Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

МАТФЕЙЫН ВОЗЫМО СВЯТОЙ ЕВАНГЕЛИЙ

Глава 28

1-10 Ылыж кынелмаш. 11-15 Сарзе-влакын ойлымышт. 16-20 Тунемшыж-влаклан Иисусын кӱштымыжӧ.

1Шуматкече деч вара, арнян икымше кечын волгалташ тӱҥалме годым, Мария Магдалина ден вес Мария шӱгарым ончаш толыныт.2Теве мланде виян чытырналтын: Господьын Суксыжо пылпомыш гыч волен, шӱгар деке миен да аҥысе кӱм кораҥден, ӱмбакыже шинчын.3Суксын тӱсшӧ волгенче гай улмаш, вургемже лум гай ошо.4Туддеч лӱдын, оролышо-влак чытыраш тӱҥалыныт да колышо гай лийыныт.

5А Суксо мутшым ӱдырамаш-влак велке савырен ойлен: «Те ида лӱд. Палем, те пудален сакыме Иисусым кычалыда.6Тудо тыште уке, ойлымыжо семынак ылыжын, лишкырак толза да Господьын кийыме вержым ончалза.7Вара писынрак кайыза да Тудын тунемшыж-влаклан каласыза: Тудо колымаш гыч ылыжын да тендам Галилейыште вашлиеш. Тушто Тудым ужыда. Мый кызыт тыланда ойлышашем каласенам».

8Ӱдырамаш-влак шӱгар деч писын кораҥыныт, лӱдын да чот куанен, Иисусын тунемшыж-влаклан увертараш куржыныт.9Теве тунемшыж-влаклан увертараш кайымышт годым Иисус нуным вашлийын да каласен: «Куаныза!» Нуно лишемыныт, ончыланже сукен, вуйым савен, йолжым ӧндалыныт.10Иисус ойлен: «Ида лӱд, мийыза да лишыл йолташем-влаклан Галилейыш каяш каласыза. Нуно Мыйым тушто ужыт».

11Ӱдырамаш-влак кайымеке, орол кокла гыч южышт олашке пуреныт, архиерей-влаклан мо лиймым чыла увертареныт.12А нунышт калык кугурак-влак дене погыненыт, каҥашен налмеке, сарзе-влаклан шуко оксам пуэныт13да ойленыт: «Тудын тунемшыж-влак йӱдым толыныт да малымына годым капшым шолышт наҥгаеныт манын каласыза.14Вуйлатыше деке тидын нерген увер миен шуэш гын, ме тудым ӱшандарена, да тыланда нимо шотыштат азапланыме ок кӱл».15Сарзе-влак, оксам налын, каласыме семынак ыштеныт. Нунын ойлымыштым иудей-влак коклаште тачысе кече мартеат шаркалат.

16А латик тунемшыже Галилейыш Иисусын кӱштымӧ курык ӱмбаке каен.17Иисусым ужмеке, ончыланже кумык возыныт, а южышт кокытеланеныт.18Иисус нунын деке лишемын да каласен: «Мылам пылпомышто да мландӱмбалне пӱтынь власть пуалтын.19Сандене кайыза да чыла калык-влакым туныктыза. Ача, Эрге да Святой Шӱлыш лӱмеш нуным тынеш пуртыза,20тыланда чыла кӱштымем шуктен шогаш туныктыза. Тӱня пытымешке, Мый кече еда тендан дене пырля лиям. Аминь».


предыдущая глава Глава 28 следующая глава