Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

МАРК ХУМ ХАНСУМ ЁМАС ЛЯ̄ХХАЛ

Глава 14

Ӣсус пӯп-ōйкатын порслаӈкве таӈхаве

1Кит хōтал юи-пāлт пасха ос яныг ялпыӈ пора ёхтыс. Яныг пӯп-ōйкат ос сāккон тотнэ хумыт номсасыт, осьмарыл Ӣсус хумус кāтн-пāттуӈкве ос порслаӈкве.

2Пасха ялпыӈ хōтал порат тох вāруӈкве ат вēрмысыт. Мāхум тāн нупланыл ул вос кантмаявет ань пӯп-ōйкат тāнки халанылт тох потыртахтасыт.

3Ӣсус Вифания пāвылт, проказал āгмыӈ Симон колт ōлыс. Та колн ань нэ̄ сялтыс, кāтэ̄т алабастерныл вāрим вōйсулья пувыс. Ты вōй тыныӈ нардныл вāрим ōлыс. Та нэ̄ алабастер сулья хот-сакватастэ, вōйе Ӣсус пуӈк паттан сōсыстэ4Тōва мāхум хот-кантмувēсыт:

– Тамле тыныӈ вōй манры̄г холтылын?5Ты вōй хӯрумсат динарийныл тыныӈнувēг тыналаӈкве рōвыс. Олныт ос нуса мирн уртуӈкве рōвсыт.

6Ӣсус лāвыс:

– Таве ул нагэлы̄н! Нāн таве манры̄г э̄ссамтылы̄н? Тав Āнумн ёмас вāрмаль вāрыс.7Нуса хōтпат āкваг нāн ётын ōлэгыт. Хунь тахмаēгы̄н, тāнанылн тōнт та ёмас вāрмаль вāрегы̄н. Ам ань нāн ётын āкваг ат ōлэ̄гум.8Ты нэ̄ мāныр вēрмыс, таи та вāрыс. Ам алпим ёл-сёпитанэм вōйл та сартыстэ.9Ам нāнан мāк лāвēгум: хоты мāт Ёмас Ля̄ххал потыртаӈкве патаве, тот ты нэ̄ ат ёрувлаве. Тав мирн номуӈкве патаве.

10Ӣсус китхуйплув хумиянэ халт акв хум, Иуда Искариот, ōлыс. Тав яныг пӯп-ōйкат пāлт минас. Тав Ӣсус пӯп-ōйкатын тыналаӈкве таӈхыстэ.11Пӯп-ōйкат Иуда хунтламанылт хот-ся̄гтсыт. Иудан ся̄лыг олн ойтуӈкве лāвхатсыт. Та пāсыл Иуда номсахтас, Ӣсус порсланэ̄тэ мāгыс тāнанылн хӯлтытэ.

Пасха тэ̄нут вāрмаль

12Пасха ōвыл хōталэ̄т, пасха пāля-пы̄грись йирнэ хōтал, ханисьтахтын хумиянэ Ӣсус китыгласаныл:

– Хоты мāт Наӈы̄н пасха пāсан вāруӈкве э̄ри?

13Тōнт Ӣсус кит хумияге кēтсаге ос лāвыс:

– Ӯсн минэ̄н. Тот вит сӯлипӯт тотнэ акв хум кāсалэгы̄н. Нэ̄н тах тав юи-пāлэ̄т минэ̄н.14Хоталь та хум сялты, тот нэ̄н кол кӯсяй нупыл лāвēн: “Ханисьтан хум китыглахты: ханисьтахтын хумиянум ёт пасха пāля тэ̄нэ колнакум хōт ōлы?”15Та э̄лумхōлас нэ̄нан сёпитым яныг колнак хӯлты. Нэ̄н тот-та пасан вāрегы̄н.

16Ханисьтахтын хумы̄г минасы̄г, ӯсн ёхтысы̄г. Тувыл Ӣсус лāвум сирыл тох ēмтыс. Тэ̄н пасха пасан вāрсы̄г.17Э̄типāлаг Ӣсус ань китхуйплув хумиянэ ёт тув ёхтыс.18Тэ̄манылт Ӣсус лāвыс:

– Ам сōль нāнан лāвēгум: аква нāн халынныл, хотъют ань Ам ётум тэ̄г, Āнум тах пӯп-ōйкатын тыналытэ.

19Ханисьтахтын хумиянэ сяр кāстал патсыт, халанылт китыглахтасыт:

– Ул ам āти?

20Ӣсус тāнанылн лāвыс:

– Китхуйплув хумныл аква, тав ань Ам ётум ня̄не вōй āнын пувтмāнтытэ.21Хумус хансым ōлы, Э̄лумхолас Пы̄гн савалаӈкве э̄ри, ань Āнум тыналанэ хум усьпылнэ̄г савалаӈкве паты! Тавēн самын патуӈкве ат э̄рыс.

22Тэ̄маныл порат Ӣсус ня̄нь вис, ня̄не мāгыс Тōрумн пӯмасипа лāвыс. Ня̄нь лōмтыг сакватастэ, хумиянэ̄н уртыстэ ос лāвыс:

– вуелы̄н, тāēн. Ты Ам алпим.

23Тувыл Тав āны вис, Тōрумн пӯмасипа лāвыс. Хумиянэ̄н ты āны мистэ. Хумиянэ пуссын ты āныныл айсыт.

24– Ты Ам кēлпум, тав сāв хōтпа мāгыс сōсхаты, – Ӣсус лāвыс.

25– Сōль нāнан лāвēгум: Тōрум ōлнэ хōн-мāт йильпи вина айнэм хōтал мус Ам виноград пилныл вāрим айнут аюӈкве воссы̄г ат патэ̄гум.26Тōрум янытлан э̄рыг э̄ргуманыл юи-пāлт тāн Елеон урн минасыт.

27Ӣсус тāнанылн лāвыс:

– Нāн пуссын Āнум ты э̄т хультуптылы̄н. Ань хансым ōлы:

“Паля ӯрнэ хум тэ̄рнлылум,

пāлят лāкква-оēгыт”.

28– Ам нōх-ялтнэм юи-пāлт Галилея мāн ёхтэ̄гум. Нāнан тот ӯриянум.

29Тōнт Пēтр Тавēн лāвыс:

– Хумиянэ Наӈыныл пуссын ке хот-воратэгыт, ам Наӈын нэ̄мхуньт ат оссувлылум.

30– Сōль Наӈын лāвēгум, – Ӣсус тавēн ювле-лāвыс, – ты хōтал э̄типāлаг, ань сиськурек китынты̄г рōӈхалтахтын э̄лы-пāлт наӈ хӯрум сёс Āнумныл тах хот-воратэ̄гын.

31Пēтр ос тāкысьнув лāвыс:

– Э̄рмыглы-ке, Наӈ ётын сорумн патэ̄гум. Ам Наӈыныл сōль ат воратэ̄гум.

Ханисьтахтын хумиянэ пуссын тох та лāвыглāлсыт.

Гефсимания мā

32Тāн Гефсимания нампа мāн ёхтысыт. Ӣсус ханисьтахтын хумиянэ̄н лāвыс:

– Тыт ӯнлахōлэн. Ам пōйксяӈкве ялэ̄гум.

33Тав Пēтр, Яков ос Иоан ёт вōвсанэ. Тувыл Тав кивре такем-та марсюмлавес, номтэ хот-сакыс.

34– Ам сымум савалы, сяма вāгтал патум.

Тав хумиянэ нупыл лāвыс:

– Тыт ōлэ̄н. Ёл ул вос оявēн.

35Ӣсус мось э̄лнув минас. Тав мā тāрмыл патыс, пōйксяс, йинэ саватпитэ ань пōхан моляхнув вос миннув.

36Авва, Āсюм! Наӈ пуссын вēрмегын! Ты яныг саватпи Ам тāрам тотэ̄лын. Ам таӈхнэм сирыл ул вос паты. Наӈ таӈхнэн сирыл вос ēмты.

37Тувыл Тав ханисьтахтын хумиянэ пāлт ювле-ёхтыс. Тāн ёл-оилматымат. Ӣсус Пēтр нупыл лāвыс:

– Симон, наӈ ёл-ойвēсын? Наӈ ман акв сё̄с ӯлумтāл ат вēритасы̄н?38Ост ōлэ̄н! Пойксēн! Нēрхатнэ вāрмалин ул майхатэ̄н. Лылы ост кос ōлы, алпи сяр вāгтал.

39Тувыл Ӣсус минас ōс та лāтӈанэ лāвим пойксяс.40Ювле-ёхтумēт ханисьтахтын хумиянэ ōс ёл-оилматымат. Тāн саманыл тāрвитыӈы̄г ēмтмыт; ат вāсаныл, Ӣсус нупыл мāныр лāвуӈкве

41Хӯрмиттыг ёхтумēт Ӣсус тāнанылн лāвыс:

– Нāн иӈ та хуегы̄н ос ӯсьлахтэгы̄н? Тōвлы! Та сё̄с та ёхтыс, Э̄лумхōлас Пы̄г карекыӈ мāхум кāтын та миве.42Квāлэ̄н, минэ̄в! Āнум тыналан хум та ляпамас.

Ӣсус пӯввес

43Ӣсус ты иӈ потыртас, аквтасёс Иуда та нэ̄глыс. Иуда акв Тав ханисьтахтын китхуйплув хумиянэ̄ныл ōлыс. Иуда ёт сāв хумыт ёхтысыт: пӯп-ōйкат, сāккон тотнэ хумыт ос матум э̄руптан ōйкат тот ōлсыт. Тāн сырайиӈ ос йивсупиӈ тāгыл ёхтысыт.44Таве хӯлтнэ хум тāн ётаныл тох потыртахтас: “Хотъют ам аниглылум, Таве тах пувумтэ̄лы̄н. Тувыл лāсьмарт ӯргалым кāснаколн тотэлы̄н”.45Ляпан-ёхтуманылт Иуда аквтаторыг Ӣсус пāлт ёмалтас, лāвыс: “Равви! Ханисьтан хум!” ос Таве та анигластэ.

46Ӣсус та пуввес.47Тот лю̄люм акв хум сирайе нōх-хасумтастэ, яныг пӯп-ōйка мēтхуме паль хот-сāграпастэ.

48Ань Ӣсус тāнаныл китыгласанэ:

– Ам ман хōрахси? Манрыг нāн сырайиӈ ос йивсупиӈ тāгыл Ам палтум ёхтысы̄н?49Кāсыӈ хōтал Ам нāнан ялпыӈ колт ханисьтасанум, нāн Āнум тōнт ат пувиньтаслы̄н. Нэ̄пакыт хумус хансым ōлы, тох вос ēмты.

50Ханисьтахтын хумиянэ пуссын лāкква-оясыт. Ӣсус тактēтэ оссувлавес.51Акв мāньлат хум Ӣсус юи-пāлт минмыгтāлыс. Тав тōрыл лап-мāнигтахтым ōлыс. Ӣсус пӯвумтыматэ порат та хум хот-манумтахтас,52манигтахтыглам тōре та хультыс, ня̄рлōмтыл та ояс.

Ӣсус синедрион э̄лы-пāлт

53Ӣсус сяр яныг пӯп-ōйка пāлт тотвес. Тыт пӯп-ōйкат, матум э̄руптан ōйкат ос сāккон тотнэ хумыт пуссын атхатасыт.54Пēтр Ӣсус юи-пāлт минас, яныг пӯп-ōйка кол кāрта пōхан ёхтыс. Тот кол ӯрнэ мāхум ёт нāй пōхан тōлтыглахтуӈкве ӯнтыс.55Пӯп-ōйкат ос синедрион мāхум Ӣсус урыл сāвсыр вāрмаль киссыт. Та вāрмалянэ мāгыс Таве порслануваныл. Тамле вāрмаль хōнтуӈкве ат вēрмысыт.56Сāв уркыӈ мāхум кос потыртасыт, тāн лāтӈаныл мосься̄г ōлсыт.57Тувыл матахкем уркыӈ хōтпа нōх-лю̄льсыт. Тāн потыртасыт:

58– Мāн хӯлыгласув, Тав потыртāлыс: “Э̄лумхōлас кāтыл вāрим ялпыӈ кол Ам хот-сакватылум. Тувыл тах хӯрум хōтал сыс э̄лумхōлас кāтыл вāртāл мōт ялпыӈ кол ӯнттэ̄гум”.

59Тāн лāтӈаныл мирн ат агтвēсыт.60Тувыл ань пӯп-ōйка нōх-лю̄лис, Ӣсус китыгластэ:

– Нāӈ ювле манрыг нэ̄матыр ат лāвēгын? Ты мāхум лāвум лāтӈыт урыл ювле мāныр лāвуӈкве вēрмēгын?61Ӣсус сяр акв лāтыӈ ат лāвыс. Яныг пӯп-ōйка Таве ōс китыгластэ:

– Наӈ ман сōль Кристос, Тōрум пы̄ге?

62– Сōль, – Ӣсус лāвыс, – нāн касалылы̄н тах:

– Э̄лумхōлас Пы̄г торум тулыт халн ёхтынэ̄тэ порат Тōрум ёмаспал кāтпале торыг ӯнлы тах.

63Пӯп-ōйка такем-та кантмаявес, такви маснутанэ пулиг-маныгтасанэ.

– Таве вāнэ манхурип хōтпа мāн иӈ кинсэ̄в? – тав рōӈхалтахтас.64 Нāн хӯлыслы̄н-а, Тав Тōрум ля̄льт лю̄камтахты? Ты урыл нāн мāныр лāвегы̄н?

Пуссын Таве сутитасаныл, Ӣсус порслаӈкве э̄ри.

65Тōнт тōват Тав ля̄льтэ полх сальгуӈкве патсыт. Ӣсус самаге тōрыл лап-нэ̄гвесы̄г. Тав рāтвес. Тав нупылэ рōӈхуӈкве патсыт:

– Э̄лаль ōлнэ нот урыл потыртэн, я!

Та юи-пāлт Таве ӯргалан хумытын мōт мāн тотвес, тот ōс пилисьмаӈы̄г рāтвес.

Пēтр Ӣсусныл хумус хот-воратас

66Пēтр кол кāртат ōлыс. Тот ань яныг пӯп-ōйка мēтнэ̄н кāсалавес.67Пēтр нāй пōхат толтыглахтым ӯнлыс. Нэ̄ тав нупылэ ёмсякв āӈкватāлыс ос лāвыс:

– Наӈ ōс Назаретыл ōлнэ Ӣсус ёт ōлсын.

68Пēтр хот-воратас.

– Ам сяр ат торгамтылум, наӈ мāныр урыл потыртэ̄гын, — Пēтр тох лāвим кон-минас. Тōнт ань сиськурек та рōӈхалтахтас.

69Ётылнув та нэ̄ таве ōс тот кāсаластэ, лāвыс:

– Ты ōс тāн акв хумия̄ныл.

70Пēтр ōс хот-воратас. Тот лю̄люм мāхум хӯнтамласаныл:

– Сōль наӈ тāн акв хумия̄ныл? Наӈ ōс Галилея мāныл ōлэ̄гын?71Пēтр ӯсьпылнэ̄в хот-воратаӈкве патыс:

– Ам сяр ат вāглум, хотъют урыл нāн потыртэ̄гын.

72Сиськурек китынты̄г рōӈхалтахтам порат Пēтр Ӣсус лāтӈанэ номылматсанэ: “Сиськурек рōӈхалтахтан э̄лы-пāлт наӈ хӯрум сёс Āнумнылхот-воратэ̄гын тах”. Ос Пēтр лю̄ньсятахтас.


*а 14:3 алабастер – я̄ӈк сули, русь лāтӈыл алебастр

*б 14:3 нард – Индия мāт хорамыӈ лӯптат, та лӯптатныл тыныӈ вōй вāрыглавес

*в 14:36 авва – еврей лāтӈыл: “Ась!”

*г 14:53 синедрион – яныг совет, тот мā кӯсяйы̄г ōлыс


предыдущая глава Глава 14 следующая глава