Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

МАРК ХУМ ХАНСУМ ЁМАС ЛЯ̄ХХАЛ

Глава 15

Ӣсус Пилат э̄лы-пāлт

1Āлпыл пӯп-ōйкат, матум э̄руптан ōйкат, сāккон тотнэ хумыт ос синедрион Ӣсус урыл потыртахтасыт. Тāн Ӣсус ёл-нэ̄гсаласаныл, Пилат пāлт тотсаныл.2Пилат Ӣсус китыгластэ:

– Наӈ сōль еврей хōны̄г ōлэ̄гын?

– Сōль, наӈ лāвегын, тасыр-та. – Ӣсус лāвыс.

3Пӯп-ōйкат Ӣсус нупыл сāвсыр лю̄ль вāрмаль патты̄сыт.4Таимāгыс Пилат Таве ōс китыгластэ:

– Наӈ манрыг нэ̄матыр ат лāвēгын? Сунсэн, мансāвит лю̄ль вāрмаль Наӈ нупылн пинвес?

5Ӣсус ōс нэ̄матыр ювле ат лāвыс. Ань Пилат ты осятахтыс.

Э̄лумхолас алнэ хум Варавва хумус тартавес ос Ӣсус сутитавес

6Касыӈ ялпыӈ хōтал Пилат акв хум кāснаколыл тāртыглāлыс. Мирн хӯлтнэ хōтпа тāртыглāлыс.7Тōнт ань э̄лумхōлас алам хум Варавва кāснаколт ӯнлыс. Тав алхатаме порат э̄лумхōлас алас.8Мāхум Пилат вōвуӈкве патсаныл, ялпыӈ хōтал мāгыстав акв хōтпа вос тāраты.

9– Нāн танхегы̄н-ке, ам еврей хōн тāратылум? – Пилат мир китыгласанэ.

10Тав вāстэ: пӯп-ōйкат лаваныл нэ̄глын мāгыс Ӣсус тав кāтэ̄н мисаныл.11Мир ань пӯп-ōйкатын хуйтвēсыт, тāн Варавва тāратаӈкве вос касилтыяныл.

12– Еврей хōн ёт, нāн сирынт, мāныр вāруӈкве э̄ри? – Пилат китыглахтас.

13– Тав пēрна тармыл порслаӈкве э̄ри! – мāхум рōӈхалтахтасыт.

14– Манры̄г? Мāныр лю̄ль вāрмаль Тав вāрыс?

Мир аня усьпылнэ̄г тāкысь рōӈхалтахтасыт:

– Таве пēрна тармыл порслэ̄лы̄н!

15Мāхум ёл-пōйлтан мāгыс Пилат-ōйка Варавва тāратастэ, ос Ӣсус рāтуӈкве лāвыстэ. Тувыл пēрна йӣвн кāтагэ-лāглагэ ёл-рāтуӈкве лāвсанэ.

Ӣсус хōнтхумытн хумус саватавес

16Хōнтхумыт Ӣсус Юдея-мā кусяй кāртан тотсаныл. Яныг хōнт пуссын тув атсаныл.17Тāн Таве вы̄гыр маснутыл мастысаныл. Тувыл пēлялахтын пумныл вāрим лāкв Тав пуӈкēн мастысаныл.

18– Пася ōлэн, еврей хōн! – тāн рōӈхысыт.

19Тāн Таве пуӈкēт йӣвыл рāтсаныл. Тав ля̄льтэ полх сальгысыт, эрттам Таве янытланэ̄ныл мāгыс Тав э̄лы-пāлэ̄н санспуӈканыл тармыл лю̄лим пуӈк пинсыт.20Саватаманыл юи-пāлт маснутэ хōт-ахвсаныл. Ōс такви маснутанэ̄тыл мастысаныл. Пēрнан кēрсолил ёл-рāтуӈкве та вāнттысаныл.

Пēрна йӣвын рāтвес

21Хōнтхумыт лё̄ӈх хосыт миныманыл Симон, Киринея мāныл ōлнэ Александр ос Руфус āсēн, кāсаласаныл. Тав тэ̄пканэ̄ныл ювле ё̄мыс. Тāн таве пēрна āлумтаӈкве лāвсаныл.22Ӣсус Голгофа мāн тотвес. Ты толмасьлаве: пуӈк-хопалы.23Хōнтхумытн Тав смирна ёт тэ̄лыгтым винал майлувес, Тав аюӈкве ат патыс.24Тāн Ӣсус пēрна тāрмыл катагэ-лаглагэ рāтсаныл. Тав маснутанэ ӯчалахтым тāнки халанылт уртсаныл.25Хӯрум сё̄с нупыл минаме порат Тав пēрнан рāтвес.26Ӣсус пуӈке нуми-пāлт хансым ōлыс, мāныр мāгыс Тав пēрнан рāтвес: “Еврей хōн”.

27Ӣсус пōхат кит хōрахсиг пēрнан рāтвесы̄г: акватэ ёмаспāлн, мōтанэ вōртыпāлн.28Ты ōвылтыт Нэ̄пакт та нак ēмтыс: “Тāв лю̄ль вāрне хӯмыг номсыве”.29Та торыг ё̄мнэ мāхум пуӈканыл хосгым нēрхатасыт. Таве та лю̄ль лāтӈыл лю̄камтасаныл:

– Я, мāныр, Наӈ ялпыӈ кол хот-сакватаӈкве ēмталасын? Тувыл хӯрум хōтал сыс таве йильпиӣг ӯнттуӈкве номсы̄слын!30Пēрнаныл ёл-квāлэ̄н! Наӈкинāнын вēстэ̄лын!

31Пӯп-ōйкат ос сāккон тотнэ хумыт Тавēтыл ос мовиньтасыт:

– Мōт мāхум вēстысанэ, Таквинāтэ вēстуӈкве ат вēрми.32Израиль мā хōн Кристос пēрнаныл ёл вос квāлы. Тōнт мāн Тавēн агтэ̄в.

Тав пōхатэ̄н пēрнан рāтым хōрахсиг ос Тавēтыл мовиньтасы̄г.

Ӣсус сорме

33Хōт сё̄с нупыл минам порат мā янытэ̄т турманлас. Турманы̄г онтолов сё̄с мус ōлыс.34Онтолов сё̄с нупыл минам порат Ӣсус тāкысь рōӈхувлас:

– Элои, Элои, ламма савахфани? Ты толмасьлаве: “Тōрмум! Тōрмум! Āнум манры̄г оссувласлын?”

35Ляпат лю̄люм мāхум ты лāтӈыт хӯлманылт лāвсыт:

– Тав Ӣлия вōвитэ.

36Акв хум ляпан хāйтыс, тōрлōмт ӯксус винал посылтастэ. Тувыл сувын нэ̄гим Ӣсусн айнэ мāгыс сӯпēн тактыстэ. Ань та хум лāвыс:

– Таве тактēтэ хультуптылув, сунсэ̄в, аман сōль Ӣлиян ё̄хтаве — пēрнаныл ёл-виӈкве.

37Ӣсус ань тāкысь рōӈхувлас, лылытэ та оигпас.

38Та торыг ялпыӈ колт тōрсāй нумыл ёлытэ пāсыл китты̄г ёл-тōлматас.39Ань тот ōлум хōнтхумыт пуӈкхум ты рōхсуй хӯлыстэ ос лāвыс:

– Сōль ты э̄лумхōлас Тōрум Пыгы̄г ōлыс!

40Тот ань э̄кват лю̄ляхōлсыт. Тāн ты пуссын вāсаныл. Тāн халанылт Мария Магдалина, Мария — мāнь Яков ос Юсий тэ̄н ся̄нēн, ос Саломия ōлсыт.411Ты нэ̄т Ӣсус ёт сāртын Галилея мāт ōлсыт. Тавēн аквāг нё̄тыглāлсыт. Тав юи-пāлэ̄т йисыт. Та коны-пал ань ōс сāв мāхум тот лю̄ляхōлсыт. Тāн пуссын Тав ётэ Иерусалим ӯсн ёхтысыт.

Ӣсус ёл-сё̄питаве

42Сабат э̄лы-пāл хōтал ōлыс. Э̄типāлаг43Аримафея мāныл ōлнэ Ӯщуп хум Пилат палт пилтāл мнас. Та хум синедрион э̄руптан намыӈ-суиӈ хумы̄г ōлыс. Тав Тōрум ōлнэ хōн-мā ōс ӯрыс. Тав ань Пилат пāлт Ӣсус алпи вōвуӈкве ёхтыс.44Ӣсус лылытэ оигпам урыл хӯлмēт Пилат такем осятахтыс. Тав хōнтхумыт пуӈкхум вōвыстэ, китыглахтас, сōль мāн Ӣсус āтимы̄г ēмтыс.45Ӣсус āтимы̄г ēмтум урыл хӯлмēт ань Ӣсус алпи Ӯщупын мистэ.46Ӯщуп понал тōр ёвтыс, Ӣсус пēрнаныл ёл-вистэ, тōрыл лап-мāнигтастэ. Тувыл Ӣсус āхвтас кӣвырт вāрим курсипын пиныстэ. Āхвтас курсипе яныг āхвтасыл лап-лаквтыстэ.47Мария Магдалина ос Мария – Иосий ся̄нь суссы̄г, хоталь Тав пинвес.


предыдущая глава Глава 15 следующая глава