коштшо коклаште тыгайже шуко лийын.16Нунын дене пырля Иисусын кочмыжым ужмекышт, закон туныктышо ден фарисей-влак Тудын тунемшыж-влаклан ойленыт: «Кузе Тудо йозак погышо да языкан-влак дене пырля кочкеш да йӱэш?»17Иисус тидым колын да нунылан каласен: «Таза еҥлан огыл эмлызе кӱлеш, а черлылан. Мый чын ыштыше-влакым огыл, языкан-влакым языкыштым касарыкташ да Юмо деке савырнаш ӱжаш толынам».

18Иоаннын да фарисей-влакын тунемшышт пӱтым кученыт. Иисус деке толыныт да ойленыт: «Молан Иоанн ден фарисей-влакын тунемшышт пӱтым кучат, а Тыйын тунемшет-влак огыт кучо?»19Иисус нунылан вашештен: «Сӱан пайремыште каче дене пырля лийше уна-влак пӱтым кучен кертыт мо? Нунын пеленышт каче але улмо годым пӱтым кучен огыт керт.20Но тугай жап толын шуэш, кунам каче нунын деч налалтеш, тунам, тудо кечылаште, пӱтым кучат.21Тошто вургемеш ошемдыдыме куэм дене тумышым нигӧ ок шынде. Тыгай тумыш туртеш да вургемым кушкедеш. Рож утларак кугемеш.22Тошто шувышыш шуын шудымо йошкар аракам нигӧ ок опто, тыгай арака тошто шувышым кушкедеш. Аракажат йоген пыта, шувышыжат йӧрдымӧ лиеш. Шуын шудымо аракам у шувышыш оптат».

23Икана шуматкечын Иисус шурно пасу гоч эртен. Тунемшыже-влак, кайышыштла, шурно парчам кӱраш тӱҥалыныт.24Фарисей-влак Иисуслан ойленыт: «Ончо, мом нуно ыштат! Тидым шуматкечын ышташ ок лий».25Иисус вашештен: «Кунам Давид да пеленже лийше-влак шуженыт да кочкашышт нимо лийын огыл, тунам тудын мом ыштымыж нерген те лудын огыдал мо?26Надыр киндым иерей-влаклан веле кочкаш лиеш гынат, Авиафар архиерей годым Давид Юмын пӧртыш пурен да тиде киндым кочкын, пырля лийше-влакланат пуэн».27Вара Иисус каласен: «Шуматкече айдемылан, а айдеме шуматкечылан огыл.28Тыгеже Айдеме Эрге шуматкечыланат оза!»


*а 2:25-26 Ончо Лев 24:5-9, 1 Цар 21:2-6.

предыдущая глава Глава 2 следующая глава